ZAWBÂ 4 - Mara Bible RV (BSI)

Eliphâ biereipa: Mosiapazy ta thlaochhina ama hmô tyh

¹ Temani chyhsa Eliphâ ta a chhy ta:

² “Na hnohta bi kawh kha reih aw sah la, Na palôh a chhie aw tly ma? Chatahrasala ahy ma rei leipa ta a y thei aw?

³ Moh tua, chyhsa hluhpi pachu ha chi ta, Ku chiehleipazy tha na patlô haw.

⁴ Na biezy ta a hluahpazy pathyu ta, Pakhu thazeipazy tha na patlô tyh.

⁵ Châhrasala tahmâ na chô lia vaw tlô ta, Palôh chhiepa ta na y; Cha hria ta, Ngiarohpa ta na y.

⁶ Na Khazohpa china cha na ngâhna châ tyh vei ma? Na lâpi dopazy cha na hnabeiseihna châ tyh vei ma?

⁷ “Pachâ tua, chyhsa dopa a leidia beih ma? Khataih liata ma mosiapa chhawh pathlahpa ta a y?

⁸ Ei hmô ha ei, Paraona leipalie ta, Tymâna chi a tupazy cha, Chazy tlai cha ama hria tyh.

⁹ Khazohpa hu ta leidia ei ta, A hiehâhna thlih ta a hmôsao ei.

¹⁰ Chakeibarôhneipa a rôh hra sala, Chakeibarôhneipa hrâhpa ta ao papua hra sala, Chakeibarôhneipa thatlôpa hâhzy cha thliepa ta a y tyh.

¹¹ Chakeibarôhneipa thatlôpa cha sa y lei vâta thi ta, Chakeibarôhneipa panô tawzy pai patlapa ta ama y.

¹² “Arulâta ei hnohta bie vaw tlô ta, Ei nah ta bieparu a thei.

¹³ Zâ saduthlienazy hry liata, Chyhsazy mokuh pahâpa ta amâ mô chhôh ta,

¹⁴ China nata chalyuna na vaw tlô thlu ta, Ei ru zydua a chathosa khai haw.

¹⁵ Thlahpa ta ei hmia na vaw chapia ta, Ei pôhhmi thata â loh.

¹⁶ A duah thlâh ha ta, Châhrasala a pizie pahno thei va na. A nothlahpa ei hmia liata vaw y ta, Dâh karoh ha ta, Chatawhcha ao thei na ta:

¹⁷ ‘Thitheipa he Khazohpa hlâta a sia via thei aw ma? Chyhsapa he a taotuhpa hlâta a pathaih via thei aw ma?

¹⁸ A chakaotuhpazy hmahta ngâ leipa sala, A vâlyuhchâpazy taopasipa ta a bai khiah ei ta cha,

¹⁹ Beihlei o liata a pahrâpazy, Dohlei liata abôna lô a bôpazy, Tâbalâpa hawhta thie naopazy chhochhi cha, A ngâ lei pachai aw dia!

²⁰ My nata zâ likawh ta leidia ei ta, Ahy hmah pahno hmâ leipa ta, Chhâzaw ta ama leidia tyh.

²¹ Ama poh o rizy chhiepa châ ta, Sona hnei leipa ta thi tyh veih ei ma?’” tah ta.