ZAWNA 4 - Mara Bible RV (BSI)

Zawna hiehâhna nata Khazohpa zawngiahna

¹ Khazohpa ta Ninivâ khihpi a pahleipadia khao leipa vâta, Zawna cha a ly leipa ta, a hiehâh ngaita ta.

² Abeipa lâ thlahchhâ ta, “Hy Abeipa, ei châ haw na. He hmo he ei râh liata ei y thlâh no tawhna khata ei rei hapa châ vei ma? He vâna heta mah a parapa ta Tâsi lâ ei râ pâ ngâ kawpa kha a châ tâh. Nâ cha ngiachhiena nata zawngiahna a hneipa, nônaipa nata kyhpachâna ta a biepa Khazohpa châ chi ta, chhiena patlôsa awpa tawhta a palôh a panano theipa na châ tahpa pahno tlôh na ta.

³ Chavâta Hy Abeipa y, ngiachhiepa ta ei hrona he tahmâ keima tawhta la ha mah y, kei châta la hropa hlâta thipa tlao a pha via,” tah ta.

⁴ Abeipa ta, “Na hiehâhna kha â do ma?” tah ta.

⁵ Zawna cha khihpi tawhta pua ta, khihpi nochhi lâ liata a tyuh ta, cha liata tlâhphia a hy ta. Khihpi chô liata khâpa hmo ma a vaw tlô aw tahpa hmô awpa ta, tlâhphia nohdi ry liana cha a tyuh thlâh ha ta.

⁶ Zehôvâh Khazohpa ta titheih zôh vaw paysa ta, Zawna chô lâta pazawhsa ta, cha chata a luh pahlina nohdi piepa ta, a riethei taona tawhta vaw pachha ta. Zawna cha titheih zôh vâna chata a ly ngaita ta.

⁷ Châhrasala a mylâ khih a dei nah ta, Khazohpa ta alôpa paysa ta, cha chata titheih zôh cha chaih ta, uah ha ta.

⁸ Noh a vaw chhi nahta, Khazohpa ta nochhi thlih lalôhpa vaw tuah ta, Zawna cha nohsa ta a luh vawh ta, panao ha ta. Chavâta thi awpa ta hiah ta, “Kei châta la hropa hlâta thipa a pha via,” tah ta.

⁹ Khazohpa ta Zawna hnohta, “Titheih zôh kyh ta na hiehâhna he â do ma?” tah ta. Zawna ta, “Ei hiehâhna he â do na, thi theina taihta na ei hie a hâh,” tah ta.

¹⁰ Abeipa ta a hnohta, “Na hriapasana a châ leipa, na palaiseihsapa chhao a châ leipa, zâ zâ kha ta vaw y ta, zâ zâ kha ta a lei heihpa titheih zôh kha na ngia cha chhie kaw ta.

¹¹ Ninivâ khihpi, a chhôh liata chavei nata chachâh ku chhao a pahno leipa chyhsa 120,000 nata sahroh hluhpi yna khihpi, hao khihpi rônahpa hao ngiachhie aw va na ma?” tah ta.