ZAWHÂNA 11 - Mara Bible RV (BSI)

Lâzarâh thina

¹ Mâri nata a narônô Marthâ yna Bethâni khih liata chyhsa pakha, a moh Lâzarâh ama tahpa pasa ta.

² Cha Mâri cha sathaw ropahâhpa Abeipa thu ta, a sâ ta a phei a hrutuhpa kha châ ta, tlâhleipa cha ano rilâhpa Lâzarâh a châ.

³ A sietanôzy ta Zisu hnohta, “Abeipa, na kyhpachâpa kha tlâh vei,” tahpa ta chyhsa Zisu lâ tuah ei ta.

⁴ Zisu ta cha bie cha a thei nahta, “Cha pasana cha thina awpa châ vei. Khazohpa rônahna châta tlao a châ. Khazohpa Sawchapawpa he, cha vâna chata parônahsapa a châ aw,” tah ta.

⁵ Zisu ta Marthâ nata a narônô nata Lâzarâh zy cha kyhpachâ kaw ta.

⁶ Lâzarâh pasapa thâtih a thei nahta, a yna liata noh no y via ta.

⁷ Cha khai tawhta a pachupazy hnohta, “Zudia râh lâ sie heih ei suh u,” tah ta.

⁸ Pachupazy ta a hnohta, “Râbai, tahmâno he Zuzy ta alô ta vaw châ chhuah ngâ thlâh ha ei ta, cha lâ cha na sie heih aw ma?” tah ei ta.

⁹ Zisu ta a chhy ta, “Noh kha ta dawh hrawh hleino y vei ma? Noh y chhôh ta a chareipa chyhsa cha, he khizaw khaihpa he a hmôpa vâta, a chapia aw vei.

¹⁰ Zâ ta a chareipa deikua cha, ano liata khaihna a y leipa vâta, â chapia tyh,” tah ta.

¹¹ Cha biezy cha a rei khai nahta, ama hnohta, “Eima viasa Lâzarâh a mô ha ta, â môpa pahra awpa ta ei sie aw,” tah ta.

¹² Pachupazy ta, “Abeipa, a môpa a châ khiah cha, â kaw hra heih bao na,” tah ei ta.

¹³ Zisu ta a thi hapa kyh a reipa châ ta, châhrasala âmo ta cha a pahâpa ta â môpa kyh a reipa hawhta pachâ ei ta.

¹⁴ Zisu ta âmo cha a siapa ta chho ta, “Lâzarâh cha a thi haw.

¹⁵ Nâmo châta, namâ ngiapâ thei nawpa ta, cha liata ei y leipa cha ei ly kaw. Ano lâ vawh ei suh u,” tah ta.

¹⁶ Thawma, Maphieh ama tahpa ta a heih pachupazy hnohta, “A thina liata thi awpa ta, sie hra ei suh u,” tah ta.

Zisu thyuheihna nata hrona

¹⁷ Zisu ta a tlô nahta, Lâzarâh cha noh palih thlâ liata â zia haw tahpa pahno ta.

¹⁸ Bethâni cha Zerusale kiapâh liata y ta, me no daihmâ a hlapa a châ.

¹⁹ Ama rilâhpa mâchhie ama sapa thlapalôh awpa ta, Zu chyhsa hluhpi Marthâ nata Mâri o lâ a vy ei ta.

²⁰ Marthâ cha Zisu â vypa thâtih a theipa nahta, kei dy ta, Mâri deikua cha o liata a tyuh thlâh ha ta.

²¹ Marthâ ta Zisu hnohta, “Abeipa, he liata a ypa châ la, ei rilâhpa a thi lei awpa tlai.

²² Tahmâ chhao Khazohpa lâ na hiapa maih, Khazohpa ta a cha pie aw tahpa ei pahno,” tah ta.

²³ Zisu ta a hnohta, “Na rilâhpa a thyu heih aw,” tah ta.

²⁴ Marthâ ta a hnohta, “Noh ki noh ta thyuheihna liata cha a thyuheih aw tahpa ei pahno,” tah ta.

²⁵ Zisu ta a hnohta, “Kei he thyuheihna nata hrona ei châ. Ahy rai nâ ngiapâpa cha, thi hra sala a hroh thlâh ha aw.

²⁶ Ahrohpa chhao, nâ ngiapâpa cha thi khao aw vei. Cha bie cha nâ ngiapâ ma?” tah ta.

²⁷ Marthâ ta, “Abeipa, ei ngiapâ na. Mesia, Khazohpa Sawchapawpa, khizaw lâ a vy awpa cha na châ tahpa ei ngiapâ,” tah ta.

Zisu a cha

²⁸ Cha bie cha a rei khai nahta, vawh ta, a narônô Mâri kei aw ta, arulâta a hnohta, “Pachutuhpa he liata y ta, a cha pado,” tah ta.

²⁹ Cha bie cha a thei nahta, Mâri cha thlai thyu ta, Zisu lâ vawh ta.

³⁰ Zisu cha khih a ngia mâh leipa ta, Marthâ ta a kei dy nota â tyhna su liata y thlâh ha chy ta.

³¹ Mâri thlai thyu ta a puapa cha, o chhôh liata ano thlah a palôhpa Zuzy ta ama hmô nahta, Lâzarâh chakhei awpa ta thlâ lâ a vawh awpa khiah ma tah ei ta, Mâri cha pazi ei ta.

