ZAWHÂNA 10 - Mara Bible RV (BSI)

Zisu mietaku vaituh phapa

¹ “Hmeiseihta ta, hmeiseihta ta ei cha chho ei, ahy rai mietaku sadô ochhi liata a ngia leipa ta, su hro lâ tawhta kiah ta a ngiapa cha, cha chyhsa cha parutuhpa nata hraotuhpa a châ.

² Ochhi lâ tawhta a ngiapa deikua cha, mietaku vaituhpa a châ.

³ Ochhi vaituhpa ta ano cha a pahypa tyh. Mietakuzy ta a ao thei ei ta, ano ta a mietakuzy cha ama moh ta aw chyu ta, a chhihtha tyh ei.

⁴ Ano eih zydua a papua khai nahta, ama hmia lâta sie ta, a ao ama pahnopa vâta, mietakuzy ta ama pazi tyh.

⁵ Khichhaipa ao cha ama pahno leipa vâta, ano cha pazi leipa aw ei ta, tlao amâ râsai aw,” tah ta.

⁶ Cha pakhona bie cha Zisu ta ama hnohta reih ta, châhrasala khâpa bie ma a reih tahpa pahno veih ei.

⁷ Chavâta Zisu ta ama hnohta reih heih ta, “Hmeiseihta ta, hmeiseihta ta ei cha chho ei, kei he mietaku ochhi cha ei châ.

⁸ Keima ei vy hlâta a vypa zydua kha parutuhpazy nata hraotuhpazy châ ei ta, chavâta mietakuzy ta ama bie nathlie veih ei.

⁹ Kei he ochhi ei châ. Ahy rai keima liata a ngiapa cha, pabohsapa ta y aw ta, a ngia aw ta, pua aw ta, sibiepa su a hmô aw.

¹⁰ Parutuhpa cha paru awpa nata thie awpa nata parao awpa leipa ta cha a vy vei. Kei la, hrona ama hnei nawpa ta, â kipa ta ama hnei nawpa ta a vypa ei châ.

¹¹ Kei he mietaku vaituh phapa ei châ. Mietaku vaituh phapa cha mietakuzy châta a hrona a pie.

¹² Hriahlaopa, mietaku vaituh hmeiseih leipa cha, mietakuzy ano eih ama châ leipa vâta, changie â vypa a hmô nahta, mietakuzy cha a râsai ta, changie ta mietakuzy tai ta, a papai tyh.

¹³ Hriahlaopa a châpa vâta a râ ta, mietakuzy pachâna rai hnei vei.

¹⁴ Mietaku vaituh phapa ei châ. Keima eihzy pahno ei na ta, keima eihzy ta eina pahno ei,

¹⁵ Paw ta kei na pahno ta, kei ta Paw ei pahnopa hawhna heta. Mietakuzy châta ei hrona ei pie.

¹⁶ He mietaku sadô liata a y leipa mietaku hropazy ei hnei. Âmo chhao a vaw chhi aw ei na ta, ei ao ama thei hra aw. Chatanachata zaw kha ta y aw ei ta, vaituhpa pakha ama hnei aw.

¹⁷ Hmô heih awpa ta ei hrona ei piepa vâta, Paw ta kyh eina pachâ.

¹⁸ Ahy hmahta na lapa leipa ei ta, keima rei tlai ta ei piepa a châ. Pie thei awpa ta biehneina hnei na ta, la pakhua heih thei awpa biehneina chhao ei hnei. Cha biepiepa cha ei Paw tawhta ei hmôpa a châ,” tah ta.

¹⁹ Cha biezy vâna chata Zuzy hry liata achhaihna y heih ta.

²⁰ Chyhsa hluhpi ta, “Ahripa hnei ta, a hru ha hih, khazia a bie nama nathlie?” tah ei ta.

²¹ Ahropazy ta, “He biezy he ahripa a hneipa bie reipa châ vei. Ahripa ta mochaopa mo a pavâsa thei ma?” tah ei ta.

