ZAWSUA 11 - Mara Bible RV (BSI)

Zabi baotuhpazy pahniena

¹ Izarei ta pahniena a topa thâtih cha, Hâzaw bei Zabi ta a thei nahta, Mâdô bei Zôbâ, Simrô bei, Akasâ bei,

² maw lâta tlâh râh beizy, Chinerô chho lâta Arabâ beizy, bypi râh beizy, notla lâta Dôrâ beizy,

³ nochhi nata notla lâta a ypa Kâna mozy, tlâh râh liata a ypa Amawri mo, Perizi mo, Zebu mo nata Mizpâ râh Hâmaw tlâh ry liata a ypa Hivi mozy lâta chyhsa tuah ta.

⁴ Cha beizy cha ama pheisaih zydua chhaota chyhsa hluhpi, tilaipi kiah liata sadi zie tlai ta hluhpa ta, arâzy nata talailih hluhpi chhaota pua ei ta.

⁵ Beizy cha ama pheisaih zydua pahlyhpa ta Izarei a dyuh awpa ta pua ei ta, Merô tipo liata a riepakhy ei ta.

⁶ Abeipa ta Zawsua hnohta, “Âmo kha chi khah y. Mylâ tahmâ ti heta âmo cha thie chiehpa ta Izarei ku liata ei pie aw ei. Ama arâ chazawzy chhawh aw chi ta, ama talailihzy mei ta na rao khai aw,” tah ta.

⁷ Zawsua nata a pheisaih zydua ta âmo cha eikhapi ta Merô tipo liata pua thlupa ta, a dyuh ei ta.

⁸ Abeipa ta âmo cha Izarei ku liata pie ta, Izarei sawzy ta thie ei ta, Sidaw Rônahpa nata Mirephôthami nata nochhi lâta Mizpâ saikao taihta a chadai ei ta, pakha hmah pahlôh leipa ta ama thie khai haw.

⁹ Abeipa ta bie a piepa hawhta, Zawsua ta ama chô liata tao ta, ama arâ chazawzy chhawh ta, ama talailihzy mei ta rao ta.

¹⁰ Cha nona chata Zawsua cha a lie ta, Hâzaw khihpi la ta, a khih bei cha zaozi ta thie ta. Kha hlâta cha Hâzaw cha, a chheipâh khinarâh zydua hry liata khihpi chaipa a châ tyh.

¹¹ Hâzaw khihpi liata a ypa chyhsa zydua cha zaozi ta thie khai ei ta, tlokhuh ama pahleipadia khai haw. Husona a hneipa pakha hmah pahlôh veih ei. Zawsua ta Hâzaw khihpi cha mei ta a rao haw.

¹² Cha beizy khihpizy nata ama bei zydua cha, Abeipa chakaotuhpa Mawsi biepiepa hawhta, Zawsua ta la khai ta, zaozi ta âmo cha chhawhsao ta, a pamua ha ei.

¹³ Zawsua ta mei ta a raopa Hâzaw khihpi tah leipa ta, tlâh byuhpa liata khihpi padua chiehpazy cha, Izarei ta khih kha hmah mei ta rao vei.

¹⁴ Cha khihpizy hraona sôh zydua nata sahrohzy cha, Izarei sawzy ta hraona sôh châta a la ei ta, chyhsapa deikua cha ama pahleipadia khaina taihta zaozi ta thie ei ta, husona a hneipa khâpa hmah pahlôh veih ei.

¹⁵ Abeipa ta a chakaotuhpa Mawsi hnohta bie a piepa hawhta, Mawsi ta Zawsua cha biepie pachhuah ta, cha hawhna chata Zawsua ta a tao lymâ. Abeipa ta Mawsi bie a piepa zydua a tao leipa y vei.

Zawsua ta Kâna râh zydua a la

¹⁶ Chatanachata Zawsua ta Kâna râh zydua cha la khai ta. Tlâh râh, Neke râh, Kôse râh zydua, bypi râh, Arabâ râh, Izarei tlâh râh nata ama bypi râhzy,

¹⁷ Seirâ Tlâh a kaw dypa Hâlâ Tlâh nata Hâmaw Tlâh ry Lebanaw saikao liata a ypa Bâlâkadâ taihta la khai ta. Ama bei zydua patu ta, a thie khai ha ei.

¹⁸ Cha beizy cha Zawsua ta bohpi â vaw dyuhpazy ama châ.

¹⁹ Kibiô liata a pahrâpa Hivi mo tah leipa ta cha, Izarei sawzy nata aryhna a taopa khihpi y veih ei. A dyuhpa ta lapa sai a châ.

²⁰ Abeipa ta Mawsi bie a piepa hawhta, Zawsua ta âmo cha zawngiahna hnei leipa ta, tlokhuh pahleipadia ta a pamua khai nawpa ei ta, Abeipa ta ama palôh kuh pachhasa ta, Izarei a padyuhsapa ei.

²¹ Cha daihti liata Zawsua cha sie ta, Anâki mo cha tlâh râh tawhta chhawh pathlah ta. Hebraw tawhta zy, Debi tawhta zy, Anabi tawhta zy, Zudâh tlâh râh zydua tawhta nata Izarei tlâh râh zydua tawhta a chhawh pathlah khai ha ei. Zawsua ta Anâki mo nata ama khihpizy a pahleipadia khai haw.

²² Izarei sawzy râh liata Anâki mo pakha hmah y khao veih ei. Kâza khih, Kâthâ khih nata Asadô khihzy lia deita ta a chyhta ama y.

²³ Abeipa ta Mawsi hnohta a reipa zydua hawhta, Zawsua ta Kâna râh zydua la khai ta, ama chi apachhaihnazie hawhta ama ryuto râh a pie chyu ei. Chatanachata adyuhna pai ta, râh cha thlalôhpa ta y ha ta.