ZAWHÂNA 5 - Mara Bible RV (BSI)

Tipo liata patlâhna

¹ Cha hnôhlâ ta Zuzy kyhchhi miakha y ta, Zisu cha Zerusale lâ khy ta.

² Zerusale liata Mietaku Ochhi kiapâh liata tipo y ta, cha cha Hebrai reih ta Bethesdâ tah ei ta, okah miapangawh a hneipa a châ.

³ Chazy liata tlâhleipa hluhpi, mochaopazy, pheisypazy nata asihpazy a zia ei ta. Ti chatlaopa hâ tyh ei ta.

⁴ Daihti raopa liata, Abeipa vâlyuhchâpa cha tipo lâ a zupa ta, ti cha chatlaosa tyh ta. Ti â chatlao khai tawhta tipo liata â ny tuachaipa cha, kheihawhpa pasana rai patlâhpa a châ tyh.

⁵ Cha liata kô sythôh nata kô charie a pasapa chyhsa pakha y ta.

⁶ Cha liata â ziapa cha Zisu ta hmô ta, cha hawhta bohpi a y hapa a pahno nahta, a hnohta, “Patlâh na khoh ma?” tah ta.

⁷ Tlâhleipa chata a chhy ta, “Pâpuh, ti â chatlao nahta, tipo liata nâ ny awpa hnei leipa na ta, ei vaw hai nota mohropa ta eina chhao ha tyh ei,” tah ta.

⁸ Zisu ta a hnohta, “Thyu la, na hmohphaw la la, phei ta sie teh,” tah ta.

⁹ Cha chyhsa cha thlai vaw tlâh ha ta, a hmohphaw la ta, sie ha ta. Cha noh cha Pahânoh châ ta.

¹⁰ Zuzy ta a tlâh hapa hnohta, “Pahânoh a châ hih, na hmohphaw la awpa ta ryhpa ta pasaih vei,” tah ei ta.

¹¹ Ano ta âmo cha a chhy ta, “Nâ patlâhtuhpa ano tlai ta ei hnohta, ‘Na hmohphaw la la, phei ta sie teh,’ eina tah,” tah ta.

¹² Âmo ta a hnohta, “‘Na hmohphaw la la, phei ta sie teh,’ châ tahtuhpa cha ahy maw?” tah ei ta.

¹³ Châhrasala chyhsa a tlâh hapa ta a patlâhtuhpa cha ahy ma a châ tahpa pahno leipa ta, cha liata zawpi ama hluhpa vâta, Zisu hra cha sie ha ta.

¹⁴ A noh hropa ta Zisu ta ano cha Achhyna o liata hmô ta, a hnohta, “Moh teh, na tlâh ha hih! Molei khao khah y. Chataleipatala hmopha lei viapa na chô liata a vaw tlô pathlei aw na,” tah ta.

¹⁵ Cha chyhsa cha sie ta, a patlâhtuhpa cha Zisu a châzie Zuzy kei chho ta.

¹⁶ Pahânoh ta cha hawhpa hmozy cha a taopa vâta, Zuzy ta Zisu cha taolapa ta, thie a chhuah ei ta.

¹⁷ Zisu ta âmo cha a chhy ta, “Ei Paw cha tahmâ taihta rai hria lymâ ta, kei chhao ei hria lymâ hra,” tah ta.

¹⁸ Cha vâna chata Zuzy ta Zisu cha thie a chhuah via rili ei ta. Pahânoh a paraopa vâ dei châ leipa ta, Khazohpa cha “Ei paw” tah ta, Khazohpa tlu ta â taopa vâta a châ hra.

Sawchapawpa biehneina

¹⁹ Zisu ta ama hnohta, “Hmeiseihta ta, hmeiseihta ta ei cha chho ei, Sawchapawpa ta ano rei sai ta khâpa hmah tao thei vei. Paw hmotaopa a hmôpa deita a tao tyh. Paw ta a taopa maih cha, Sawchapawpa chhao ta a tao tyh.

²⁰ Paw ta Sawchapawpa kyh pachâ ta, a hmotaopa maih a pahmô tyh. Chazy hlâta hmotao rônah viapa chhao pahmô aw ta, nama no a âh ngaita aw.

²¹ Paw ta athihpazy pathyu ta, a pahropa hawhta, Sawchapawpa chhao ta a khopa maih a pahro tyh.

²² Paw ta ahy hmah pachia vei, pachiana zydua cha Sawchapawpa hnohta a pie khai haw.

