ZAWHÂNA 7 - Mara Bible RV (BSI)

Zisu unawhzy zo leina

¹ Cha khai tawhta Zisu cha Kâlili râh chahryh ta. Zuzy ta thie amâ chhuahpa vâta, Zudia râh deikua chahryh a chhuah vei.

² Zuzy Byureih Kyhchhi cha a hnia ha ta.

³ A unawhzy ta “He tawhta pua la, na pachupazy ta na hmotaopazy ama hmô thei nawpa ta, Zudia râh lâ sie mah y.

⁴ Moh pathâh a khohpa ta arulâta hmo tao beih vei. He hmozy he na tao tlôh khiahta cha, khizawpi hmô awpa ta tlao tao mah y,” tah ei ta.

⁵ A unawhzy chhao ta Zisu cha a ngiapâ leipa ei ta.

⁶ Zisu ta ama hnohta, “Ei daihti tlô mâh vei, nâmo daihti deikua cha khatino rai ta a tlô thlâh haw.

⁷ Khizaw ta nâmo cha châ hao thei vei, kei deikua cha einâ hao, a hmotaopazy a moleizie ei palâhâhpa vâta.

⁸ Kyhchhina lâ cha nâmo khy teh u. Kei deikua la, ei daihti â ki pathlah mâh leipa vâta, kyhchhina lâ cha khy mâh aw va na,” tah ta.

⁹ Cha biezy cha ama hnohta reih ta, ano cha Kâlili liata y ha ta.

Zisu Byureih Kyhchhi a chay

¹⁰ Châhrasala a unawhzy kyhchhina lâ ama khy khai tawhta, ano chhao vâtlâh pahno leipa ta arulâta khy hra ta.

¹¹ Zuzy ta kyhchhina liata ano cha tlua ei ta, “Khataih liata a y haw?” tah ei ta.

¹² Ano kyh liata zawpi a chiaburâh hôlô ei ta. Thokha ta, “Chyhsa phapa a châ,” tah ei ta, thokha ta, “Châ bao va, zawpi a siekheichheipa a châ,” tah ei ta.

¹³ Châhrasala Zuzy ama chipa vâta, ahy hmahta â lâhâhpa ta a thâtih rei ngâh veih ei.

¹⁴ Kyhchhi locho nota Zisu cha Achhyna o lâ khy ta, pachu ta.

¹⁵ Zuzy ta, “He chyhsa he, châ a chu beih tlôh leipa ta, kheihtazieta ma thaina he a hnei tly?” tah ei ta, ama noâh kaw ta.

¹⁶ Zisu ta âmo cha a chhy ta, “Ei bie pachupa he kei eih châ vei, nâ tuahtuhpa eih a châ.

¹⁷ Ahy rai Khazohpa khopa a tao khohpa a châ khiahta cha, ei bie pachupa he Khazohpa tawhtapa ma, keima tao chhyhpa a reihpa ma ei châ tahpa a pahno aw.

¹⁸ Ano tao chhyhpa bie a reihpa cha ano rônahna a tluapa a châ. A tuahtuhpa rônahna a tluapa deikua cha, chyhsa dopa châ ta, ano liata adoleina rai y vei.

¹⁹ Mawsi ta ryhpa cha pie ha veih ei ma? Châhrasala ryhpa cha ahy hmahta zyh tlôh ei chi va. Khazia thie einâ chhuah ei chi?” tah ta.

²⁰ Zawpi ta a chhy ei ta, “Ahripa azopa na châ he! Ahy ma thie châ chhuah?” tah ei ta.

²¹ Zisu ta âmo cha a chhy ta, “Hmo miakha tao na ta, nama zydua ta nama noâh ta.

²² Cha vâna chata Mawsi ta chopawtaina kyh kha cha pie ei ta, Pahânoh ta chopaw nama tai tyh. Chopawtaipa he Mawsi tawhta a puapa châ leipa ta, pathlatuhzy tawhta a puapa tlao a châ.

²³ Mawsi piepa chopawtaina ryhpa cha parao lei nawpa ta, Pahânoh chhao ta chopawtaipa a châ khiahta cha, Pahânoh ta chyhsa ei patlâhpa vâta, khazia ei chô liata nama pathi a ia?

²⁴ Chôpho lâ alânazie ta pachia leipa u la, pachiana dopa ta pachia teh u,” tah ta.

He chyhsa he Mesia a châ thei aw ma?

²⁵ Zerusale chyhsa thokha ta, “He chyhsa he thie amâ chhuahpa kha châ vei ma?

²⁶ Moh tua u, riahpha kawpa ta bie reih ta, a hnohta khâpa hmah reih tlôh ei va! Ano he Mesia cha a châ tlai tahpa biehneituhpazy ta ama pahno pasia hapa ma a châ tly?

²⁷ Châhrasala he chyhsa vaw puana cha pahno tlôh pi. Mesia cha â vaw luah tita, a vaw puana ahy hmahta pahno aw veih ei, tahpa châ tlôh,” tah ei ta.

