ZAWBÂ 41 - Mara Bible RV (BSI)

¹ “Keipa ta Leviathâ thuapa ta, Chaori ta a paleih na buh thei aw ma?

² Khawhhri ta a hnari daohpa ta, Keipa ta a kâh na thua pahlie thei aw ma?

³ Zawngiah awpa ta châ hawpa ta, Reikah naipa ta bie a châ chho aw ma?

⁴ Tlyzaw ta châ chakaotuhpa ta y awpa ta, Na hnohta biehrai a tao aw ma?

⁵ Pavaw nâ hriapa hawhta a hriapa ta, Na sawchanôzy a daophi awpa ta chaori na pa-ao aw ma?

⁶ Sôhpalietuhpazy ta sôhpaliena châta hmâpa ta, Sôdaohpazy ta pachhaihpa ta amâ rai aw ma?

⁷ Nga kana châtai ta a vo pabiepa ta, Nga chakhaona asei ta a luh na pabie thei aw ma?

⁸ A chô liata ku a pathlapa vaw châ la, A rairuzie a thei aw chi ta, Tao beih khao aw va chi!

⁹ Pachâ tua, Leviathâ pahnie hnabeiseihpa cha, Hnabeiseihna doleipa a châ; Chyhsa ta a hmôpa nahta ngâh khao tyh vei.

¹⁰ Leviathâ hmahta pathyu awpa a ngâhpa Machhyumahrâh ama y vei khiahta cha, Kei chhochhi cha ahy ma ei hmiakô liata a duah thei aw?

¹¹ Ahy ta na pie tua ta ma ei thô awpa a byuh tly? Avâ ry liata hmo to zydua he kei eih mâh a châ tâh.

¹² “A kuphei kyh liata a chalih leipa aw na ta, A thatlôzie nata a pizie angiana kyh liata chhao a chalih aw va na.

¹³ Ahy ma a chôtho a hlaih thei aw? Ahy ma chhâri chabapa ta ano cha a hnia thei aw?

¹⁴ Ahy ma a hmia ochhizy a pahy thei aw? A hâhzy chichhih ngaitapa châ tlôh ta.

¹⁵ A ky cha vyhphaozy patlâhpa châ ta, A phipa ta pachawhpâ khaipa a châ.

¹⁶ A hnia kawpa ta y ei ta, Ama likawh liata ziza chhao a ngia thei vei.

¹⁷ A pazaopa ta, Â ipa ta a patu ei ta, Pachhaih thei awpa châ veih ei.

¹⁸ A hâthihpa ta khaihna papua ta, A mokhaohzy cha my nohchhi khaihpa hawh a châ.

¹⁹ A pakah tawhta meipaleih pua ta, Meihlihzy â vaw zaw.

²⁰ A hnapasu tawhta meikhuh vaw pua ta, Beih a tlaopa nata liaryh kâpa khuh hawhta a vaw pua.

²¹ A hu ta meihei pa-ia ta, A pakah tawhta meipaleih a pua.

²² A rao liata thatlôna y ta, Chichhihna ta a hmia lâta a lâ laih.

²³ A sabiazy a patlopa ta, Liahsa a baipâ khai ha ta, Pasie thei awpa rimâ châ vei.

²⁴ A châh-ao alô hawhta châkaro ha ta, A ry lâta a ypa charona lô hawhta a châkaropa a châ.

²⁵ A kaw thyu nahta, Pasaiphazy chhao ta chi ei ta, A chheichahrie ti ei ta, Âmosasyh â pahno khao veih ei.

²⁶ Zaozi ta chhawh hra sala tiah leipa ta, Asei, li, seichhi zy ta tiah thei hra vei.

²⁷ Thuazy cha sawphao hawhta pachâ ta, Dawh chhao tho hmypa hawh dei a pachâ.

²⁸ Châtai ta ano cha parâsa thei leipa ta, Ano châta cha cheichâ lôzy chhao sâh kô hawh dei a châ.

²⁹ Byuthôzy cha sâh kô hawhta pachâpa châ ta, Seichhi pyuzy a pahneisao.

³⁰ A py lâ chhao beihkao tiahpa hawh châ ta, Sâh tlyna chhaichhi hawhta chiatlao liata â byu tyh.

³¹ Beih a tlaopa hawhta ti a thupa patlao ta, Tilaipi chhao sathaw beih hawhta a pa-ao.

³² A siena hniehnôh patliepa ta paysa ta, Chyhsa ta ti athupa cha sâ pawhpa khiah ma a hnei a tah tyh.

³³ Alei chô liata ano hawhpa rai y leipa ei ta, Ano hawhta china hnei leipa hmohrohneipa y veih ei.

³⁴ Â sâhpa liata a ypa zydua hmô khai ta, A khotlâh kawpa sahrâhpa zydua bei a châ,” tah ta.