ZAWBÂ 6 - Mara Bible RV (BSI)

Zawbâ achhyna: Ei nôu bie he â do

¹ Zawbâ ta a chhy ta:

² “Aw, ei ruchhôna he panuapa châ sala, Ei vâchhiena zydua he khopathliahpa châ sala ei tah kaw dia!

³ Tilaipi sadi hlâta â hri via aw; Chavâta ei biezy a chahrâh kawpa a châ.

⁴ Atotaotheipa châtaizy ei pôhpa liata y ta, Ei thlahpa ta ama châmaih doh ta, Khazohpa chichhihna ta eina siehnao.

⁵ Alâ hrâhpa cha sibie a bâ nota a sâh beih ma? Viahchao tôhpa chhao sâh kô a bâ nota â aoh beih ma?

⁶ Niedo pahâh leipa cha, Alôh leipa ta nie theipa a châ ma? Awhtih tisi chhao he, Khâpa pahâna ma a hnei?

⁷ Chazy cha ei rao ta hria khoh vei; Kei châta niedo pasichhihpa a châ.

⁸ “Aw, ei hiapa hmô thei aw sah la cha, Khazohpa ta ei hnabeiseihna hlao patloh sala,

⁹ Na physao khoh sala, A ku hypa ta na chhawh pachhô ha sala ei tah kaw dia!

¹⁰ Cha cha ei hnangâhna châ aw ta, Ei pasa kawpa chhao ta ei reithai aw, Pathaihpa bie ei paphasai leipa vâta.

¹¹ Khâpa thatlôna ma ei hnei tly, Ei hâ lymâ chy awpa cha? Ei chhâ nawpa khâpa châ ta ma, Ei palôh ei pasisa chy aw tly?

¹² Ei tha he alô tha ma a châ tly? Ei sapa he dawh ma a châ tly?

¹³ Keimasasyh a bao thei khao va na, Sona ta eina puasai haw.

¹⁴ “Viasa chô liata phana a palâsa leipa cha, Atotaotheipa china a heihsaipa a châ.

¹⁵ Ei unawhzy cha vahtie hawhta a pahnieh tlâh leipa châ ei ta, Vâsua tihry hawhta a kuapa ama châ.

¹⁶ Chavah kao dâhaw tlo ta pavyh khai ta, Dâhaw chhao hmô theipa châ khao leipa ta, Châhrasala dâhaw tlo cha zao ta, A kua heih tyhpa chavah hawh ama châ.

¹⁷ Ama zao nahta lei ei ta, A lalôh nahta ama su tawhta ama pai ha tyh.

¹⁸ Ama lâpi tleisaipa ta, Râhchawhpa lâ a khypa sôhpaliepazy cha ama leidia tyh.

¹⁹ Temâ sôhpaliepazy ta ti tlua ei ta, Sebâ khitlyhpazy ta ti hmô awpa ama hnabeiseih.

²⁰ Amâ ngâpô tupa vâta, Maophyuhpa ta y ei ta, A su tlô ei ta, Hnabeidypa ta ama y.

²¹ Khâ hmah châ khao veih ei chi; Chhiena ei tyhpa hmô ei chi ta, Nama chi kaw hih.

²² ‘Ei moh ta hmopiepa na taopa teh u,’ ei cha tah ei ma? ‘Nâmo sôh tawhta panaopapana na piepa teh u,’ ei cha tah hra ei ma?

²³ ‘Khakhaipa ku tawhta na pachha teh u,’ ei cha tah rai ei ma? ‘Nôchhiepa ku tawhta na chatlai teh u,’ ei cha tah hra ei ma?

²⁴ “Na pachu u la, ei chalih aw, Ei tao pado leipa na pahnosa teh u.

²⁵ Biedopa cha a thatlô kaw mâh tâh! Nâmo chhoreina deikua he, Kheihawhpa chhoreina ma a châ tly?

²⁶ Hnabeidypa bie cha ziza hawhta pachâpa ta ma, Maochhiena bie ma nama tlua?

²⁷ Paw hnei leipazy hmo chhu awpa ta, Nuby a dao khoh thlâh ha ei chi ta, Sôh ta nama viasa a zuah khoh thlâh hapazy nama châ.

²⁸ “Tahmâ zawh a ngiah u la, Ei hmia na moh tua rai u, Hmiachhy ta haipa bie a reih awpa chi ei châ ma?

²⁹ Nama palôh a thla teh u; Hmo doleipa tao cheita khuh vy. Pachâ pathi tua u, Adoleina hnei cheita va na.

³⁰ Ei hmao liata adoleina a y ma? Ei pakah ta hmo pha leipa pahno thei vei ma?” tah ta.