ZAWHÂNA 12 - Mara Bible RV (BSI)

Bethâni liata Zisu sathawthuna

¹ Zawpakhô kyhchhi vaw tlô nawpa noh charu byuh ta, Zisu cha athihpa hry tawhta a pathyupa Lâzarâh yna, Bethâni khih kei tlô ta.

² Cha liata ano châta zâpati taopa ei ta. Marthâ ta chakao ta, Lâzarâh deikua cha tlâhkhai liata Zisu pati dôhlâhpa pakha châ ta.

³ Mâri ta spinâ thaw ropahâh ngaitapa ôh kha vaw cheih ta, Zisu phei liata thu ta, a sâ ta a pheizy cha hru ta. O cha sathaw ropahâhpa ta bie khai ha ta.

⁴ Châhrasala Zudâh Iskari, a pachupa pakha, a patusatuh awpa ta,

⁵ “Khazia ma he sathaw ropahâhpa he dinâri za thôh ta zuapa ta chyhsa dyhchhiepazy piepa tlao a châ vei?” tah ta.

⁶ Chyhsa dyhchhiepazy a pachâpa vâta châ leipa ta, parupa châ ta, tâkâ sahria â vaopa chhôh liata sopazy a la tyhpa a châpa vâta, cha bie cha a reipa a châ.

⁷ Zisu ta, “Pakhâ khah u, he ropahâhpa he pabupa ta ei y nawpa noh châta â vaw pasopa a châ.

⁸ Dyhchhiepazy cha nama hry liata ama y ngâ thlâh ha aw, kei deikua la nama hnohta y ngâ thlâh ha aw va na,” tah ta.

Lâzarâh thie achhuahna

⁹ Cha su liata Zisu a y tahpa Zu chyhsa hluhpi ta ama vaw pahno nahta, a vy ei ta. Zisu vâ dei châ leipa ta, athihpa hry tawhta a pathyupa Lâzarâh hmô awpa ama khohpa vâta a vypa ama châ.

¹⁰ Chavâta theihthai beizy ta Lâzarâh chhao cha thie a chhuah ei ta.

¹¹ A chhâpa cha ano vâta Zu chyhsa hluhpi pua ei ta, Zisu amâ ngiapâpa vâta a châ.

Zerusale rônahpa ta â ngia

¹² A mylâ ta kyhchhi a vaw hlaopa zawpi hluhpi ta, Zisu cha Zerusale lâ â vy aw tahpa thei ei ta.

¹³ Thiahrâ kuahzy a cheipa ta ano dy awpa ta pua ei ta, “Haozanâ! Abeipa moh ta Izarei Bei a vypa cha reithaipa ta y mawh sy!” tahpa ta awh ei ta.

¹⁴ Zisu cha alâ taw hmô ta, a chô liata kiah ta,

¹⁵ “Hy Zaio sawchanô, chi khah y, Moh teh, alâ taw kiapa ta, Na Beipa cha â vy,” tahpa ta ropa hawhna khata.

¹⁶ Cha hmozy cha a hmiatuata la a pachupazy ta pahno thai veih ei. Châhrasala Zisu parônahsapa ta a y tawhna khata, cha hawhta a thâtih ropa châ ta, cha hmozy cha a chô liata ama vaw tao tlai tahpa a thei ha ei ta.

¹⁷ Thlâ tawhta Lâzarâh aw ta, athihpa hry tawhta a pathyu nota a hnohta zawpi a ypazy khata, Zisu thâtih cha reih lymâ ei ta.

¹⁸ Hmonoâhpa a taopa thâtih ama theipa vâta, zawpizy ta ano cha ama kei dypa a châ.

¹⁹ Phârisaihzy cha a chhohia ei ta, “Pahno teh u, khâpa hmah tao thei veih ei chi. Moh teh u, khizaw ta ano ama zi ha hih,” tah ei ta.

Krikâh mo thokha ta Zisu ama tlua

²⁰ Khazohpa a chhy awpa ta kyhchhi a hlaopazy hry liata Krikâh mo a hlao hra ei ta.

²¹ Chazy chata Kâlili râh Besaidâ khihpa Phili lâ a vy ei ta, a hnohta, “Pâpuh, Zisu eima hmô khoh,” tahpa ta a haw ei ta.

²² Phili ta Adaru kei chho ta, Adaru nata Phili ta Zisu cha kei chho ei ta.

²³ Zisu ta âmo cha a chhy ta, “Chyhsa Sawchapawpa parônahsapa ta a y nawpa daihti a tlô haw.

²⁴ Hmeiseihta ta, hmeiseihta ta ei cha chho ei, sâh hmô cha alei liata tla leipa sala, a thi leipa khiahta cha, ano dei ta y ta, a thi khiahta deikua cha, thei hluhpi a pathei tyh.

²⁵ Ahy rai a hrona a tlaichhaipa cha, a hrona pahlei aw ta, he khizaw liata a hrona a haopa deikua cha, a hrona cha chhâzaw ta â vao thlâh ha aw.

²⁶ Ahy rai eina chakao khiahta la, na zi mawh sy. Nâ chakaotuhpa cha ei yna liata a y hra aw. Ahy rai eina chakao khiahta la, ano cha Paw ta a palyupalih aw.

