ZAWHÂNA 6 - Mara Bible RV (BSI)

Sâh pangawh rih a pabie

¹ Cha hnôhlâ ta Zisu cha Kâlili Tipo haosâ lâ sie ta, cha tipo cha Taibiria Tipo tahpa a châ hra.

² Tlâhleipazy chô liata hmonoâhpa a taopazy ama hmôpa vâta, zawpi hluhpi ta ano cha zi ei ta.

³ Zisu cha tlâh lâ kiah ta, cha liata a pachupazy hnohta a tyuh ta.

⁴ Zuzy Zawpakhô kyhchhi cha a hnia ha ta.

⁵ Mohmia pasaih ta, zawpi hluhpi ano lâ ama vaw pangaipa hmô ta, Phili hnohta, “He sahlaozy nie awpa viahchhâ khataih liata eima chalei aw?” tah ta.

⁶ Cha bie cha Phili pasia nawpa ta a reipa a châ, a tao awpa cha pahno thlâh ha ta.

⁷ Phili ta a chhy ta, “Chyhsa to ta a chyhta sai ama to awpa châta chhao, tâkâ dinâri za no mâ viahchhâ ta a daih aw vei,” tah ta.

⁸ A pachupazy hry liata pakha, Saimaw Pity unawhpa Adaru ta a hnohta,

⁹ “Bâli viahchhâ tlâ pangawh nata ngasa miano a hneipa chapaw hawti pakha he liata y ta, châhrasala he zie zydua hry liata, chazy cha khâpa didâh châ aw vei,” tah ta.

¹⁰ Zisu ta, “Zawpizy cha patyusa teh u,” tah ta. Cha liata sibiepa su kawhpa y ta. Chyhsazy cha a tyuh ei ta, ama zydua ta sâh pangawh rachhôh ama châ.

¹¹ Zisu ta viahchhâ cha la ta, alyna bie a rei khai nahta, a tyuhpa sahlaozy cha rai ta. Ngasazy chhao ama khona zie ta rai ta.

¹² Ama rihbiena taih ama nie khai tawhta, a pachupazy hnohta, “Khâpa hmah lei lei awpa ta, nie laibâhpa azôhpazy a huah khai ha teh u,” tah ta.

¹³ Nie laibâhpazy cha a huah ei ta, bâli viahchhâ tlâ pangawh a niepazy nie laibâhpa zôhpazy cha, hrâbyh byh hrawh hleino tlai a huah ei ta.

¹⁴ Zawpizy ta hmonoâhpa a taopa ama hmô nahta, “He chyhsa he khizaw lâ a vy awpa Hrohsopa a châ tlai hih!” tah ei ta.

¹⁵ Ano cha a chhi raruah ta, abei pachâsa awpa ta a vy amâ chhuah tahpa Zisu ta a pahno nahta, ano dei ta tlâh lâ kiah ha ta.

Ti chô liata Zisu a sie

¹⁶ Zâlâ a vaw châ nahta, a pachupazy tipo lâ zu ei ta.

¹⁷ Balyh kiah ei ta, haosâ lâta Kâpynia khih pangaipa ta tipo liata sie ei ta. Vaw zoh ha ta, Zisu cha âmo lâ vaw tlô mâh leipa ta.

¹⁸ Thlihpi ru ngaitapa a pathlipa vâta tipo cha thata a chatlao ta.

¹⁹ Me thôh me palih rachhôh balyh ama hia tawhta, Zisu cha tipo chô liata phei ta vaw siepa ta, balyh lâ â vy haipa hmô ei ta, chi ngaita ei ta.

²⁰ Zisu ta ama hnohta, “Keima na ei châ, chi khah u,” tah ta.

²¹ A ly kawpa ta balyh liata pakiasa ei ta, balyh chhao cha ama pangaipa râh thlai tlô pâ ha ta.

Zawpi ta Zisu ama tlua

²² A mylâ ta tipo hesâ lâta zawpi a nguapazy ta haosâ liata balyh miakha deita a ypa kei hmô ei ta. Zisu cha a pachupazy hnohta balyh lâ a ngia leipa ta, a pachupazy cha âmo dei ta ama sie tahpa pahno ei ta.

²³ Abeipa ta alyna bie a rei khai nahta viahchhâ ama niena su kiapâh liana kha Taibiria balyh hropazy vaw tlô ei ta.

²⁴ Zawpi ta Zisu nata a pachupazy balyh liata ama y leipa ama hmô nahta, âmo chhao balyhzy liata kiah ei ta, Zisu tlua awpa ta Kâpynia lâ sie ha hra ei ta.