²³ Chatanachata chyhsa zydua ta Paw ama zapa hawhta, Sawchapawpa chhao ama za hra aw. Ahy rai Sawchapawpa a za leipa cha, ano tuahtuhpa Paw a za leipa a châ.

²⁴ Hmeiseihta ta, hmeiseihta ta ei cha chho ei, ahy rai ei bie thei ta, nâ tuahtuhpa a ngiapâpa cha, chhâzaw hrona a hnei haw. Thailei pachâsapa châ leipa aw ta, thina tawhta hrona lâ tlao â ngia haw.

²⁵ “Hmeiseihta ta, hmeiseihta ta ei cha chho ei, a daihti a vaw tlô daihmâ, tahmâ chhao a vaw tlô haw. Cha tita athihpazy ta Khazohpa Sawchapawpa ao thei aw ei ta, a theipa maih ama hroh aw.

²⁶ Paw cha hrona hnawh a châpa hawhta, Sawchapawpa chhao hrona hnawh châ awpa ta a tao.

²⁷ Chyhsa Sawchapawpa a châpa vâta, a hnohta pachiana biehneina a pie.

²⁸ Chazy cha nama noâh khah sy, a daihti a tlô daihmâ. Cha tita thlâ liata a ziapa zydua ta a ao thei aw ei ta,

²⁹ ama kaw thyu khai aw. Hmopha a taopazy cha hrona to awpa ta thyu aw ei ta, moleina hmo a taopazy deikua cha, thailei châ awpa ta ama thyu aw.

Zisu pahnokheituhpazy

³⁰ “Keima kho ta khâpa hmah tao thei va na. Nah ta ei theipa hawhta pachia na ta, ei pachiana cha â do, keima rei sai ta y a chhuah leipa na ta, nâ tuahtuhpa rei sai ta y ei chhuahpa vâta.

³¹ Ei thâtih he kei deita pahnopa a châ khiahta cha, ei thâtih ei pahnosapa cha a do aw vei.

³² Ei thâtih nâ pahnokheituhpa pakha y ta, ei thâtih a pahnopa cha â do tahpa ei pahno.

³³ Zawhâna lâ chyhsa tuah ei chi ta, ano ta bie hmeiseihpa pahnokheina bie a vaw reih haw.

³⁴ Pahnokheina ei daopa kha, chyhsapa tawhta ei daopa châ leipa ta, pachha nama châ thei nawpa ta, cha biezy cha ei reipa a châ.

³⁵ Zawhâna kha meiôh khaihpa nata khaih ngaitapa châ ta, a khaihna ry liata thaphapa ta y chy awpa nama khoh kaw.

³⁶ Châhrasala pahnokheina ei hneipa he Zawhâna pahnokheina hlâta rônah viapa a châ.

³⁷ Nâ tuahtuhpa Paw cha ei thâtih nâ pahnokheituhpa a châ. A ao thei beih leipa ei chi ta, a hmia hmô beih hra veih ei chi.

³⁸ A tuapa namâ ngiapâ leipa vâta, a bie chhao nama palôh liata a vao veih ei chi.

³⁹ Biehrai bie nama tlua tyh, a chhôh liata chhâzaw hrona a y tahpa nama pangiasapa vâta. Cha Biehrai tlai cha nâ pahnokheituhpa a châ.

⁴⁰ Chatanachôta hrona hnei awpa ta kei lâ a vy khoh veih ei chi.

⁴¹ Chyhsapa palyupalihna a pyh va na.

⁴² Nâmo deikua cha ei cha pahno ei, nâmo liata Khazohpa kyhpachâna hnei veih ei chi.

⁴³ Ei paw moh ta a vy na ta, nâ pyh veih ei chi. Mohropa la ano moh ta a vy sala, namâ pyh aw.

⁴⁴ Nâmo nata nâmo a reithai raihrie ei chi ta, Khazohpa hmeiseihpa a y chhôhpa tawhta â vypa reithaina hmâchhâh nama tlua vei khiahta cha, kheihta namâ ngiapâ thei aw?

⁴⁵ Kei ta Paw lâ ei cha leih awpa ei pangiasa khu vy. Nâmo châ leihtuhpa pakha a y, nama ngâpa Mawsi khawh.

⁴⁶ Mawsi nama zo khiahta cha, kei chhao eina zo awpa ei chi a châ. Mawsi cha keima thâtih a rohpa a châpa kha.

⁴⁷ Mawsi bie ropazy nama zo vei khiahta cha, kheihta ei biezy nama zo thei aw?” tah ta.