ZAWBÂ 7 - Mara Bible RV (BSI)

Zawbâ a reih pazao: Ei hro lia hnabeiseihna y vei

¹ “Chyhsapa ta chakaona rupa lei liata hnei vei ma? A hro nohzy cha ahlaopa nohzy hawh dei châ vei ma?

² Nohdi a vâ kawpa sei hawhta, Hlao a hâpa ahlaopa hawhta,

³ Hraoleipa ta thla hluhpi hmâh na ta, Zâ pachârôhnazy cha ei tovyuh a châ.

⁴ Ei zia tita, ‘Khati ta ei thyu aw?’ tah na ta. Châhrasala zâ hra cha pasi kaw ta, Azo zâ khihdei ta ei paliepatheih tyh.

⁵ Ei sapa cha alôpa nata apuapa ta khu ta, Ei vo kai ta, a hmah a pa-u.

⁶ Ei nohzy he thaipheih hlâta chatlie via ta, Hnabeiseihna hnei leipa ta a khô tyh.

⁷ “Ei hrona he ziza hawh dei a châ tahpa a thei mah y, Ei mo heta alyna hmô heih khao aw vei.

⁸ Nâ saituhpa mo ta na hmô khao aw vei; Na mo ta na tlua aw ta, Y khao aw va na.

⁹ Meihdo pai ta a leipa hawhta, Athihkhih lâ a zu hapa cha, Kaw pua khao aw vei.

¹⁰ A o lâ a di khao leipa aw ta, A yna su ta ano cha pahno khao aw vei.

¹¹ “Chavâta ei pakah he pakhâ aw va na; Ei thlahpa pachârôhpa ta bie reih aw na ta, Palôh pasapa ta ei paphôh aw.

¹² Tilaipi ma châ na ta, Tilaipi nga laipa ma châ na ta, Nâ vaituhpa na so tly?

¹³ ‘Ei rakhô ta thlah na palôh aw ta, Ei dyuchhai ta ei vâsâhna a pahua aw,’ tah na ta,

¹⁴ Châhrasala mâzy ta na pachisa chi ta, Aluahnazy ta ei thlah eina pazo chi.

¹⁵ Chavâta rao hmiesaopa ta thi awpa a tlyh na ta, He hawhpa pôhpa hneipa hlâta la, Thi awpa tlao ei khoh via.

¹⁶ Ei hro he eina ai kaw; Chhâzaw ta hro khoh va na. Ei nohzy he hu kha dei châ bâ ta, Chavâta keima y ta tlâ na paysa mah y.

¹⁷ Chyhsapa he khâpa ma châ ta, Thata pachâ chi ta, A chô liata na palôh na so tly?

¹⁸ My chareih ta tly chi ta, Khatino rai ta na pasia tyh tly?

¹⁹ Khachâ ma nâ heihsai leipa ta y aw chi ta, Ei pachih ei palâ chhôh chhao, Na pathlie leipa ta na y aw?

²⁰ A molei hapa vaw châ sah la, Na chô liata khâpa hmo ma ei tao tly, Hy chyhsapa vaituhpa y? Khazia ma na châka ta eina tao chi? Khazia ma na châta phaohri ei châ?

²¹ Khazia ei paraona a ngiahthai khoh leipa chi ta, Ei moleina na siekhei khoh vei? Dohlei liata ei zia bâ aw; Na tlua aw chi ta, Y khao aw va na,” tah ta.