²⁸ Cha vâna chata Zisu cha Achhyna o liata a pachu nota, ao paro ngaitapa ta, “Na pahno ei chi ta, ei puana chhao nama pahno? Châhrasala keima rei ta a vypa châ va na. Nâ tuahtuhpa cha adopa châ ta, ano cha pahno veih ei chi.

²⁹ Kei deikua ta la ano cha ei pahno. Ano tawhta a vaw puapa châ na ta, ano ta a tuapa ei châ,” tah ta.

³⁰ Chatanachata patu a chhuah ei ta, châhrasala a daihti a tlô mâh leipa vâta, ahy hmahta Zisu cha hria thei veih ei.

³¹ Chatanachôta zawpi hluhpi ta Zisu cha a ngiapâ ei ta, “Mesia cha a vaw tlôpa rai châ sala, he chyhsa taopa hlâta hmonoâhpa hluh via a tao aw ma?” tah ei ta.

Zisu patu awpa ta vaituhpazy tuapa a châ

³² Zisu kyh liata zawpi a chiaburâhpa cha Phârisaihzy ta thei ei ta, chatanachata theihthai beizy nata Phârisaihzy ta Zisu patu awpa ta vaituhpazy tuah ei ta.

³³ Zisu ta, “Buakhata nama hnohta y via chy aw na ta, nâ tuahtuhpa lâ ei sie aw.

³⁴ Na tlua aw ei chi ta, na hmô aw veih ei chi. Ei yna lâ a vy thei aw veih ei chi,” tah ta.

³⁵ Zuzy cha âmo nata âmo ta, “Eima hmô thei lei nawpa ta, he chyhsa he khataih lâ ma a sie aw tly? Krikâh chyhsa paipatlapazy lâ siepa ta, Krikâh mo pachu â chhuahpa ma a châ tly?

³⁶ ‘Na tlua aw ei chi ta, na hmô aw veih ei chi,’ a tahpa nata, ‘Ei yna lâ a vy thei aw veih ei chi,’ a tahpazy he, khâpa kyh a reihpa ma a châ aw tly?” tah ei ta.

Hrona ti chavahzy

³⁷ Kyhchhi chhâna noh, noh rônahpa liata, Zisu cha a duah ta, ao paro ngaitapa ta awh ta, “Ahy rai a dâh a phi khiahta cha, kei lâ a vy sala doh mawh sy.

³⁸ Ahy rai nâ ngiapâpa cha, Biehrai ta a reipa hawhta, ‘Ti hrohpa chavahzy a chhôh tawhta a vaw loh aw,’” tah ta.

³⁹ Cha biezy cha ngiapâtuhpazy ta Thlahpa ama hnei awpa kyh a reina a châ. Zisu cha parônahsapa ta a y mâh leipa vâta, Thlahpa cha piepa châ mâh veih ei.

Zawpi hry liata achhaihna

⁴⁰ Cha biezy cha ama thei nahta, zawpi hry liata thokha ta, “He chyhsa he hrohsopa a châ tlai hih,” tah ei ta.

⁴¹ Ahropazy ta, “He he Mesia a châ,” tah ei ta. Thokha hropazy deikua ta, “Mesia cha ma Kâlili râh tawhta a vaw pua aw tly?

⁴² Mesia cha Dâvi pathla hry tawhta, Dâvi yna khih Bethlehe tawhta a vaw pua awpa a châ, tahpa ta Biehrai ta reih vei ma?” tah ei ta.

⁴³ Chatanachata zawpizy cha Zisu kyh liata py no ta a pachhaih ei ta.

⁴⁴ Thokha ta patu awpa khoh ei ta, châhrasala ahy hmahta Zisu cha hria veih ei.

Biehneituhpazy ngiapâleina

⁴⁵ Vaituhpazy cha theihthai beizy nata Phârisaihzy lâ a vaw lie ei ta, âmo ta vaituhpazy hnohta, “Khazia namâ vaw chhi vei?” tah ei ta.

⁴⁶ Vaituhpazy ta a chhy ei ta, “He chyhsa hawhta ahy hmah bie reih beih veih ei!” tah ei ta.

⁴⁷ Phârisaihzy ta ama hnohta, “Nâmo chhao, a cha dôvei ha hra khiah ei?

⁴⁸ Biehneituhpa nata Phârisaihzy hry tawhta ano a ngiapâpa ama y leipa he pahno veih ei chi ma?

⁴⁹ Ryhpa a pahno leipa zawpizy he chhiesapa ama châ,” tah ei ta.

⁵⁰ Nikadima, ama hry liata a hlao hrapa nata Zisu hnohta a sie hrapa ta, ama hnohta,

⁵¹ “Thaichâna bie pareisa ha tua leipa nata a hmotaopazy pahno ha tua leipa ta, eima ryhpa ta chyhsa thailei a pachâsa thei rai ma?” tah ta.

⁵² Âmo ta a chhy ei ta, “Nâ chhao cha Kâlili chyhsa châ hra khiah chi? Patuapalua la, pachâ tua, Kâlili tawhta hrohsopa pua beih veih ei tahpa pahno châh chi,” tah ei ta.

⁵³ Chatanachata ama o chyu lâ a di ha ei ta.