ZAWBÂ 40 - Mara Bible RV (BSI)

¹ Abeipa ta Zawbâ hnohta reih lymâ ta:

² “Taochheina a hmô thaipa ta Atotaotheipa a padei aw ma? Khazohpa a eituhpa ta Duah a chhy tua sa,” tah ta.

Zawbâ â chalih

³ Zawbâ ta Abeipa cha a chhy ta:

⁴ “Kei padisaihpa heta khâpa ma ei châ chhy bao aw? Ei pakah ei chahu ha bâ.

⁵ Ei kha reih ha na ta, Châ chhy khao aw va na; Ei no ei reih haw, Pazao khao aw va na,” tah ta.

Abeipa ta Zawbâ a pahao

⁶ Chatawhcha Abeipa ta khisô tawhta Zawbâ cha a vaw chhy heih ta:

⁷ “Chapaw kawpa ta na chai a saih la, Bie cha hiahri aw na ta, Nâ chhy mah y.

⁸ Kei hmâchhâh ma adoleipa ta eina soh aw chi? Nâma nâ do thei nawpa ta ma kei thailei eina pachâ aw chi?

⁹ Khazohpa bâh hawhpa bâh na hnei ma? Ano ao hawhta tôkalôhpa a thuapa ao na papua thei ma?

¹⁰ “Abeina nata zachhihna poh a bu la, Palyupalihna nata rônahna chysia a tobi mah y.

¹¹ Na hiehâhna khô pathlapa kha leihtha la, Chyhsa apalaipa cha tawpâ la panawh mah y.

¹² Apalaipa maih tawpâpa ta panawh la, Moleipazy cha amâ duana su liata tlypâ mah y.

¹³ Ama zydua ta dohlei liata hmaohkha ta pabu la, Hmiasiah thei lei awpa ta alei ry liata ama hmia pahly ha mah y.

¹⁴ Chatanachata nâma ku tlai ta a cha pachha thei tahpa Keima tlai ta ei cha pahnosa aw.

¹⁵ “Behemô he pachâ tua, Nâma ei cha taopa hawhta ei taopa châ ta, Viahchao tôhpa hawhta sibiepa tlâ a bâ hra hih.

¹⁶ Pachâ tua, a chai liata a thatlôna y ta, A py thari liata a hmotaotheina a y.

¹⁷ Sidy hawhta a chaolahmei pachyu ta, A chakhai tharizy phieh pakaohpa a châ.

¹⁸ A ruzy dawh pakaopa hawh châ ta, A kupheizy thua tlai hawhta a châ.

¹⁹ “Khazohpa taopa thatlô chaipa châ ta, A taotuhpa deita ta ano cha zaozi ta â hnia thei.

²⁰ Tlâhpizy ta ano châta nie awpa papua ta, Râhsazy chhao cha liata ama palao tyh.

²¹ Tipo pawpi kô ry liata a zia ta, Tichhoh lohthi kô nohdizy liata â zia tyh.

²² Tipo pawpi kôzy ta nohdi chhôhpa ta, Vahtie rabuhzy ta ano cha ama chadô.

²³ Moh teh, tisaih chi leipa ta, Zawdâh chavah ta a pakah a supa chhao ta a thlazoh vei.

²⁴ Ahy ma a mo a padei thlâh ha nota patu thei ta, Sari ta paaopa ta, A hnari a daoh thei aw tly?”