Zisu nata Paw pôhkha ama châ

²² Cha daihti liata, Ahlâna Kyhchhi Zerusale liata y ta. Chasipaw daihti châ ta,

²³ Zisu cha Achhyna o liata Sawlawmaw aikah liata a hlaihlâ ta.

²⁴ Zuzy ta vaw chadô ei ta, a hnohta, “Khachâ ma noraihpa ta miah na soh aw? Mesia na châ khiahta cha, a siapa ta miah chho teh,” tah ei ta.

²⁵ Zisu ta âmo cha a chhy ta, “Cha chho ha ei na ta, nama zo vei kha zaw. Ei Paw moh ta hmo ei taopazy he ei thâtih nâ pahnokheipazy cha a châ.

²⁶ Châhrasala ei mietakuzy hry liatapa nama châ leipa vâta, zo veih ei chi.

²⁷ Ei mietakuzy ta ei ao thei ei ta, kei ta âmo pahno ei na ta, âmo ta eina pazi ei.

²⁸ Chhâzaw hrona pie ei na ta, leidia beih khao aw veih ei. Âmo cha ahy hmahta ei ku tawhta na chhu thei aw veih ei.

²⁹ Âmo nâ pietuhpa ei Paw cha, ato zydua hlâta rônah viapa châ ta, chavâta âmo cha ahy hmahta Paw ku tawhta chhu thei aw veih ei.

³⁰ Kei nata Paw cha pôhkha eima châ,” tah ta.

³¹ Zuzy ta alô a huah ei ta, Zisu cha vaw a chhuah heih ei ta.

³² Zisu ta âmo cha a chhy ta, “Paw tawhta raihria phapa hluhpi cha pahmô ei na ta, a kheihawhpa vâna khata ma alô ta vaw einâ chhuah ei chi?” tah ta.

³³ Zuzy ta a chhy ei ta, “Raihria phapa vâta alô ta eima cha vawh awpa châ leipa ta, chyhsapa châ tlôh chi ta, Khazohpa ta a taopa ta, Khazohpa na reipachhiepa vâta alô ta eima cha vawh awpa a châ,” tah ei ta.

³⁴ Zisu ta âmo cha a chhy ta, “Nama ryhpa châbu liata, ‘Khazohzy nama châ ei cha tah ei,’ tahpa ropa châ vei mâ?

³⁵ Khazohpa bie vaw tlôna chyhsazy hmahta khazohzy a tah khiahta cha, Biehrai bie cha parao thei awpa châ vei.

³⁶ Paw ta panano ta, khizaw lâ a za tuapa ta, ‘Khazohpa Sawchapawpa ei châ,’ ei tahpa vâta, ‘Khazohpa na reipachhie,’ eina tah ei chi ma?

³⁷ Ei Paw raihria a hriapa ei châ vei khiahta la, na zo khah u.

³⁸ Paw rai a hriapa ei châ khiahta deikua cha, kei na zo vei hra u la, ei raihriazy chhâ zo teh u. Chatanachata Paw cha keima liata y ta, kei chhao Paw liata ei y tahpa pahno aw ei chi ta, nama no â vâh aw,” tah ta.

³⁹ Patu a chhuah heih ei ta, châhrasala ama ku tawhta pua ha ta.

⁴⁰ Zawdâh chavah haosâ liata Zawhâna ta chyhsazy bâti a pachâsa tuana su lâ kha sie heih ta, cha liata y chy ta.

⁴¹ Chyhsa hluhpi ano lâ a vy ei ta, a hnohta, “Zawhâna khata hmonoâhpa tao leipa ta, châhrasala Zawhâna ta he chyhsa thâtih a reipa zydua deikua cha â do khai,” tah ei ta.

⁴² Chatanachata cha liata chyhsa hluhpi ta Zisu cha a ngiapâ ha ei ta.