Zisu hrona viahchhâ

²⁵ Tipo haosâ liata ama kei hmô nahta, a hnohta, “Râbai, khatita helâ nâ vy?” tah ei ta.

²⁶ Zisu ta âmo cha a chhy ta, “Hmeiseihta ta, hmeiseihta ta ei cha chho ei, hmonoâhpazy nama hmôpa vâta nâ tluapa châ leipa ei chi ta, viahchhâ nie ei chi ta, nama py biepa vâta nâ tluapa tlao nama châ.

²⁷ Pati a leilô theipa châta hria leipa u la, chhâzaw hrona taihta a y awpa pati, Chyhsa Sawchapawpa ta a cha pie awpa ei châta tlao hria teh u. Paw Khazohpa ta ano cha chahnao pa-i ha tlôh ta,” tah ta.

²⁸ Âmo ta a hnohta, “Khazohpa raizy a hriapa eima châ thei nawpa ta, khâpa eima tao aw?” tah ei ta.

²⁹ Zisu ta âmo cha a chhy ta, “Khazohpa raihria cha he he a châ, a tuapa he a ngiapâ teh u,” tah ta.

³⁰ Âmo ta a hnohta, “Hmô sih la eima cha zo thei nawpa ta, khâpa ngiana ma na tao aw? Khâpa hmo ma na tao aw?

³¹ ‘Ama nie awpa viahchhâ vârâh tawhta a pie ei’ tahpa ropa hawhta, mânâ kha miah pathlatuhpazy ta râhchawhpa liata ama nie tyh,” tah ei ta.

³² Zisu ta ama hnohta, “Hmeiseihta ta, hmeiseihta ta ei cha chho ei, vârâh tawhta viahchhâ kha Mawsi ta a cha piepa ei châ vei, ei Paw ta avâ tawhta viahchhâ hmeiseihpa a cha piepa ei a châ.

³³ Khazohpa viahchhâ cha vârâh tawhta a zupa, khizaw lâta hrona a pietuhpa a châ,” tah ta.

³⁴ Âmo ta a hnohta, “Abeipa, cha viahchhâ cha khâ miah pie mah y,” tah ei ta.

³⁵ Zisu ta ama hnohta, “Kei he hrona viahchhâ ei châ. Ahy rai kei lâ a vypa cha a nodi leipa aw ta, ahy rai nâ ngiapâpa cha a dâh phi beih aw vei.

³⁶ Châhrasala ei cha chho ha ei, na hmô ei chi ta, chatanachôta nâ ngiapâ veih ei chi.

³⁷ Paw ta eina piepa maih kei lâ amâ vy khai aw. Ahy rai kei lâ a vypa maih cha dytha cheita aw va na.

³⁸ Keima khopa tao awpa ta vârâh tawhta a zupa châ leipa na ta, nâ tuahtuhpa khopa tao awpa ta a zupa tlao ei châ.

³⁹ He he nâ tuahtuhpa khopa cha a châ, ano ta eina piepa zydua ahy hmah pahlei leipa aw na ta, noh chhâna noh liata ei pathyu aw ei.

⁴⁰ He he ei Paw khopa cha a châ, ahy rai Sawchapawpa hmô ta a ngiapâpa maih cha chhâzaw hrona hnei aw ei ta, noh chhâna noh liata ei pathyu aw ei,” tah ta.

⁴¹ “Kei he vârâh tawhta viahchhâ a zâ chôpa cha ei châ,” a tahpa vâta Zuzy ta a chô liata paphôh ei ta.

⁴² “He he Zawsi sawchapawpa Zisu kha châ vei mâ? A nô nata a paw eima pahnopa kha châ vei ma? Tahmâ kheihtazieta ma, ‘Vârâh tawhta a zâ chôpa ei châ,’ a tah tly?” tah ei ta.

⁴³ Zisu ta âmo cha a chhy ta, “Nâmo nata nâmo liata paphôh ngâ khah u.

⁴⁴ Nâ tuahtuhpa Paw ta a sy vei khiahta la, ahy hmah kei lâ a vy thei aw veih ei. Kei lâ a vypa cha noh chhâna noh liata ei pathyu aw.

⁴⁵ Hrohsopazy châbu liata, ‘Khazohpa pachupa ta ama y khai aw,’ tahpa ropa a châ. Paw bie thei ta, a chupa maih cha kei lâ amâ vy tyh.

⁴⁶ Khazohpa tawhta a zâ chôpa dei leipa ta cha, ahy hmah Paw hmô beih veih ei. Ano cha Paw a hmôpa a châ.

⁴⁷ Hmeiseihta ta, hmeiseihta ta ei cha chho ei, ahy rai a ngiapâpa cha chhâzaw hrona a hnei haw.

⁴⁸ Kei he hrona viahchhâ ei châ.

