ZAWHÂNA 13 - Mara Bible RV (BSI)

Pachupazy phei Zisu ta a pasi

¹ Zawpakhô kyhchhi hlâta, Zisu ta he khizaw he puasaipa ta Paw lâ a sie daihti a tlô haw tahpa a pahno nahta, a chyhsa khizaw liata a ypa kyh a pachâ tyhpazy cha, a chhâna taihta ama kyh pachâ ta.

² Ahripa ta Saimaw sawchapawpa Zudâh Iskari cha, Zisu patusa awpa pachâna a palôh liata soh ta. Chatanachata zâpati ama dôh nota,

³ Zisu cha Paw ta a ku liata hmo to a pavaosapa kyh nata Khazohpa tawhta a vaw puapa a châpa nata Khazohpa lâta a sie heih awpa a châpazy pahno thlâh ha ta.

⁴ Zâpati a dôhpa cha thyu ta, a viahkao pasipa pahluh ta, hruna poh la ta, a chai liata a saih ta.

⁵ Rahô liata ti patlai ta, pachupazy phei pasi pathao ta, hruna poh â saihpa chata ama pheizy hru lymâ ta.

⁶ Saimaw Pity ta ano kô a vaw tlô nahta, “Abeipa, nâ ngâsâ ta ei phei na pasi aw ma?” tah ta.

⁷ Zisu ta a chhy ta, “Ei hmotaopa he tahmâ pahno ngyu va chi, châhrasala noh hro ta na pahno aw,” tah ta.

⁸ Pity ta a hnohta, “Ei phei pasi beih aw va chi,” tah ta. Zisu ta a chhy ta, “Ei cha pasi vei khiahta la, kei liata tovyuh hnei va chi,” tah ta.

⁹ Saimaw Pity ta a hnohta, “Abeipa, chata a châ khiahta la, ei phei dei châ leipa ta, ei ku nata ei luh chhao sy!” tah ta.

¹⁰ Zisu ta a hnohta, “Ngaisi chiehpa cha a phei dei leipa cha pasi byuh vei, a pôhpa cha a pathaih thlâh haw. Nâmo chhao nama pathaih, nama zydua ta deikua châ vei,” tah ta.

¹¹ A patusatuh awpa a pahnopa vâta, “Nama zydua ta pathaih veih ei chi,” a tahpa a châ.

¹² Ama phei a pasi khai tawhta, a viahkao pasipa a ky ta, â tyuna liata a tyu heih ta, ama hnohta, “Nama chô liata ei hmotaopa he a yzie nama pahno ma?

¹³ Nâmo ta Pachutuhpa nata Abeipa na tah ei chi ta, nama reipa â do na, ei châna tlai a châ.

¹⁴ Kei, nama Beipa nata Pachutuhpa ta nama phei ei pasi khiahta cha, nâmo chhao nama phei namâ pasipa raihrie awpa a châ.

¹⁵ Nama chô liata ei taopa hawhta, nâmo chhao tao hra awpa ta, pamosana ei cha taopa ei.

¹⁶ Hmeiseihta ta, hmeiseihta ta ei cha chho ei, chakaotuhpa cha a zibeipa hlâta lai via vei, lyuhchâpa chhao a tuahtuhpa hlâta lai via vei.

¹⁷ Cha hmozy cha nama pahno khiahta cha, tao u la nama nohlao aw.

¹⁸ Nama zydua kyh reih va na. Ei tlyhpazy cha ei pahno ei. Châhrasala, ‘Ei viahchhâ a niepa ta a phei chakoh eina hy thlu,’ tahpa Biehrai kha a vaw tlô aw.

¹⁹ Tahmâ a vaw tlô hlâta ei cha chho ei, a vaw tlô tita, keima he ano cha ei châ tahpa namâ ngiapâ thei nawpa ta.

²⁰ Hmeiseihta ta, hmeiseihta ta ei cha chho ei, ahy rai ei tuapa a lypa cha, keima nâ lypa châ ta, ahy rai keima nâ lypa cha, nâ tuahtuhpa a lypa a châ,” tah ta.

