ZAWBÂ 39 - Mara Bible RV (BSI)

¹ “Lôkâh sathawhzy taw ama pataw nota na pahno ma? Sakhih a vô nota na hmô ma?

² Ama vô daihti thlâpâzy paki theipa ta, Ama patawna daihti na pahno ma?

³ Ama taw pataw awpa ta, A byu ei ta amâ zeihpa na hmô ma?

⁴ Ama tawzy ama tha vaw y ta, Lyurâhpa liata laiseih ei ta, Pua ei ta ama panôzy lâ kua khao veih ei.

⁵ “Râh alâ he ahy ma a pathlie tly? Alâ chahrapa hraina ahy ma a pathlâ tly?

⁶ Kei ta a o châta râh raohpa pie na ta, A pahrâna châta asi râh ei piepa châ vei ma?

⁷ Khihpi palopasahpa pahneisao ta, Talailih haohtuhpa awhpa ao thei vei.

⁸ Tlâhpizy liata a lao bâ ta, Sibiepa hrohpa to a tlua tyh.

⁹ “Chaoliah tôhpa ta rai a cha hriapa aw ma? Na sahroh o liata â rie khoh aw ma?

¹⁰ Leipalie liata chaori ta buhpa ta, Nâ cha pazipa ta alei na paliesa thei aw ma?

¹¹ A thatlô ngaitapa vâta ano liata a pahniehpa ta, Na raihria awpa ano na thy thlu khai aw ma?

¹² Na sâhzy vaw phaoh aw ta, Sawhri liata a vaw sohpakhy aw tahpa na ngâ ma?

¹³ “Pavawpi cha a ly kawpa ta a mathlawzy chakhyh ta, Châhrasala vawpô mathlaw nata hmizy hawhpa hnei vei.

¹⁴ Alei liata a tihzy thla ta, Chhaohlei ta palalôh awpa ta â râsai.

¹⁵ Phei ta pakei thei ta, Râhsa ta a tlypâ thei aw tahpa pachâ vei.

¹⁶ Ano tachhih leipa hawhta, A tachhihzy chô liata a nôchhie kaw ta; A hriapasanazy cha hraoleipa a châ hapa chhao ta, Pei tah hlei vei;

¹⁷ Khazohpa ta sona pamysa ha ta, Novâhna tovyuh a pie leipa vâta.

¹⁸ Châhrasala a mathlaw pakai ta â râ tita cha, Arâ nata a kiahtuhpa hmah a pahneisao thei.

¹⁹ “Arâ thatlôna he nâma ma a pie chi? A rao liata barôh he nâ ma a tobi chi?

²⁰ Nâ ma khawsu hawhta a chapie awpa ta a tao chi? A hnaphihpa rarôh ypa cha chi â chhih kaw dia!

²¹ A chakie ta saikao liata alei pahaopa ta, A thatlôna chaluah ta; Adyuhna chaihrai a tyh awpa ta a pua tyh.

²² China pahneisao ta, Ngiarohna rai hnei leipa ta, Zaozi a sysai beih vei.

²³ Arâ chô liana cha châtai byh a chachhao ta, Asei nata vyhphao zy a pathlie.

²⁴ Thathyupa ta a chalyupa ta alei bawh ta, Chiahmie pyu vâta a duah molo thei khao vei.

²⁵ Chiahmie a vaw paropa nahta, ‘Khaw, khaw, khaw!’ tah ta; Adyuhna roh lâhlapi tawhta thei ta, Pheisaih hyutuhpazy awhpa ao thei ta, Adyuhna pyu chhao a thei.

²⁶ “Nâma sona vâta ma hmôchhih a zaw ta, Chho lâta a mathlaw a pakai?

²⁷ Nâma biepiepa vâta ma pahmôhpi a pasâh ta, Su sâhpa liata a bu a tu?

²⁸ Lôkâhpa liata pahrâ ta, Lôkâhpa cha a o ta tao ta, Lôkâhpa cha a thokhy ta a tao.

²⁹ Cha tawhna chata a nie awpa moh ta, Lâhlapi tawhta a mo ta a hmô thei.

³⁰ A tawzy ta thisaih sy ei ta, Sawhsawpa yna liata cha, Pahmôpi chhao a y tyh,” tah ta.