ZAWNA 3 - Mara Bible RV (BSI)

Zawna Abeipa rei â ngiah

¹ Abeipa bie cha Zawna hnohta a ei nona ta vaw tlô heih ta,

² a hnohta, “Thyu la, Ninivâ khihpi, hao khihpi rônahpa lâ hao sie la, bie rei awpa ei cha chhopa kha a hnohta kei phuah teh,” tah ta.

³ Zawna cha thyu ta, Abeipa bie hawhta Ninivâ khihpi lâ cha sie ta. Ninivâ he khihpi lai ngaitapa, noh thôh lâsie tlai a tlohpa a châ.

⁴ Zawna ta khihpi cha a ngia pathao ta, noh kha lâsie a chahryh tawhta, “Noh sypalih hlâta Ninivâ he pahleipadiapa a châ aw,” tahpa ta awh ta.

⁵ Ninivâ mo cha Khazohpa zo ei ta. Kâhvileina phuah ei ta, a lai chaipa tawhta a chyh chaipa taihta latho poh a bu ei ta.

Ninivâ mo ama ro

⁶ Cha biezy cha Ninivâ bei kô a tlô nahta, a beidyuchhai tawhta thyu ta, a bei poh hlai ta, latho poh a bupa ta buchâh liata a tyuh ta.

⁷ Bie papua ta, cha cha Ninivâ khihpi zydua liata paphuahsa ta, “He he bei nata a beimachâzy biepiepa a cha: Chyhsa nata sahroh, viahchao hri nata mietaku zaw zy ta khâpa hmâh ama padi awpa châ vei. Ama nie awpa châ leipa ta, ti chhao ama do awpa châ vei.

⁸ Chyhsa chhao, sahroh chhao, latho poh a bu khai ei sala, Khazohpa cha thata pado mawh ei sy. Chyhsa to ama moleina lâpi tawhta kua ei sala, ama ku liata thachahra hmâna a ypa tawhta kua mawh ei sy.

⁹ Ahy ma a pahno tly? Eima leidia lei nawpa ta, Khazohpa cha a palie thei ta, a palôh pananopa ta, a hiehâhna ru ngaitapa tawhta â palie thei mâh tâh,” tah ta.

¹⁰ Khazohpa ta ama hmotaopa cha hmô ta, ama moleina lâpi amâ heihsaipa a hmô nahta, ama chô liata tao awpa ta a reipa chhiena cha patlôsa khao lei awpa ta a palôh panano ta, tao khao vei.