ZAWNA 2 - Mara Bible RV (BSI)

Zawna thlahchhâna

¹ Zawna cha nga py chhôh tawhta Abeipa a Khazohpa lâ thlahchhâ ta,

² “Nôpopa ta Abeipa pado na ta, Ano ta eina chyh-ei; Athihkhih py chhôh tawhta awh na ta, Ei ao na thei.

³ Ti athupa lâ na thy chi ta, Tilaipi ry lâ eina thy ha chi; Tipa-ua ta na chadô ta, Na tichatlaopa nata na tily zydua ta eina vao ei.

⁴ Chatawhcha kei ta, ‘Na mohmô tawhta thypa châ na ta, Chatanachôta nâ chhyna o pathaihpa lâ Ei sai heih aw,’ tah na ta.

⁵ Ei hrona la awpa ta tizy ta eina vao ei; Ti athupazy ta na chadô ei ta, Sipopazy ta ei luh ama pahly.

⁶ Tlâhpizy thaby lâ zu na ta, Alei ta leitlâhzy hmâpa ta, Chhâzaw ta eina hraikhôh haw; Chatanachôta Hy Abeipa ei Khazohpa, Ei hrona cha khaohtlô tawhta na thaoh haw.

⁷ Ei hrona a chhâ hai no ta, Abeipa cha a thei na ta, Ei thlahchhâna nâ lâ vaw tlô ta, Na Achhyna o pathaihpa lâ a vaw tlô.

⁸ Hraoleipa nothlahpa a chhytuhpazy cha, Ama ngâchhihna ama pahlei tyh.

⁹ Kei deikua cha alyna ao chhaota Atheihna cha hlâ aw na ta, Bie ei taih hapa cha ei pie aw. Pachhana cha Abeipa eih a châ,” tah ta.

¹⁰ Chatawhcha Abeipa ta nga cha biepie ta, nga ta Zawna cha ngiahkâ lâ vaw pali ha ta.