ZAWBÂ 42 - Mara Bible RV (BSI)

Zawbâ reihphacheina nata rona

¹ Chatawhcha Zawbâ ta Abeipa cha a chhy ta:

² “Ato na tao thei tahpa ei pahno, Nâ chhuah hapa cha khâpa hmah pakhâ theipa châ vei.

³ ‘Pahnona hnei leipa ta ei ryhraona a nyuthutuhpa cha, Ahy ma a châ tly?’ na tahpa hawh tlai ta, Ei novâh leipa biezy vaw reih na ta, Ei pahno leipa bie, kei châta noâhchhihpa biezy ei vaw reih ha tlai.

⁴ ‘Nathlie teh, Bie ei reih aw; Bie cha hiahri aw na ta, Nâ chhy mah y,’ tah chi ta.

⁵ Nah ta cha thei ha na ta, Tahmâ deikua cha ei mo ta ei cha hmô haw.

⁶ Chavâta keimasasyh ta thailei a pachâ na ta, Dohlei nata buchadoh liata a tyuhpa ta ei ro haw,” tah ta.

Abeipa ta Zawbâ viasazy a chhorei

⁷ Abeipa ta Zawbâ hnohta cha biezy cha a rei khai nahta, Abeipa ta Temani chyhsa Eliphâ hnohta, “Nâma nata na viasa panozy chô liata ei hie a hâh ngaita. Nâ chakaotuhpa Zawbâ hawhta ei thâtih â dopa ta reih veih ei chi.

⁸ Chavâta tahmâ viahchao tôhpa po sari nata mietaku tôhpa pô sari a chhipa ta, nâ chakaotuhpa Zawbâ lâ vawh u la, nâmo châta raopa hlâna kei hlâ muh vy. Nâ chakaotuhpa Zawbâ ta a reipa hawhta, ei thâtih â dopa ta reih leipa ei chi ta, châhrasala nâ chakaotuhpa Zawbâ ta thlah cha chhâpa aw ei ta, a thlahchhâna cha a pyh awh na ta, nama hruna hawhta nama chô liata hmo tao aw va na,” tah ta.

⁹ Chatanachata Temani chyhsa Eliphâ nata Suhi chyhsa Bildâ nata Nâmâ chyhsa Zôpha zy cha vawh ei ta, Abeipa ta bie a piepa hawhta kei tao ei ta, Abeipa ta Zawbâ thlahchhâna cha a pyh ta.

Abeipa ta Zawbâ byhnâ a pie heih

¹⁰ Zawbâ cha a viasazy châta thlah a chhâ khai nahta, Abeipa ta Zawbâ cha a hneirôna vaohei heih ta. Abeipa ta Zawbâ cha kha hlâta a hneipa hlâta a lie no ta pie ta.

¹¹ A unawhpa nata a sietanô zydua nata kha hlâta a hmiapahnopa zydua ano lâ a vy ei ta, a o liata a hnohta pati dôh ei ta. Abeipa ta a chô liata hmo pha leipa a patlôsapa zydua vâta taokheipa ta a thlapalôh ei ta. Tâkâ nata ngôh kusadizy pie chyu ei ta.

¹² Abeipa ta Zawbâ cha, a daihti hmiatuapa hlâta a daihti hnôhlâ liata byhnâ thata pie via ta, mietaku 14,000, râraoseihpa 6,000, viahchao tôhpa bao 1,000 nata alâ panô 1,000 a hnei.

¹³ Sawchapaw pasari nata sawchanô pathôh a hnei hra.

¹⁴ A sawchanô uhtheipa moh cha Zemimâ bi ta, a panona Kezia bi ta, a pathôhna moh cha Kerehapu a châ.

¹⁵ Cha râh zydua liata Zawbâ sawchanôzy hawhta chanô hmi phapa y veih ei. Ama paw ta ama rilâhpazy hry liata ryuto a rai hra ei.

¹⁶ Cha hnôhlâ ta Zawbâ cha kô 140 hroh via ta, a sawchapawzy, a samohzy, a sahlâhzy, a sachhihzy hmô ta, a pathlazy chhâ palih taihta hmô ta.

¹⁷ Chatanachata Zawbâ cha machâ karôna taih hroh ta, chhâ a palopa ta a thi.