ZAWHÂNA 20 - Mara Bible RV (BSI)

Thyuheihna

¹ Hâta noh hmiatua chaipa liata, Mâri Mâdali cha mydi khih a pavâ hlâta thlâ lâ vawh ta, alô cha thlâ tawhta â pasie hapa hmô ta.

² A râ ta, Saimaw Pity nata pachupa hropa Zisu ta kyh a pachâpa lâ vawh ta, ama hnohta, “Abeipa kha thlâ tawhta thaoh ha ei ta, khataih liata ma ama pazia tahpa pahno khao ma pi,” tah ta.

³ Pity cha pua ta, pachupa hropa chhaota thlâ lâ pangai ei ta.

⁴ A râ khoh ei ta, pachupa hropa ta Pity cha chhao ta, thlâ cha tlô tua ta.

⁵ A bôh ta, moh ta, poh rihdipazy cha a y thlâh hapa ta hmô ta, châhrasala a chhôh lâ a ngia leipa ta.

⁶ Saimaw Pity chhao a hnôh lâta vaw tlô ta, thlâ chhôh lâ a ngia ta, poh rih dipazy cha a y thlâh hapa ta hmô ta.

⁷ A luh liata hruna poh a ypa deikua cha, poh rih dipazy hry liata y leipa ta, chaty chiehpa ta su hro liata a ypa hmô ta.

⁸ Pachupa hropa, thlâ a tlô tuapa chhao kha a ngia hra ta, hmô ta, zo ha ta.

⁹ Athihpa hry tawhta a thyu heih awpa a châ tahpa Biehrai bie ama pahno mâh leipa vâta ama zo leipa a châ.

¹⁰ Chatanachata pachupazy cha ama o lâ chyu a di ha ei ta.

Mâri Mâdali hnohta Zisu â luah

¹¹ Mâri cha thlâ khôtho liata chana chôta a duah ta, chana chôta a bôh ta thlâ chhôh lâ za moh ta.

¹² Vâlyuhchâpa pano poh diehpa a bupa ta, Zisu ri paziana su liata, pakha a luh lâta, pakha a phei lâta amâ tyuh thlâh hapa za hmô ta.

¹³ Âmo ta a hnohta, “Chanô, khazia na cha?” tah ei ta. Ano ta ama hnohta, “Ei Beipa siekhei ha ei ta, ama paziana pahno khao va na,” tah ta.

¹⁴ Cha bie cha a rei khai nahta, a hnôh lâ a heih ta, Zisu cha a vaw duah thlâh ha ta, châhrasala Zisu a châ tahpa pahno leipa ta.

¹⁵ Zisu ta a hnohta, “Chanô, khazia na cha? Ahy na tlua?” tah ta. Sadô mokhâhtuhpa khiah ma tah ta, a hnohta, “Pâpuh, Zisu ri kha na la hapa a châ khiahta cha, khâpa su liata ma na so tahpa na chho teh, ei la pakhua ha aw,” tah ta.

¹⁶ Zisu ta a hnohta, “Mâri,” tah ta. Mâri cha a vaw heih ta, a hnohta Hebrai reih ta, “Râbawni!” tah ta, cha cha Pachutuhpa tahna a châ.

¹⁷ Zisu ta a hnohta, “Na patu khah y, Paw lâ kiah mâh va na. Ei unawhzy lâ vawh la, ama hnohta, ‘Ei Paw nata nama Paw, ei Khazohpa nata nama Khazohpa lâ ei kiah aw,’ a tah na tahpa ta kei chho mah y,” tah ta.

¹⁸ Mâri Mâdali cha vawh ta, pachupazy hnohta, “Abeipa cha ei hmô haw,” tah ta, Zisu ta a hnohta bie a reipazy cha âmo chho ta.

A pachupazy hnohta Zisu â luah

¹⁹ Cha noh, hâta noh hmiatuapa zâlâ ta, Zuzy chipa vâta pachupazy yna ochhizy cha khaw ei ta. Zisu cha a vy ta, ama hry liata a vaw duah ta, ama hnohta, “Nama chô liata thlalôhna y mawh sy,” tah ta.

²⁰ Cha bie cha a rei khai nahta, a ku nata a kâ zy âmo pahmô ta. Abeipa cha ama hmô nahta, pachupazy cha a ly ngaita ei ta.

²¹ Zisu ta ama hnohta, “Nama chô liata thlalôhna y mawh sy. Paw ta kei eina tuapa hawhta, kei ta nâmo ei cha tuah ei,” tah heih ta.

²² Cha biezy cha a rei khai nahta, âmo cha a hu so thlu ta, ama hnohta, “Thlahpa Pathaihpa hnei teh u.

²³ Chyhsa moleina namâ ngiahthaipa maih, a ngiahthaipa châ aw ei ta, chyhsa moleina namâ ngiahthai leipa maih, a ngiahthai leipa ama châ aw,” tah ta.

Thawma zo leina

²⁴ Zisu â vy nota, pahrawh hleinozy hry liata a hlao hrapa, Maphieh ama tahpa Thawma cha, ama hnohta y leipa ta.

²⁵ Pachupa hropazy ta a hnohta, “Abeipa eima hmô haw,” tah ei ta. Châhrasala ano ta ama hnohta, “A ku thua khaina hmahdawzy kha hmôpa ta, thua khaina hmahdawzy cha ei kudy ta hriapa ta, a kâ liata ei ku ei chapao ha tua leipa ta la, zo aw va na,” tah ta.

²⁶ Noh charie a châ tawhta, a pachupazy cha o chhôh liata y heih ei ta. Thawma chhao ama hnohta y hra ta. Ochhizy khaw hapa a châ tarawpa ta, Zisu cha a vy ta, ama hry liata a vaw duah ta, ama hnohta, “Nama chô liata thlalôhna y mawh sy,” tah ta.

²⁷ Thawma hnohta, “Na kudy ta vaw hria la, ei kuzy he moh tua. Na ku vaw paza la, ei kâ liata vaw chapao tua. Zo leipa ta y leipa la, zo mah y,” tah ta.

²⁸ Thawma ta a chhy ta, a hnohta, “Ei Beipa nata ei Khazohpa!” tah ta.

²⁹ Zisu ta a hnohta, “Nâ la eina hmôpa vâ chi ta a ngiapâpa châ chi ta, hmô leipa ta a ngiapâpazy cha ama nohlao na,” tah ta.

Zawhâna châbu ta â chhuahpa

³⁰ Zisu cha pachupazy hmiakô liata hmonoâh hropa hluhpi tao ta, chazy cha he châbu liata ropa châ vei.

³¹ Zisu cha Mesia, Khazohpa Sawchapawpa châ ta, ngiapâna vâta ano moh ta hrona nama hnei thei nawpa ta, he châbu he ropa a châ.