ZAWHÂNA 15 - Mara Bible RV (BSI)

Zisu kre zôh hmeiseihpa

¹ “Kei kre zôh hmeiseihpa châ na ta, ei Paw sadô mohôhtuhpa a châ.

² Ei chiah a pathei leipa maih thy ta, a patheipa maih a pathai tyh, a pathei hluh rili nawpa ta.

³ Nama hnohta ei bie reipa vâta, tahmâ chhao nama pathaih haw.

⁴ Keima liata y thlâh ha teh u, kei chhao nâmo liata ei y thlâh ha aw. A chiah cha kre zôh liata a y thlâh ha leipa khiahta cha, ano dei ta a pathei thei leipa hawhta, nâmo chhao keima liata nama y thlâh ha leipa khiahta cha, pathei thei aw veih ei chi.

⁵ Kei kre zôh châ na ta, nâmo a chiahzy nama châ. Ahy rai keima liata y thlâh ha ta, kei chhao ano liata ei y thlâh hana chyhsa cha thei hluhpi a pathei tyh. Keima leipa ta khâpa hmah tao thei veih ei chi.

⁶ Keima liata a y thlâh ha leipa cha, a chiah hawhta thypa ta y ta, a uah tyh. A chiahzy cha pakhy ei ta, mei liata thypa ta, ama rao tyh.

⁷ Keima liata y thlâh ha u la, ei bie nâmo liata a y thlâh ha khiahta cha, nama khopa maih hiah teh u, nama châta taopa a châ aw.

⁸ Thei hluhpi pathei ei chi ta, ei pachupazy nama châpa nama palâsapa liana heta, ei Paw cha parônahsapa ta a y.

⁹ Paw ta kyh eina pachâpa hawhta, kei chhao ta kyh ei cha pachâ ei. Ei kyhpachâna liata y thlâh ha teh u.

¹⁰ Paw biepiepazy zyh na ta, a kyhpachâna liata ei y thlâhpa hawhna heta, nâmo chhao ei biepiepazy nama zyh khiahta cha, ei kyhpachâna liata nama y thlâh ha aw.

¹¹ Ei lyna nâmo liata y thlâh ha sala, namâ lyna â ki nawpa ta, he biezy he nama hnohta ei reipa a châ.

¹² “He he ei biepiepa cha a châ. Kei ta nama kyh ei cha pachâpa hawhna heta, nâmo chhao kyh a pachâ raihrie teh u.

¹³ Chyhsa ta a viasazy châta a hrona a piepa hleikhô ta kyhpachâna rônah viapa ahy hmahta hnei veih ei.

¹⁴ Bie ei cha piepa maih nama tao khiahta la, ei viasazy nama châ.

¹⁵ Chakaotuhpa cha tah khao aw veih ei na. Chakaotuhpa ta a zibeipa hmotaopa pahno vei. Viasazy tlao ei cha tah ei. Paw tawhta hmo ei pahnopa zydua nama hnohta ei phuah khai haw.

¹⁶ Nâmo ta nâ tlyh veih ei chi, kei ta tlao châ tlyh ei na ta, sie ta, thei pathei awpa nata khâ pathei awpa ta ei cha rao ei. Chatanachata ei moh ta Paw lâ nama hiapa maih a cha pie lymâ aw ei.

¹⁷ Kyh namâ pachâ raihrie thei nawpa ta, he biezy he ei cha pie ei.

Khizaw ta ahaona

¹⁸ “Khizaw ta a châ hao khiah ei ta cha, nâmo ama châ hao hlâta, kei einâ hao tua ei tahpa pahno teh u.

¹⁹ Khizawpa châ u la, khizaw ta ano eih hawhta kyh a cha pachâ aw ei. Châhrasala khizawpa châ leipa ei chi ta, khizaw tawhta ei tlyh papuapa nama châpa vâta, khizaw ta a châ hao ei.

²⁰ ‘Chakaotuhpa cha a zibeipa hlâta lai via vei,’ tahpa bie ei cha chhopa ei kha a thei thlâh ha teh u. Kei eina taola khiah ei ta cha, nâmo chhao ama cha taola aw. Ei bie ama zyh khiahta cha, nâmo bie chhao ama zyh aw.

²¹ Châhrasala nâ tuahtuhpa ama pahno leipa vâta, he hmo zydua he ei moh vâta nama chô liata ama tao aw.

²² Kei a vy leipa ta, ama hnohta bie reih leipa aw sah la, moleina vâta thaileichâpa ta ama y lei awpa tlai. Tahmâ deikua cha, ama moleina liata rei nawpa hnei khao veih ei.

²³ Ahy rai kei nâ haopa cha ei Paw a haopa a châ.

²⁴ Mohropa ahy hmah tao beih leipa hmozy ama hry liata tao lei paw sah la, moleina vâta thaileichâpa ta ama y lei awpa tlai. Tahmâ deikua cha, kei nata ei Paw miah hmô ha ei ta, eima pano ta miah amâ hao haw.

²⁵ Ama ryhpa châbu liata, ‘A chhâpa y leipa ta einâ hao ei,’ tahpa bie ropa kha a vaw tlô nawpa ta a châ.

²⁶ “Châhrasala Paw tawhta ei cha vaw tuapa awpa ei Thlapalôhtuhpa, biehmeiseihpa Thlahpa, Paw tawhta a puapa cha a vaw tlô tita, nâ pahnokheituhpa a châ aw.

²⁷ Nâmo chhao, âthaona tawhta ei hnohta a ypa nama châpa vâta, nâ pahnokheituhpa nama châ aw.