ZAWBÂ 5 - Mara Bible RV (BSI)

¹ “Tahmâ aw tua, Châ chhypa pakha chhâ ama y ma? Vâlyuhchâpa ahy ma nâ heihnao aw?

² Ruchhôna ta ahrupa thie ta, Hiatliana ta angâpa a patlaopâ tyh.

³ Ahrupa ta thari a thlapa hmô na ta, A pahrâna cha thlai chhie ei sapa.

⁴ A sawzy abohna tawhta lâhlapi ta y ei ta, Thokhy chhikao liata phypa châ ei ta, A pachha awpa ahy hmah y veih ei.

⁵ Nodipazy ta a kôvei nie khai ei ta, Ahloh hry tawh chhao la ei ta, Dâhphipazy ta a hneirôna ama palâ khai haw.

⁶ Vâchhiena he dohlei tawhta a puapa châ leipa ta, Tymâna chhao chhaohlei tawhta a pyuhpa châ vei.

⁷ Chyhsapa cha a tymâ awpa ta vaw pih ta, Meihlih hawhta chô lâ â zaw syulyu tyh.

⁸ “Kei châ aw sah la cha, Khazohpa tlua aw na ta, A hnohta ei rairuna ei tlôkhei aw.

⁹ Ano cha hmo rônahpa nata pahno pha leipazy taotuhpa châ ta, Hmo noâhchhihpa rei tiah leipazy taotuhpa a châ:

¹⁰ Alei chô liata avâ pasuasa ta, Râh liata ti a palosa.

¹¹ A nawhpazy pasâh ta, Mâchhiesapazy abohna su lâ a chalo tyh.

¹² So piehpiepazy hmochhuahpa parao ta, Ama ku ta hlaotlohna tlôkhei vei.

¹³ Piehpiepazy piehpiena patu ta, Aohraohpazy aohraohna thlai ta a pachhâsa.

¹⁴ Nohchhô ta zohna a tyh ei ta, Nohchhô locho ta zâ hawhta ama pathâ.

¹⁵ Piehpiepazy pakah zaozi tawhta dyhchhiepazy pachha ta, Thatlôpazy ku tawhta a pachha ei.

¹⁶ Chavâta sipasazy ta hnabeiseihna hnei ei ta, Adoleina cha hmaomopa ta a y.

¹⁷ “Moh tua, Khazohpa chhoreipa chyhsa cha thlaochhipa ta a y tyh, Chavâta Atotaotheipa chhoreina cha saw ta rei leipa ta y khah y.

¹⁸ Ano cha hmah paphao ta, Chahrypa heih tyh ta; Pasasa ta, A ku ta a patlâh heih tyh.

¹⁹ Tymâna miacharu tawhta cha pachha aw ta, Miasarina liata chhiena ta cha hria aw vei.

²⁰ Chakâh nota thina tawhta cha pachha aw ta, Adyuhna liata zaozi hmotaotheina tawhta a cha pachha aw.

²¹ Bie pha leipa tawhta nyupa châ aw chi ta, Raona a vaw tlô tita chi aw va chi.

²² Paraona nata chakâhna zy pahneisao aw chi ta, Alei liata sahrâhpazy chi aw va chi.

²³ Râh liata alôzy nata biehrai tao aw chi ta, Râhsazy ta ama châ dyh aw.

²⁴ Na poh o cha â boh tahpa pahno aw chi ta, Na sahrohzy a ki leipa y aw veih ei.

²⁵ Na chipathlazy ama hluh ngaita aw tahpa pahno aw chi ta, Na pathlazy cha alei sibiepa hawhta ama châ aw.

²⁶ Machâ karôpa ta na thlâ nâ ngia aw, A daihti liata sapiah pahmaohpa hawhta.

²⁷ Moh teh, he hmo he pasia ha pi ta, Â dopa a châ. Nathlie la, pahno mah y, Na pha nawpa a châ hih,” tah ta.