ZAWBÂ 9 - Mara Bible RV (BSI)

Zawbâ achhyna: Bie pathlâkheituhpa y veih ei

¹ Zawbâ ta a chhy ta:

² “Na reipa cha â do tahpa ei pahno: Châhrasala chyhsapa heta, Khazohpa hmia liata kheihta thai a châ thei aw?

³ Chyhsa ta Khazohpa bie ei a chhuah sala, Ei sâh kha liata ei kha chhao a chhy thei aw vei.

⁴ Ano cha a palôh so ta, Thatlô hmotaotheipa a châ. A chô liata kuh a pachha ta, Hlaotlohpa ahy ma a y?

⁵ Tlâhzy pasie ta, Pahno leipa ei ta; A hiehâhpa ta âmo paliepatheih ta, Pahno veih ei.

⁶ Alei he a yna su tawhta chatho ta, A tôhzy â chalyu;

⁷ Noh biepie ta chhi leipa ta, Awhsizy a khawhlôh theipa a châ.

⁸ Ano deita avâzy parai thei ta, Tilaipi chatlaopazy a tlybai theipa a châ.

⁹ Awhsichavyh nata vaothawlâpiapa zy taotuhpa châ ta, Awhsicharu nata chho awhsizy taotuhpa a châ.

¹⁰ Ano cha hmo rônahpa pahno thei leipa taotuhpa châ ta, Hmo noâhpa rei tiah leipazy taotuhpa a châ.

¹¹ Pachâ tua, Na vaw chapia ta, Hmô leipa na ta; Ei kiapâh liata sie ta, Pahno va na.

¹² Pachâ tua, A râkhei ta, Ahy a pakhâ thei tly? Ahy ma, ‘Khâpa na tao?’ a tah thei tly?

¹³ Khazohpa cha a hiehâhna a sy leipa châ ta, Rahâbi baotuhpazy chhao ta a ry liata amâ bôh tyh.

¹⁴ “Keima bao heta kheihta a chhy aw na ta, Khâpa biezy hmâpa ta ma ei chhy aw tly?

¹⁵ Ei do thlâh hapa chhao ta, A chhy thei va na; Nâ pachiatuhpa cha, Ngiachhiena ei haw awpa tlao a châ.

¹⁶ Aw aw sah la eina chhypa chhao ta, Ei bie a uasa pangiasa va na.

¹⁷ Thlihpipa hmâpa ta na chanaoh ta, A chhâpa y leipa ta ei hmah a papôh.

¹⁸ Huhnopa ta y na pasaih leipa ta, Ruchhôna ta eina pabie.

¹⁹ Tha hmâpa ta a tupa châ mawh sala, Pachâ tua, ano cha thatlôpa châ ta; Ryureina liata lyuhtuapa châ mawh sala, Ano cha ahy ma a aw thei aw tly?

²⁰ Ei do thlâh hapa chhao ta, Ei pakah ta thailei na pachâ aw ta; Seina hnei leipa ei châpa chhao ta, Ei sialeina a hmô thlyu aw.

²¹ Seina hnei leipa na ta, Châhrasala a pachâ hoh khao va na; Ei hro he eina ai kaw.

²² Hmo to he miakha sai a vaw châ; Chavâta ei reih aw, ‘Mosiapa chhao moleipa chhao a pahleipadia tyh ei.’

²³ Chhiena ta eikhapi ta thina a vaw tlôkhei tita, Mosiapa vâchhiena cha a pahneisao tyh.

²⁴ Khizaw he moleipazy ku liata piepa châ ta, Pachiatuhpazy hmia a khu ha ei; Cha cha ano taopa a châ vei khiah, Ahy hropa ma a tao aw?

²⁵ “Ei nohzy he râpasuatuhpa hlâta chatlie via ta, A zaw ei ta, Alyna noh hmô leipa ta ama khô tyh.

²⁶ Lohthi balyh hawhta chatlie ei ta, Pahmôh ta a la awpa â pathlô thlupa hawhta ama chatlie.

²⁷ ‘Ei palôh tlâh leina my aw na ta, Ei pachârôhna hmia pahleipa ta, Thaphapa ta ei y aw,’ Ei tah khiahta cha,

²⁸ Ei pasataona zydua a chipa châ aw na ta, Thai na pachâsa aw va chi tahpa ei pahno.

²⁹ Thailei ei châ awpa hnohkua cha, Khazia hraoleipa ta ei hriapasa ngâ kaw aw?

³⁰ Sâhbaw ta ei ngai a sipa ta, Lôiah ta ei ku a si hra aw sah la,

³¹ Chiatlao khaoh lia na ny thlyu aw chi ta, Ei chysiazy cheingei ta eina pasi aw ei.

³² Ryureina su lia a duah khoh ta, Ano cha a chhy awpa ta, Kei hawhta chyhsapa châ tlôh va.

³³ Eima pano chô liata ku pahniepa ta, Eima likah bie a pathlâ awpa y veih ei.

³⁴ Keima tawhta a sômasi la sala, A chichhihna ta thlah na pazo khah sy.

³⁵ Cha tita ano chi leipa ta bie ei reih thei aw; Châhrasala tahmâ la, Cha hawhta châ thei va na.”