ZAWSUA 13 - Mara Bible RV (BSI)

Râh la via awpazy

¹ Zawsua cha vaw machâ ta, pawpi kaw bâ ta. Abeipa ta a hnohta, “Machâ ha chi ta, pawpi kaw bâ chi ta, râh hra cha la awpa hluh chy tlôh ta.

² Hezy he la mâh leipa râhzy a châ: Philistinâ râh zydua nata Kesuri mo râh zydua;

³ Izi râh kiapâh liata a ypa Sihaw tawhta maw lâta Ekaraw râhri taihta, Ekaraw cha Kâna râh hawhta pachâpa a châ; Philistinâ bei papangawh ryureina Kâza, Asadô, Askelaw, Kiti nata Ekaraw râhzy nata chho lâta Avimi râh;

⁴ Kâna râh zydua nata Sidaw râh Merâ tawhta Amawri râhri Aphe khih taih;

⁵ Kebâli râh nata nochhi lâta Lebanaw râh zydua Hâmaw Tlâh ry Bâlâkadâ tawhta Hâmathi khih angiana taih;

⁶ Lebanaw tawhta Misrephôthamâ taihta tlâh râh liata a pahrâpa zydua nata Sidaw râh zydua cha, la mâh leipa râhzy a châ. Âmo cha Izarei sawzy hmiakô tawhta papua aw ei na ta, bie ei cha piepa hawhta, ama râhzy cha Izarei sawzy ryuto châta na rai aw ei.

⁷ Chavâta tahmâ chi chakipazy nata Manase chi khophiezy hnohta he râhzy he ryuto châta rai mah y,” tah ta.

Zawdâh nochhi lâ râh raina

⁸ Manase chi khophie nata Rubena chi nata Kâdâ chizy cha Zawdâh nochhi lâta Mawsi ta âmo a piepa ryuto râhzy hnei ei ta. Abeipa chakaotuhpa Mawsi ta he râhzy he âmo a vaw pie ei:

⁹ Anaw saikao chhâna liata a ypa Arôerâ khihpi tawhta saikao liah khophie liata khihpi nata Dibô taihta Medebâ tlâhby râh zydua;

¹⁰ Hesbaw liata ryu a reihpa Amawri bei Sihaw khihpi zydua Amawna râhri taihta;

¹¹ Kilia râh, Kesuri nata Mâkâ râh, Hâmaw Tlâh zydua nata Bâsanâ râh zydua Salekâ khihpi taihta;

¹² Bâsanâ liata Ôkâ khinarâh zydua; ano cha Astarô nata Edarei khihzy liata bei ta a ypa châ ta, Rephai chyhsa a y chhôpa a châ. Cha beizy cha Mawsi ta siehnao ta, a papua ha ei.

¹³ Kesuri mo nata Mâkâ mo deikua cha, Izarei sawzy ta papua veih ei. Kesuri mo nata Mâkâ mo cha tanoh taihta Izarei sawzy hry liata ama y.

¹⁴ Livai chi deikua cha Mawsi ta ryuto râh pie vei. Abeipa ta Mawsi hnohta a vaw rei hapa hawhta, Livai ryuto awpa cha Abeipa Izarei Khazohpa lâta mei ta hmohlâpazy a châ.

¹⁵ Rubena chi cha a pho pho ta Mawsi ta ryuto râh pie ta.

¹⁶ Ama râhri cha Anaw saikao chhâna liata a ypa Arôerâ khihpi tawhta saikao liah khophie liata khihpi nata Medebâ tlâhby râh zydua;

¹⁷ Hesbaw nata a tlâhby liata khihpi zydua; Dibô, Bamôbâlâ, Bebâlâmeônâ,

¹⁸ Zahâ, Kedemô, Mephâtâ,

¹⁹ Kiriathai, Sibamâ, saikao tlâh liata Zeresahâ,

²⁰ Bepeôrâ, Piskâ baihkhaihpa, Bezesimô,

²¹ tlâhby khihpi zydua nata Hesbaw liata ryu a reihpa Amawri bei Sihaw khinarâh zydua a châ. Bei Sihaw cha, cha râh liata a pahrâpa beithopazy, Midia bei, Evi bei, Reke bei, Zuri bei, Hurâ bei nata Rebâ beizy chhaota Mawsi ta a vaw pahniepa bei kha a châ.

²² Beô sawchapawpa pachaothaipa Bâlâma chhao Izarei sawzy ta mohropa ama thiepazy hry liata zaozi ta ama thie ha hra.

²³ Chatanachata Zawdâh chavah nata a by zydua cha Rubena pathlazy râh vaw châ ha ta, cha liata khihpizy nata khichapeihzy cha Rubena pathlazy ta a pho pho ta ryu ta ama to.

²⁴ Mawsi ta Kâdâ chi chhao a pho pho ta ryuto râh pie ta.

²⁵ Ama râh cha Zaze khihpi nata Kilia râh khihpi zydua, Amawna râh khophie, Râbâ nochhi lâta Arôerâ taih;

²⁶ Hesbaw tawhta Ramâmize nata Betôni taih, Mâhanai tawhta Debi râh taihta a châ.

²⁷ Saikao liata Beharâ, Benirâ, Sukô, Zaphônâ nata Hesbaw bei Sihaw râh hropazy chhao Kâdâ pathlazy râh châ ta, Zawdâh chavah cha râhri ta hmâpa ta, Zawdâh haosâ nochhi lâta Chinere Tipo mathi lâ chhâna taihta Kâdâ pathlazy râh a châ.

²⁸ Chazy cha Kâdâ pathlazy ta a pho pho ta ama topa khihpizy nata ama khichapeihzy a châ.

²⁹ Mawsi ta Manase chi khophiezy hnohta ryuto râh pie ta. Manase chi khophiezy hnohta a pho pho ta ryuto râh a rai ei.

³⁰ Ama râh cha Mâhanai tawhta Bâsanâ râh zydua, Bâsanâ bei Ôkâ khinarâh zydua, Bâsanâ râh liata Zairâ kao khihpi zydua chhaota khih sycharu a châ.

³¹ Kilia râh khophie nata Bâsanâ bei Ôkâ khinarâh liata Astarô nata Edarei chhao âmo râh ta a ô. Chazy cha Manase sawchapawpa Mâkhi pathla khophiezy hnohta a pho pho ta ama ryuto châta piepa râhzy a châ.

³² Chazy cha Mawsi ta Zawdâh haosâ Zerikô nochhi lâ Môabâ bypi liata ama y nota ryuto châta a raipa râhzy a châ.

³³ Livai chi deikua cha, Mawsi ta ryuto râh pie vei. Abeipa ta ama hnohta a rei hapa hawhta, Abeipa, Izarei Khazohpa cha ama ryuto a châ.