ZAWSUA 1 - Mara Bible RV (BSI)

Zawsua hnohta biepiepa

¹ Abeipa chakaotuhpa Mawsi a thi tawhta, Mawsi baotuhpa Zawsua, Nunâ sawchapawpa hnohta Abeipa ta,

² “Nâ chakaotuhpa Mawsi thi ha ta, chavâta tahmâ thyu la, nâ nata zawpi zydua ta Zawdâh chaka u la, Izarei phopi ei piepa râh lâ sie teh u.

³ Mawsi hnohta bie ei taihpa hawhta, nama phei ta nama tlypa maih ei cha pie khai aw ei.

⁴ Nama râhrizy chho lâta Râhchawhpa tawhta maw lâta Lebanaw taihta châ aw ta, nochhi lâta chavah laipa, Ufrâti chavah tawhta Hiti mo râh zydua ô ta, notla lâta Tilaipi Rônahpa taihta a châ aw.

⁵ Na hro chhôh zydua ahy ta hmah cha pahnie thei aw veih ei. Mawsi hnohta ei ypa hawhna khata, na hnohta ei y hra aw. Cha siesai leipa aw na ta, cha pathlua aw va na.

⁶ “Thatlôpa nata riahphapa ta y teh. He sahlao he ama pathlatuhpazy hnohta pie awpa ta bie ei taihpa râh cha ryu ta na patosa aw ei.

⁷ Thatlôpa nata riahpha ngaitapa ta y la, nâ chakaotuhpa Mawsi ta tao awpa bie a cha piepa ryhpa zydua pakhâta ta zyh la, tao mah y. Na siena lia maihta thlaochhipa ta na y thei nawpa ta, ryhpa bie he na chachâh lâ tlyma, na chavei lâ tlyma tleisai cheita khah y.

⁸ Ryhpa Châbu heta na pakah a puasai awpa châ leipa ta, a chhôh liata bieropazy chhô nah zâ ta tlao na pachâ awpa a châ. Chatanachata ryhpa biezy cha pakhâta ta na zyh thei aw. Cha hawhta na tao khiahta cha, na lâpizy patlâ aw ta, na hlao a tloh aw.

⁹ Bie cha pie va na mâ? Thatlôpa nata riahphapa ta y teh. Chi leipa la, ngiarohpa ta y hra kha. Abeipa na Khazohpa cha na siena maihta na hnohta a y lymâ aw,” tah ta.

Zawsua ta Izarei sawzy a chhihtha

¹⁰ Chatawhcha Zawsua ta Izarei phopi hyutuhpazy biepie ta ama hnohta,

¹¹ “Riehmo chahryh u la, zawpi hnohta, ‘Nama niedozy a chhuanoh teh u. Noh thôh khai tawhta, Abeipa nama Khazohpa ta hnei awpa ta râh a cha piepa ei liata a ngia ta, râh cha hnei awpa ta Zawdâh he nama chaka bâ aw,’ tahpa ta biepie teh u,” tah ta.

¹² Rubena mo, Kâdâ mo nata Manase chi khophiezy hnohta Zawsua ta,

¹³ “Abeipa chakaotuhpa Mawsi ta nama hnohta, ‘Abeipa nama Khazohpa ta apahâna su cha pie ei ta, he râh he a cha pie aw ei,’ tahpa ta bie a cha piepa ei kha a thei thlâh ha muh vy.

¹⁴ Nama lapinô zy, nama hawtizy nata nama sahrohzy he Zawdâh hesâ lâ Mawsi ta râh a cha piepa liana ei heta y aw ei ta, nâmo chyhsa thatlô riahphapa sahlao deikua cha, chariah chhaichhi a tobipa ta nama unawhzy hmia lâta Zawdâh chaka aw ei chi ta, nama unawhzy nama bao tua aw.

¹⁵ Abeipa ta nama unawhzy cha, nâmo hawhta apahâna piepa ta, Abeipa nama Khazohpa ta râh a piepa ei cha, âmo chhao ta ama hnei hlâlei bao aw ei chi ta, cha khai tawhta Abeipa chakaotuhpa Mawsi ta hnei awpa ta Zawdâh nochhi lâta râh a cha piepa lâ ei cha kua aw ei chi ta, râh cha nama hnei aw,” tah ta.

¹⁶ Izarei phopi hyutuhpazy ta Zawsua cha a chhy ei ta, a hnohta, “Tao awpa bie miah na piepa zydua tao aw pi ta, miah na tuana lâ maih eima sie aw.

¹⁷ Kyh to liata Mawsi bie eima zyhpa hawhna khata, na bie eima zyh lymâ aw. Abeipa na Khazohpa cha, Mawsi hnohta a ypa hawhna khata, na hnohta y mawh sy!

¹⁸ Kheihawhpa biepiepa rai châ sala, ahy rai na biepiepa a dyuhpa nata na biezy a nathlie leipa cha thiepa a châ aw. Thatlôpa nata riahphapa ta y mah y,” tah ei ta.