³² Mâri cha Zisu yna kei tlô ta, a hmô nahta, a phei thaby liata â khu lâta pao ta, a hnohta, “Abeipa, he liata a ypa châ la, ei rilâhpa a thi lei awpa tlai,” tah ta.

³³ Zisu ta Mâri chapa nata a vaw zipa Zuzy chapa cha a hmô nahta, a thlahpa pachârôhpa ta, a palôh pasa ngaita ta.

³⁴ “Khataih liata nama pazia?” tah ta. Âmo ta, “Abeipa, a vy la, moh tua,” tah ei ta.

³⁵ Zisu cha ta.

³⁶ Zuzy ta, “Moh tua u, Lâzarâh kyh a vaw pachâ hmeiseih tlai na!” tah ei ta.

³⁷ Thokha ta, “Mochaopa mo a pavâsatuhpa heta, he chyhsa chhao he thi leipa ta paysa thei vei tly ma?” tah ei ta.

Lâzarâh thyuheihna

³⁸ Zisu cha palôh pasa ngaitana chôta thlâ kei tlô ta. Thlâ cha lôpu khiepa châ ta, a paka liata alô ta pamaipa a châ.

³⁹ Zisu ta, “Alô he pasie teh u,” tah ta. Athipa sietanô Marthâ ta a hnohta, “Abeipa, tahmâ la a roh chhao a chhie bâ aw, a thi tawhta noh palih châ ha tlôh ta,” tah ta.

⁴⁰ Zisu ta a hnohta, “Nâ ngiapâ khiahta la, Khazohpa rônahna na hmô aw, cha tah va na ma?” tah ta.

⁴¹ Alô cha pasie ei ta. Zisu cha avâ lâ ua ta, “Ei Paw, ei bie na nathliepa vâta alyna bie ei cha hlâ.

⁴² Ei bie khâ na nathlie tyh tahpa ei pahno. Châhrasala he liata zawpi a duahpazy heta, na tuapa ei châpa ama pahno thei nawpa ta, he bie he ei reipa a châ,” tah ta.

⁴³ Cha biezy cha a rei khai nahta, ao paro ngaitapa ta awh ta, “Lâzarâh, vaw pua teh,” tah ta.

⁴⁴ Athihpa cha a ku nata phei rito poh ta pahlyna chôta nata a hmia poh ta pahlyna chôta vaw pua ta. Zisu ta ama hnohta, “Pathlâ u la, pasiesa teh u,” tah ta.

Zisu thie achhuahna

⁴⁵ Mâri hnohta thlâ lâ a vawhpa Zu chyhsa hluhpi ta, Zisu hmotaopa cha ama hmô nahta, ano cha a ngiapâ ha ei ta.

⁴⁶ Thokhazy deikua cha, Phârisaihzy lâ vawh ei ta, Zisu hmotaopazy cha kei chho ei ta.

⁴⁷ Theihthai beizy nata Phârisaihzy ta ryureituhpazy awpakhy ei ta, “Kheihta eima tao aw? He chyhsa heta hmonoâhpa hluhpi tao tlôh ta.

⁴⁸ He hawhta eima pathlie thlâh ha khiahta cha, chyhsa zydua ta ano a ngiapâ aw ei ta, Rawma mo a vy aw ei ta, eima su hneipa nata eima phopi he ama vaw parao aw,” tah ei ta.

⁴⁹ Ama hry liata chyhsa pakha, a moh Kaiphâ ama tahpa, cha kô liata theihthai beichaipa ta ama hnohta, “Khâpa hmahta pahno veih ei chi.

⁵⁰ Eima phopi duata leidia khai awpa hlâta cha, phopi vyuhpa ta chyhsa pakha thi awpa cha, nama châta a pha via tahpa pahno veih ei chi,” tah ta.

⁵¹ Cha bie cha ano khota a reipa châ leipa ta, cha kô liata theihthai beichaipa a châpa hawhta, Izarei phopi châta Zisu a thi awpa kyh hrohsona bie a reipa tlao a châ.

⁵² Izarei phopi châta dei châ leipa ta, Khazohpa saw râh to liata hiepatlapazy hlao kha ta syhpahmaoh nawpa a châ hra.

⁵³ Cha noh tawhta cha, Zisu thie thei nawpa lâpi tlua lymâ ei ta.

⁵⁴ Chavâta Zisu cha Zuzy hry liata â lâhâhpa ta charei khao leipa ta, râhchawhpa daih lâta Epharai ama tahpa khih lâ sie ta, pachupazy chhaota cha liata y ta.

⁵⁵ Zuzy Zawpakhô Kyhchhi a hnia ha ta. Zawpakhô Kyhchhi hlâta a pathaisa awpa ta, khitaw chyhsa hluhpi Zerusale lâ khy ei ta.

⁵⁶ Zisu tlua ei ta, Achhyna o liata amâ dua nota, âmo nata âmo ta, “Kheihta nama pachâ? Kyhchhina lâ a vy lei awpa ma â chhuah ha tly?” a tah ei ta.

⁵⁷ Zisu ama patu thei nawpa ta, a yna su a pahnopa maihta âmo chho awpa ta, theihthai beizy nata Phârisaihzy ta biepiepa ama vaw papua hapa a châ.