A patusatuh awpa kyh Zisu ta a reih chhielie

²¹ Cha biezy cha a rei khai nahta, Zisu cha a thlahpa pachârôh ngaita ta, “Hmeiseihta ta, hmeiseihta ta ei cha chho ei, nama hry liata pakha ta eina patusa aw,” tah ta.

²² Ahy kyh ma a reih tahpa pahno leipa ei ta, pachupazy cha a moh chyu ei ta.

²³ Pachupazy hry liata pakha, Zisu ta kyh a pachâpa cha, Zisu kiapâh liata tlâhkhai dôhpa ta a tyuh ta.

²⁴ Saimaw Pity ta ano cha thliethlâpa ta, ahy kyh ma a reih tahpa Zisu cha pahiahrisa ta.

²⁵ Cha pachutuhpa cha a hnôhlâ a uah ta, Zisu chachôhna a hnieh ta, a hnohta, “Abeipa, ahy maw?” tah ta.

²⁶ Zisu ta a chhy ta, “Viahchhâ nypa ta ei piepa cha, ano cha a châ,” tah ta. Viahchhâ a ny khai nahta, Saimaw sawchapawpa Zudâh Iskari cha pie ta.

²⁷ Viahchhâ a pie khai nahta, Zudâh Iskari chhôh liata Sâtâ a ngia ta. Zisu ta a hnohta, “Na tao awpa cha tao para teh,” tah ta.

²⁸ Khâpa vâta Zisu ta cha bie cha Zudâh Iskari hnohta a reihpa ma a châ tahpa tlâhkhai liata a dôhpa ahy hmahta pahno leipa ei ta.

²⁹ Thokha ta, Zudâh cha tâkâ sahria a vaotuhpa a châpa vâta, “Kyhchhina châta hmo eimâ ngiahpa kei chalei teh,” a tahpa a châ na ta pangiasa ei ta, a châ vei khiah, dyhchhiepazy hnohta hmo pie awpa a chhopa a châ na ta ama pangiasa.

³⁰ Viahchhâ a dao khaipa nata, Zudâh cha thlai pua ta, cha nona cha zâ châ ha ta.

Biepiepa thiehpa

³¹ Zudâh a pua tawhta, Zisu ta, “Tahmâ cha Chyhsa Sawchapawpa parônahsapa ta a y haw, ano liata Khazohpa chhao parônahsapa ta a y.

³² Ano liata Khazohpa parônahsapa ta a y khiahta cha, Sawchapawpa chhao Khazohpa ta ano liata parônahsa aw ta, thlai a parônahsa aw.

³³ Sawnawh saih u, buakhata nama hnohta ei y chy. Na tlua aw ei chi ta, Zuzy hnohta, ‘Ei sie nawpa lâ a vy thei aw veih ei chi,’ ei tahpa hawhna khata, tahmâ nâmo hnohta chhao ei reih.

³⁴ Biepiepa thiehpa ei cha pie ei, kyh a pachâ raihrie teh u. Kei ta kyh ei pachâpa hawh ei ta, nâmo chhao kyh a pachâ raihrie teh u.

³⁵ Kyh namâ pachâ raihriepa liana chata, chyhsa zydua ta ei pachupazy nama châ tahpa ama pahno aw,” tah ta.

Pity apaphasaina kyh rei chhieliena

³⁶ Saimaw Pity ta a hnohta, “Abeipa, khataih lâ na sie aw?” tah ta. Zisu ta, “Tahmâ la ei sie nawpa lâ na zi thei aw va chi. Noh hro ta eina zi aw chi,” tah ta.

³⁷ Pity ta a hnohta, “Abeipa, khazia tahmâ chhao ei cha zi thei aw vei? Na châta ei hro ei hlâ aw,” tah ta.

³⁸ Zisu ta a chhy ta, “Keima châta na hro na hlâ aw mâ? Hmeiseihta ta, hmeiseihta ta ei cha chho, ei thôh einâ papha hlâlei chi cha awh khoh aw vei,” tah ta.