ZAWSUA 10 - Mara Bible RV (BSI)

Noh â duah

¹ Zerusale bei Adônizede ta Zawsua ta Ai khihpi la ta, parao khai ta, Zerikô nata a khih bei a paraopa hawhta, Ai khihpi nata a khih bei chhao a parao khai hapa thâtih thei ta. Kibiô khihsawzy cha Izarei nata aryhna biehrai tao ei ta, Izarei hry liata ama pahrâ hapa thâtih chhao thei ta.

² Chavâta chi ngaita ta. Kibiô cha khihpi lai ngaitapa, bei khihpi hawhpa châ ta. Ai khihpi hlâta lai via ta, a khihsaw chapaw zydua chhao pasaipha sai châ ei ta, chatanachôta Izarei nata aryhna a taopa vâta, Zerusale bei cha a chi ngaitapa a châ.

³ Chavâta Zerusale bei Adônizede ta Hebraw bei Hôhâ, Zarâmu bei Pirâ, Lakhi bei Zaphia nata Ekalaw bei Debi zy lâ chyhsa tuah ta, ama hnohta,

⁴ “A khy u la, na kaw bao teh u, Kibiô a dyuh ei suh u. Zawsua nata Izarei sawzy nata aryhna a tao ha hih,” tah ta.

⁵ Chatanachata Amawri bei papangawh, Zerusale bei, Hebraw bei, Zarâmu bei, Lakhi bei nata Ekalaw beizy cha a paraoh ei ta, ama pheisaih zydua chhaota khy ei ta, Kibiô khihpi riaai liata a pahmaoh ei ta, khihpi cha a dyuh ei ta.

⁶ Kibiô mo ta Kilkal riehmo liata a ypa Zawsua lâ chyhsa tuah ei ta, a hnohta, “Châ chakaotuhpazy he na bâh pathliah sai khah y. A chatliepa ta keimo lâ a khy la, miah kaw bao la, miah kaw pachha mah y. Tlâh râh liata a pahrâpa Amawri bei zydua a paraoh ei ta miah amâ dyuh hih,” tah ei ta.

⁷ Chatanachata Zawsua cha a pheisaih thatlôpa nata riahphapa zydua chhaota Kilkal tawhta khy ta.

⁸ Abeipa ta Zawsua hnohta, “Kha chyhsazy kha chi khah y. Âmo cha na ku liata ei cha pie haw. Na hmiakô liata a duah thei awpa ama hry liata pakha hmah y aw veih ei,” tah ta.

⁹ Zawsua cha azozâkhihdei ta Kilkal tawhta sie ta, eikhapi ta Amawri mo cha tla thlu ta.

¹⁰ Abeipa ta Izarei sawzy hmiakô liata Amawri mo cha patypamâsa ta, Kibiô liata thata thie ei ta, Behôrô lâ khyna lâpi lâta a chadai ei ta, Azekâ nata Mâkedâ khihpi taihta thie lymâ ei ta.

¹¹ Izarei sawzy hmiakô tawhta a râpai ei ta, Behôrô chhutla ama chô hai nota, Abeipa ta avâ tawhta pareih laipa za patlasa ta, Azekâ tlôna taihta âmo cha daih lymâ ta, thata thi ei ta. Izarei sawzy ta zaozi ta ama thiepazy hlâ chhao ta pareih ta a daisaopa ama hluh via.

¹² Abeipa ta Izarei sawzy ku liata Amawri mo a pie noh ta, Zawsua ta Abeipa bie a chho ta, Izarei sawzy mohmô liata, “Noh y, Kibiô chô liata a duah la, Thlâpâ y, Aizalô saikao chô liata a duah mah y,” tah ta.

¹³ Chatanachata râh ta a chariahpazy chô liata phuh a la khai hlâlei cha, Noh a duah ta, Thlâpâ chhao â chalih haw. He biezy he Zasâh châbu liata ropa a châ. Noh cha avâ liah khophie liata a duah ta, noh kha bohloh tlai tla leipa ta a y.

¹⁴ Cha hawhta Abeipa ta chyhsapa ao a nathliena noh cha, cha hlâta y beih leipa ta, cha khai tawhta chhao y beih khao vei. Abeipa ta Izarei â dyuhkheipa vâta a châ.

¹⁵ Cha khai tawhta Zawsua nata Izarei saw zydua cha Kilkal liata ama riehmo lâ a lie ha ei ta.

Amawri bei papangawh thiepa ama châ

¹⁶ Bei papangawhzy cha a râ ei ta, Mâkedâ lôpu liata a nyu ei ta.

¹⁷ Zawsua hnohta, “Bei papangawhzy cha ama hmô haw. Mâkedâ lôpu liata amâ nyu,” tahpa ta chho ei ta.

¹⁸ Zawsua ta ama hnohta, “Lôpu paka cha alô laipazy ta pamai u la, vaituhpazy soh teh u.

¹⁹ Nâmo deikua cha, cha liata y khuh vy. Nama chariahzy a chadai u la, hnôh a chhâhpazy tawhta thie lymâ u la, ama khihpizy pangiasa khuh vy. Abeipa nama Khazohpa ta âmo cha nama ku liata a cha pie ha ei,” tah ta.

²⁰ Zawsua nata Izarei sawzy ta ama chariahzy cha amâ mua khaina taihta thie ei ta. A laibâhpa chyhtazy deikua cha thokhy hneipa khihpizy lâ a râ ei ta.

²¹ Chatanachata zawpi zydua cha Mâkedâ liata a ypa Zawsua lâ thlalôhpa ta a lie ei ta. Izarei sawzy chô liata a reih a pathlie ngâhpa ahy hmah y khao veih ei.