Chyhsa Sawchapawpa chaluahpa a châ aw

²⁷ “Tahmâ he ei palôh nô a po ngaita. Khâpa ma ei reih aw tly? ‘Ei Paw y, he daihti tawhna heta na pachha mah y,’ ei tah aw ma? Châ vei, he hmo tao awpa ta, he daihti he ei vaw tlôpa a châ.

²⁸ Chavâta ei Paw y, na moh parônahsa mah y,” tah ta. Avâ tawhta ao za pua ta, “Ei parônahsa haw, ei parônahsa heih aw,” tah ta.

²⁹ Cha liata a duahpa zawpizy ta ao cha thei ei ta, “Tôkalôhpa na a thua,” tah ei ta. Ahropazy ta, “Vâlyuhchâpa ta ano bie â chho,” tah ei ta.

³⁰ Zisu ta a chhy ta, “Kha ao kha keima châta a puapa châ vei, nâmo châta tlao a châ.

³¹ Tahmâ he khizaw pachiana daihti châ ta, tahmâ he khizaw bei cha thypa a châ aw.

³² Kei he alei tawhta chaluahpa ei châ tita, chyhsa zydua kei lâta ei sy aw ei,” tah ta.

³³ Cha bie cha a thi nawpazie pahnosa nawpa ta a reipa a châ.

³⁴ Zawpizy ta a chhy ei ta, “Mesia cha chhâzaw ta a y aw tahpa ryhpa châbu liata eima pahno. Kheihtazieta Chyhsa Sawchapawpa chaluahpa ta a y aw a tahpa ma na châ? Chyhsa Sawchapawpa cha ahy maw?” tah ei ta.

³⁵ Zisu ta ama hnohta, “Khaihpa cha buakhata nama hry liata a y chy. Khaihpa nama hnei chhôh heta charei teh u, chataleipatala zohna ta a cha pachhai pathlei aw ei. Zohna liata a chareipa cha a sie nawpa pahno vei.

³⁶ Khaihpa nama hnei chhôh heta, khaihpa he a ngiapâ teh u, chatanachata khaihpa sawzy nama châ aw,” tah ta. Cha biezy cha a rei khai nahta, Zisu cha sie ta, âmo tawhta a nyu ha ta.

Zuzy ngiapâleina

³⁷ Ama hmiakô liata hmonoâhpa hluhpi a taopa chhao ta, Zu chyhsazy ta ano cha a ngiapâ pyly veih ei.

³⁸ He he hrohsopa Isai ta, “Abeipa, eima bie reipa ahy ma a ngiapâ? Abeipa bâh ahy hnohta ma â luah?” tahpa ta a reipa kha a vaw tlô nawpa ta a châ.

³⁹ Cha vâna chata a ngiapâ thei veih ei. Chavâta Isai ta,

⁴⁰ “Ama mozy pachao ta, Ama palôh kuh a pachhasa; Chata châ vei mawh sala, Ama mo ta hmô aw ei ta, Ama palôh ta pahnopa ta, A vaw heih aw ei ta, Ei patlâh ha awpa ei tlai,” a tahpa kha a châ.

⁴¹ A rônahzie hmô ta, a thâtih a chhopa vâta, cha biezy cha Isai ta a reipa a châ.

⁴² Chatanachôta ryureituhpa hluhpi ta Zisu cha a ngiapâ ei ta, châhrasala Phârisaihzy ama chipa vâta, pakhyna o tawhta papuapa ama châ lei nawpa ta, amâ ngiapâna cha palâhâh veih ei.

⁴³ Khazohpa reithaina hlao awpa hlâta, chyhsa reithaina hlao awpa ama khoh viapa vâta a châ.

Zisu kyhpachâna

⁴⁴ Zisu cha ao paro ngaitapa ta awh ta, “Ahy rai nâ ngiapâpa cha, kei nâ ngiapâpa châ leipa ta, nâ tuahtuhpa a ngiapâpa a châ.

⁴⁵ Ahy rai nâ hmôpa cha, nâ tuahtuhpa a hmôpa a châ.

⁴⁶ Khizaw pakhaihsa awpa ta a vypa ei châ, ahy rai nâ ngiapâpa cha zohna liata a y lei nawpa ta.

⁴⁷ Chyhsa ta ei biezy thei ta, a zyh leipa chhao ta, ano cha pachia aw va na. Khizaw pachia awpa ta a zupa châ leipa na ta, khizaw pachha awpa ta a zupa tlao ei châ.

⁴⁸ Ahy rai nâ khoh leipa nata ei bie a zyh leipa cha, pachiatuhpa pakha a hnei. Ei bie reipa, kha bie tlai khata, noh chhâna noh liata ano cha a pachia aw.

⁴⁹ Keima biehneina ta bie reih va na. Nâ tuahtuhpa ei Paw ta bie na pie ta, rei awpa nata chho awpa eina piepazy ei reih tyh.

⁵⁰ Ano biepiepa cha chhâzaw hrona a châ tahpa ei pahno. Chavâta bie ei reipa he, Paw ta eina chhopa lymâ hawhta a reihpa ei châ,” tah ta.