ZAWHÂNA 14 - Mara Bible RV (BSI)

Lâpi, biehmeiseihpa nata hrona

¹ “Nama pathipalôh nôpo khah sy. Khazohpa namâ ngiapâ na, kei chhao nâ ngiapâ hra teh u.

² Ei Paw o liata yna hluhpi a y. A y vei khiahta cha, ei cha chho ha awpa ei a châ. Nama châta su a chhuahdy awpa ta ei sie aw.

³ Nama châta su a chhuahdy awpa ta a sie awpa ei châpa vâta, vaw kua heih aw na ta, ei hnohta ei châ chhi aw ei. Chatanachata nâmo chhao ei yna liata nama y aw.

⁴ Ei sie nawpa pahno ei chi ta, a lâpi nama pahno,” tah ta.

⁵ Thawma ta a hnohta, “Abeipa, na sie nawpa pahno ma pi. A lâpi cha kheihta ma eima pahno thei aw,” tah ta.

⁶ Zisu ta a hnohta, “Kei he lâpi nata biehmeiseihpa nata hrona ei châ. Kei liata a sie leipa cha ahy hmah Paw kô tlô thei aw vei.

⁷ Kei he nâ pahnopa châ u la, ei Paw chhao nama pahno aw. Tahmâ tawhta deikua cha, Paw cha pahno ei chi ta, nama hmô haw,” tah ta.

⁸ Phili ta a hnohta, “Abeipa, Paw cha miah pahmô teh, cha cha eima châta â daih na,” tah ta.

⁹ Zisu ta a hnohta, “Phili, bohpi nama hnohta y na ta, na pahno to va chi ma? Ahy rai keima nâ hmôpa cha Paw a hmôpa a châ. Kheihtazieta, ‘Paw cha miah pahmô teh,’ na tah thlâh haw?

¹⁰ Kei Paw liata y na ta, Paw keima liata a ypa kyh cha zo va chi ma? Nama hnohta bie ei reipazy he, keima biehneina ta a reihpa châ va na, keima liata a ypa Paw ta rai a hriapa tlao a châ.

¹¹ Kei Paw liata ei y na ta, Paw keima liata a ypa kyh ei reipa he na zo teh u. Cha leipa chhao ta, ei hmo taopazy chhâ he cha zo teh u.

¹² “Hmeiseihta ta, hmeiseihta ta ei cha chho ei, ahy rai nâ ngiapâpa cha hmo ei taopazy he ano chhao ta a tao aw. Paw lâ ei sie awpa vâta, hezy hlâta hmo rônah viapa chhao a tao aw.

¹³ Paw cha Sawchapawpa liata parônahsapa ta a y thei nawpa ta, ei moh ta nama hiapa maih ei tao lymâ aw.

¹⁴ Khâpa rai ei moh ta nama hia khiahta cha, ei tao lymâ aw.

Thlahpa Pathaihpa â vy aw

¹⁵ “Kyh eina pachâ khiah ei chi ta cha, ei biepiepazy nama zyh aw.

¹⁶ Paw lâ hiah aw na ta, chhâzaw ta nama hnohta y awpa ta, Thlapalôhtuh hropa a cha pie aw ei.

¹⁷ Cha cha biehmeiseihpa Thlahpa, khizaw ta a hnei leipa a châ. Khizaw ta ano cha hmô leipa ta, pahno vei. Nâmo deikua ta cha, nama hnohta y ta, a y lymâ awpa vâta, ano cha nama pahno.

¹⁸ “Hârapa ta cha siesai aw veih ei na, nama hnohta ei vy heih aw.

¹⁹ Bohpi leipa tawhta khizaw ta na hmô khao aw vei, châhrasala nâmo la eina hmô aw ei chi. Kei ei hrohpa vâta, nâmo chhao nama hroh aw.

²⁰ Cha noh liata, kei ei Paw liata y na ta, nâmo keima liata y ei chi ta, kei nâmo liata ei y tahpa nama pahno aw.

²¹ Ahy rai ei biepiepazy hnei ta, a zyhpa cha, ano cha kyh nâ pachâtuhpa a châ. Ahy rai kyh nâ pachâpa cha ei Paw ta a kyh a pachâ aw. Kei chhao ano kyhpachâ aw na ta, a hnohta ei luah aw,” tah ta.

²² Zudâh, Iskari a châ leipa ta, a hnohta, “Abeipa, khazia keimo hnohta a luah aw chi ta, khizaw hnohta nâ luah aw vei?” tah ta.

²³ Zisu ta a chhy ta, “Chyhsa ta kyh eina pachâ khiahta cha, ei bie zyh aw ta, ei Paw ta ano cha kyhpachâ aw ta, ano lâ a vy aw pi ta, a hnohta eima pahrâ aw.

²⁴ Kyh nâ pachâ leipa chyhsa cha ei biepiepazy zyh vei. Bie nama theipazy he kei eih châ leipa ta, nâ tuahtuhpa Paw eih a châ.

²⁵ “Nama hnohta ei y chhôh ta he biezy he ei cha chho ei.

²⁶ Thlapalôhtuhpa, Paw ta ei moh ta a vaw tua awpa Thlahpa Pathaihpa chata, ato cha pachu aw ei ta, nama hnohta ei reipa zydua kha a cha patheisa heih aw ei.

²⁷ Thlalôhna cha sopa ei na ta, keima thlalôhna ei cha pie ei. Khizaw ta a piepa hawhta cha pie veih ei na. Nama pathipalôh nôpo leipa sala, chi hra khah sy.

²⁸ ‘Sie aw na ta, nâmo lâ ei vy heih aw,’ ei cha tahpa ei kha nama pahno. Paw cha keima hlâta rônah viapa a châpa vâta, kyh nâ pachâpa nama châ khiahta cha, Paw lâta ei sie awpa cha namâ ly awpa a châ.

²⁹ Cha hmo a vaw tlô tita nama zo nawpa ta, a vaw tlô hlâta tahmâ ei cha chho ei.

³⁰ He tawhta la nama hnohta bie reih hluh thei khao aw va na, khizaw ryureituhpa a vy tlôh aw ta. Ei chô liata biehnei taraw vei,

³¹ châhrasala Paw kyh ei pachâpa khizaw ta a pahno thei nawpa ta, Paw ta bie eina piepa hawhta ei taopa a châ. Thyu teh u, he su tawhta pua ei suh u.