ZAWBÂ 8 - Mara Bible RV (BSI)

Bildâ biereipa: Zawbâ a ro awpa a châ

¹ Suhi chyhsa Bildâ ta Zawbâ cha a chhy ta:

² “Khachâ ma cha hmozy cha reih aw chi ta, Na pakah biezy cha ziza rupa hawh a châ aw?

³ Khazohpa ta ryureina dopa a pako beih ma? Atotaotheipa ta hmo dopa a pako beih ma?

⁴ Na sawzy ta a chô liata ama vaw molei ha khiahta cha, Ama paraona vâta a pasapanô hapa ei a châ aw.

⁵ Khazohpa tluapa ta, Atotaotheipa hnohta zawngiahna a haw la,

⁶ Pathaihpa nata adopa na châ khiahta cha, Na châta anosasy a pahra aw ta, Na y nawpa dopa liata a cha paduapathi heih aw.

⁷ Nâ thaona liata chyh kaw hra la, Na chhâna cha a rônah ngaita aw.

⁸ “Chhâ hmiatuapa kyh kha patluah la, Ama pathlatuhpazy tluapa hmo a chu tua.

⁹ Keimo cha zâhnia chyhsa dei châ pi ta, Khâpa hmah pahno ma pi. Alei liata eima hro nohzy he, Nohpahlipa deita a vaw châ.

¹⁰ Chazy cha cha pachu veih ei ma, Cha chho beih veih ei ma, Ama pahnopa biezy reih veih ei ma?

¹¹ “Lohthi cha chiatlao y leina liata a laiseih thei ma? Ti y leina liata râbuh a laiseih thei ma?

¹² Paw locho daihti, Chhawh leipa ta ama y no chhao ta, Tho hropa zydua hlâta ama uah tua tyh.

¹³ Cha hawhpa cha Khazohpa a mypa zydua lâpi châ ta, Khazohpa a pachâ leipazy hnabeiseihna cha a leidia aw.

¹⁴ Â pahniehna cho aw ta, Â ngâchhâpa cha zytôpuhpa bu a châ.

¹⁵ A o a hnieh ta, Châhrasala a o cha a duah thei leipa ta; A o cha a patu pâ ta, Châhrasala pachyu vei.

¹⁶ Ano cha nohsa ry liata chhao hroh thei ta, A chhyhzy a sadô liata a thao.

¹⁷ A tharizy ta alô pachopa chazai ta, Alô o a tlua laih.

¹⁸ A su tawhta phiapa a châ tita, A su ta a paphasai ta, ‘Cha hmô beih va na,’ a tah tyh.

¹⁹ Moh teh, he he Abeipa lâpi alychhihna cha a châ, Thokha phiapa châ ei ta, Chhaohlei tawhta ahropazy ama kaw pyuh heih tyh.

²⁰ “Moh teh, Khazohpa ta seina hnei leipa dytha beih leipa ta, Moleina hmo a taotuhpa bao beih vei.

²¹ Na pakah cha pahneina ta pabie heih aw ta, Na hmao cha thaphapa ta awhna ta a pabie heih aw.

²² Châ haotuhpazy cha nozana ta tobipa châ aw ei ta, Moleipazy cha ama poh o y khao aw vei,” tah ta.