²² Zawsua ta, “Lôpu paka kha pahy u la, bei papangawhzy kha ei hnohta a vaw chhi teh u,” tah ta.

²³ Cha hawhna chata tao ei ta, bei papangawh, Zerusale bei, Hebraw bei, Zarâmu bei, Lakhi bei nata Ekalaw beizy cha lôpu tawhta Zawsua lâ a vaw chhi ei ta.

²⁴ Beizy cha Zawsua kô ama vaw tlôkhei nahta, Zawsua ta Izarei chapaw zydua awpakhy ta, a hnohta a sie hrapa pheisaih hyutuhpazy hnohta, “A vaw hnia u la, he beizy rao he vaw tly teh u,” tah ta. A vaw hnia ei ta, beizy rao cha tly ei ta.

²⁵ Zawsua ta ama hnohta, “Chi leipa u la, riahchhiepa ta y hra leipa u la, thatlôpa nata riahphapa ta y teh u. He hawhna heta Abeipa ta namâ dyuhpa nama chariahpa zydua chô liata a tao lymâ aw,” tah ta.

²⁶ Cha khai tawhta Zawsua ta bei papangawhzy cha chhawh ta, thie ta, thokô miapangawh liata pangieh ta. Zâlâ taih thokô liata a bangieh ei ta.

²⁷ Noh a tla nahta, Zawsua ta biepie ta, thokô tawhta la ei ta, amâ nyuna lôpu liata thy ei ta, lôpu paka cha alô laipazy ta pamai ei ta, cha hawhna chata tanoh taihta a y thlâh haw.

²⁸ Cha noh ta Zawsua ta Mâkedâ khihpi cha la ta. Khihsawzy nata ama khih bei cha zaozi ta thie ta, cha khihpi liata a ypa zydua pamo khai ta, pakha hmah pahlôh vei. Zerikô bei chô liata a taopa hawhta, Mâkedâ bei chô liata chhao tao ta.

²⁹ Zawsua cha a hnohta a ypa Izarei saw zydua chhaota Mâkedâ tawhta Libnâ khihpi lâ sie ta, khihpi cha a dyuh ta.

³⁰ Abeipa ta Libnâ cha a khih bei chhaota Izarei ku liata pie ta. Khihpi cha a dyuh ta, a chhôh liata a ypa chyhsa zydua cha zaozi ta thie khai ta, chyhsa pakha hmah khihpi chhôh liata pahlôh vei. Zerikô bei chô liata a taopa hawhta, cha khih bei chô liata chhao tao ta.

³¹ Zawsua cha a hnohta a ypa Izarei saw zydua chhaota Libnâ tawhta Lakhi khihpi lâ sie ta. Khihpi cha dôhpa ta, a dyuh ta.

³² Abeipa ta Lakhi khihpi cha Izarei ku liata pie ta, a noh nona liata la ta. Libnâ chô liata a taopa hawhta, Lakhi khihpi chhôh liata a ypa chyhsa zydua zaozi ta thie khai ta.

³³ Keze bei Hôrâ cha Lakhi khihpi bao awpa ta khy ta. Zawsua ta ano nata a sahlaozy cha pakha hmah pahlôh leipa ta thie khai ta.

³⁴ Zawsua nata Izarei saw zydua cha Lakhi tawhta Ekalaw khihpi lâ sie ei ta. Khihpi cha dôhpa ta, a dyuh ei ta.

³⁵ Cha noh ta khihpi cha la ei ta, zaozi ta ama pahleipadia haw. Lakhi chô liata a taopa hawhta, cha noh ta Ekalaw khihpi liata a ypa chyhsa zydua zaozi ta a thie khai ha ei.

³⁶ Zawsua nata Izarei saw zydua cha Ekalaw tawhta Hebraw khihpi lâ khy ei ta, khihpi cha a dyuh ei ta.

³⁷ Hebraw khihpi cha la ei ta, khihsawzy nata a khih bei nata a khichapeihzy liata a ypa chyhsa zydua zaozi ta thie ei ta. Ekalaw chô liata a taopa hawhta Hebraw khihpi nata a chhôh liata a ypa chyhsa zydua a pahleipadia khai ha ei. Pakha hmah pahlôh vei.

³⁸ Cha khai tawhta Zawsua nata Izarei saw zydua cha Debi khihpi lâ a lie ei ta, khihpi cha a dyuh ei ta.

³⁹ Khihpi nata a khih bei nata a khichapeih zydua la ei ta. Zaozi ta a dyuh ei ta, a chhôh liata a pahrâpa chyhsa zydua ama thie khai haw. Pakha hmah pahlôh vei. Libnâ nata a khih bei chô liata nata Hebraw chô liata a taopa hawhta, Debi nata a khih bei chô liata chhao tao ta.

⁴⁰ Cha hawhna chata Zawsua ta râh zydua, tlâh râh, Neke râh, bypi râh nata pâdawhpa râhzy pahnie khaipa ta, ama bei zydua thie khai ta, pakha hmah pahlôh vei. Abeipa, Izarei Khazohpa biepiepa hawhta, husona a hneipa maih a pahleipadia khai ha ei.

⁴¹ Zawsua ta Kâdesbânia tawhta Kâza taihta pahnie ta, Kôse râh zydua chhao, Kibiô taihta a pahnie khai ha ei.

⁴² Abeipa, Izarei Khazohpa ta Izarei cha â dyuhkheipa vâta, cha bei zydua nata ama râhzy cha Zawsua ta ei kha ta a la khai thei ha ei.

⁴³ Cha khai tawhta Zawsua cha a hnohta a ypa Izarei saw zydua chhaota Kilkal liata riehmo lâ a lie ha ta.