ZAWHÂNA 16 - Mara Bible RV (BSI)

¹ “Nama pao lei nawpa ta he biezy he nama hnohta ei reih.

² Pakhyna ozy tawhta cha papua aw ei ta, châ thiepa maihta Khazohpa chakaona rai a hriapa hawhta amâ pachâ nawpa daihti a vaw tlô hai.

³ Paw nata kei miah ama pahno leipa vâta, cha hawhpa hmozy cha ama tao aw.

⁴ Ama daihti a vaw tlô tita, ei cha chho chhieliepa ei a châpa namâ thei nawpa ta, he biezy he nama hnohta ei reih. “Nama hnohta ei ypa vâta, he biezy he âthaona tawhta cha chho veih ei na.

Thlahpa Pathaihpa raihria

⁵ Tahmâ deikua cha, nâ tuahtuhpa lâ ei sie aw. Châhrasala ahy hmahta, ‘Khataih lâ na sie aw?’ tahpa ta na hiahri veih ei chi.

⁶ He biezy he nama hnohta ei reipa vâta, nama pathipalôh cha pachârôhna ta a bie.

⁷ Chatahrasala, biehmeiseihpa ei cha chho ei. Ei sie awpa cha nama châta a pha. Ei sie vei khiahta cha, Thlapalôhtuhpa nâmo lâ a vy aw vei. Ei sie khiahta deikua cha, Thlapalôhtuhpa cha nâmo lâ ei vaw tuah aw.

⁸ Thlapalôhtuhpa a vaw tlô tita, khizaw he moleina kyh, siana kyh nata pachiana kyhzy liata a thaileichâna a pahnosa aw.

⁹ Moleina kyh liata ama thaileichâna cha, kei einâ ngiapâ leipa vâ ei ta a châ.

¹⁰ Siana kyh liata ama thaileichâna cha, Paw lâ sie aw na ta, eina hmô khao lei awpa vâ ei chi ta a châ.

¹¹ Pachiana kyh liata ama thaileichâna cha, khizaw ryureituhpa he a thâtih pachiapa a châ hapa vâta a châ.

¹² “Nama hnohta bie rei awpa hluhpi ei hnei. Châhrasala tahmâ la pahnie aw veih ei chi.

¹³ Biehmeiseihpa Thlahpa a vaw tlô tita, biehmeiseihpa zydua liata a châ chhi aw ei. Ano biehneina ta bie reih leipa aw ta, bie a theipa maih a cha chho aw ei. Hmo a vaw tlô awpazy chhao a cha pahnosa aw ei.

¹⁴ Kei eih la aw ta, nama hnohta a phuah awpa vâta, ano ta kei eina parônahsa aw.

¹⁵ Paw hmo hneipa zydua kei eih a châ. Chavâta, ‘Thlapalôhtuhpa ta kei eih cha la aw ta, a cha pahnosa aw ei,’ ei tahpa a châ.

Pachârôhna tawhta thaphana

¹⁶ “Buakha chhôh na hmô khao leipa aw ei chi ta, buakha chhôh lilaw ta, eina hmô heih aw ei chi,” tah ta.

¹⁷ A pachupa thokha ta, “Eima hnohta bie a reipa, ‘Buakha chhôh na hmô khao leipa aw ei chi ta, buakha chhôh lilaw ta eina hmô heih aw ei chi,’ a tahpa nata, ‘Paw lâta ei sie awpa vâta,’ a tahpa he khâpa ma a yzie?” tah ei ta.

¹⁸ Pachupazy ta, “‘Buakha chhôh’ a tahpa he khâpa ma a yzie? A bie reipa he a pachâna rai pahno ma pi,” tah ei ta.

¹⁹ Ano ama hiahri khoh tahpa Zisu ta pahno ta, ama hnohta, “‘Buakha chhôh na hmô khao leipa aw ei chi ta, buakha chhôh lilaw ta eina hmô heih aw ei chi,’ tahpa bie ei reipa kha ma nâmo nata nâmo namâ hiahri ngâ kaw?

²⁰ Hmeiseihta ta, hmeiseihta ta ei cha chho ei, nâmo cha, cha aw ei chi ta, chaphôh nama tu aw, khizaw deikua cha â ly aw. Pachârôhpa ta y aw ei chi ta, châhrasala nama pachârôhna cha thaphana lâta â lie aw.

²¹ Chanô cha nawh â zeih nota a pachâ a rôh tyh, a daihti a tlô hapa vâta. Châhrasala nawh a pih nahta, khizaw liata chyhsa a vaw pihpa cha â ly kawpa vâta, a pachârôhna a thei khao vei.

²² Cha hawhna chata nâmo chhao, tahmâ pachârôhpa ta y hra u la, cha hmô heih aw ei na ta, nama palôh a ly aw ta, namâ lyna cha ahy hmahta cha lapa aw veih ei.

²³ Cha noh liata cha, khâpa hmo hmah kei na hiah khao aw veih ei chi. Hmeiseihta ta, hmeiseihta ta ei cha chho ei, ei moh ta Paw lâ nama hiapa maih, Paw ta a cha pie aw ei.

²⁴ Tahmâ taihta ei moh ta khâpa hmah hiah mâh veih ei chi. Hiah teh u, nama hmô aw, chatanachata namâ lyna â ki aw.

Khizaw ei tiah haw

²⁵ “Cha biezy cha pakhona ta nama hnohta ei reipa a châ. Pakhona bie ta cha chho khao leipa ta, a siapa ta Paw thâtih nama hnohta ei rei nawpa daihti a vaw tlô hai.

²⁶ Cha noh liata, ei moh ta hmo hiah aw ei chi ta, kei ta Paw lâ ei cha hiapa aw ei, cha tah khao aw veih ei na.

²⁷ Ei kyh na pachâ ei chi ta, Paw tawhta a zupa ei châpa namâ ngiapâpa vâta, Paw ta kyh a cha pachâ ei.

²⁸ Paw tawhta vaw pua ta, khizaw liata a vypa ei châ. Tahmâ khizaw siesaipa ta Paw lâ ei di heih aw,” tah ta.

²⁹ A pachupazy ta, “Tahmâ la a siapa ta bie na reih haw, pakhona bie hmâh khao va chi!

³⁰ Ato pahno chi ta, chyhsa ta ama cha hiahri awpa byuh vei, tahpa tahmâ eima pahno haw. Cha vâna chata Khazohpa tawhta a zupa na châ tahpa eimâ ngiapâpa a châ,” tah ei ta.

³¹ Zisu ta âmo cha a chhy ta, “Tahmâ cha namâ ngiapâ ha ma?

³² Pachâ teh u, a daihti â hnia haw, tlao a vaw tlô haw. Cha tita la nama o chyu lâta pai khai aw ei chi ta, kei dei ta eina siesai aw ei chi. Châhrasala kei dei ta y va na, ei hnohta Paw a y.

³³ Keima liata thlalôhpa ta nama y thei nawpa ta, he biezy he nama hnohta ei reih. Khizaw liana heta riethei pasa taopa ta nama y aw. Châhrasala thlalôhpa ta y teh u, kei ta khizaw ei tiah haw,” tah ta.