⁴⁹ Châ pathlatuhpazy kha râhchawhpa liata mânâ ama nie tyh, châhrasala ama thi pyly.

⁵⁰ He he vârâh tawhta viahchhâ a zâ chôpa cha a châ, chyhsa ta nie sala a thi lei nawpa ta.

⁵¹ Kei he vârâh tawhta viahchhâ hrohpa a zâ chôpa ei châ. Ahy rai he viahchhâ he a nie khiahta cha, chhâzaw ta a hroh thlâh ha aw. Khizaw hro nawpa ta ei pie awpa viahchhâ cha ei sapa he a châ,” tah ta.

⁵² Cha biezy vâta Zuzy cha âmo nata âmo a eichhia ei ta, “He chyhsa heta kheihta ma a sapa cha nie awpa ta miah a pie thei aw?” tah ei ta.

⁵³ Zisu ta ama hnohta, “Hmeiseihta ta, hmeiseihta ta ei cha chho ei, Chyhsa Sawchapawpa sapa niepa ta a thisaih nama doh leipa khiahta cha, nâmo liata hrona hnei veih ei chi.

⁵⁴ Ahy rai ei sapa nie ta, ei thisaih a dohpa cha chhâzaw hrona a hnei haw, noh chhâna noh liata ano cha ei pathyu aw.

⁵⁵ Ei sapa he pati hmeiseihpa châ ta, ei thisaih he do awpa hmeiseihpa châ tlôh ta.

⁵⁶ Ahy rai ei sapa nie ta, ei thisaih a dohpa cha, keima liata a y thlâh ha tyh, kei chhao ano liata ei y thlâh ha tyh.

⁵⁷ A hroh thlâhpa Paw ta na tuah ta, Paw zawhzi ta a hrohpa ei châpa hawhta, ahy rai nâ niepa cha, keima zawhzi ta ano chhao a hroh aw.

⁵⁸ He he vârâh tawhta viahchhâ za chôpa a châ. Pathlatuhpazy ta nie ei ta, ama thi pylypa viahchhâ hawhpa kha châ vei. He viahchhâ a niepa cha chhâzaw ta a hroh aw,” tah ta.

⁵⁹ Cha biezy cha, Zisu ta Kâpynia liata a pachu nota, pakhyna o liata a reipa biezy a châ.

Tlyzaw hrona biezy

⁶⁰ A pachupa hluhpizy ta cha bie cha ama thei nahta, “He he bie ru ngaitapa a châ, ahy ma a nathlie thei aw?” tah ei ta.

⁶¹ Cha bie kyh liata a pachupazy ama paphôh ngâpa a pahno nahta, Zisu ta ama hnohta, “He kyh liata palôh châ leipa ta nama y ma?

⁶² Chyhsa Sawchapawpa he a y tuana lâ a kiapa a hmôpa châ u la, kheihta nama tah aw?

⁶³ Hrona pietuhpa cha Thlahpa a châ, sapa cha phahnaina hnei vei. Nama hnohta bie ei reipazy he Thlahpa châ ta, hrona chhao a châ.

⁶⁴ Châhrasala nama hry liata thokha a zo leipa nama y,” tah ta. Ahyzy ma a zo veih ei, ahy ma a patusa aw, tahpazy cha Zisu ta athaona tawhta a vaw pahno chhielie hapa a châ.

⁶⁵ Chavâta ama hnohta, “Cha vâna tlai chata nama hnohta, Paw ta a bao leipa ta cha, ahy hmah kei lâ a vy thei aw veih ei, ei tahpa kha a châ,” tah ta.

⁶⁶ Cha rakha tawhta cha, a zituhpa hluhpi ta kuasai ei ta, a hnohta sie khao leipa ei ta.

⁶⁷ Zisu ta pahrawh hleinozy hnohta, “Nâmo chhao na siesai awpa nama khoh hra ma?” tah ta.

⁶⁸ Saimaw Pity ta a chhy ta, “Abeipa, ahy lâ ma eima sie aw, nâ cha chhâzaw hrona bie a hneipa châ chi ta,

⁶⁹ keimo chhao ta châ ngiapâ pi ta, Khazohpa Mopathaihpa na châ tahpa eima pahno haw,” tah ta.

⁷⁰ Zisu ta ama hnohta, “Nâmo pahrawh hleinozy chi he, keima ta ei châ tlyhpa châ veih ei chi ma? Châhrasala nama hry liata pakha cha ahripa a châ,” tah ta.

⁷¹ Saimaw Iskari sawchapawpa Zudâh, pahrawh hleinozy hry liata a hlao hrapa ta, ano a patusa nawpa kyh a reipa a châ.