ZAWBÂ 38 - Mara Bible RV (BSI)

Abeipa ta Zawbâ â chhy

¹ Chatawhcha Abeipa ta khisô tawhta Zawbâ cha a vaw chhy heih ta:

² “Pahnona a hlao leipa bie hmâpa ta, Ryhraona a pazohsatuhpa cha ahy ma a châ tly?

³ Chapaw kawpa ta na chai a saih la, Bie cha hiahri aw na ta, Nâ chhy mah y.

⁴ “Leilô abôna ei bô no kha khataih liata na y? Na no â vâh khiahta la na chho tua.

⁵ Khatlu ta laipa ta tao awpa ma tahpa ahy ta pachâ ta, A chô liata thliena a paraipa cha ahy ma a châ tly? Na pahno kha zaw!

⁶ Â bônazy khataih liata â bô? Ahy ma a ki lô a bô?

⁷ Deiva awhsizy hla sapakhy ei ta, Khazoh sawzy a lypa ta ama aw no kha?

⁸ “Chhi tawhta tilaipi a vaw pua no kha, Ahy ma a ochhi a khaw tly?

⁹ A chysia châta meihdozy tao na ta, A nawh poh châta zohna chha kaluhpa tao na ta,

¹⁰ A râhri tao na ta, A lâhrei nata a ochhizy taopa ta,

¹¹ ‘He rakha he a vy aw chi ta, Vaw khô aw va chi, Na tichatlaopa rônahpa chhao, he liata a chhâ aw,’ A tahtuhpa kha ahy ma a châ tly?

¹² “Na hro nohzy liata my vaw chhi awpa ta biepiepa ta, Khihdei chhao a y nawpa su na pahmô beih ma?

¹³ Khihdei ta leilô he a pai liata patupa ta, Moleipazy chatho pathlah awpa ta bie na pie beih ma?

¹⁴ Leilô cha chahnaona ry liata beihlei hawhta pizie pahneisa ta, A hmiaphao chysia hawhta a lâ patluapa ta a tao.

¹⁵ Ama khaihna cha moleipazy phihpa châ ta, Ama bâh chaluahpa chhao thliepa a châ.

¹⁶ “Tilaipi hnawhzy liata a ngiapa ta, Ti athupa chhôh liata nâ hlai beih ma?

¹⁷ Thina chhikao na hnohta palâsapa a châ beih ma? Thina nohpahli chhikao na hmô beih ma?

¹⁸ Alei kawhna zie na pahno thei ma? Cha zydua cha na pahno khai khiahta cha, na chho teh.

¹⁹ “Khaihna pahrâna su lâ siena lâpi khataih liata y ta, Zohna su cha khataih liata a y?

²⁰ Khaihna cha a yna su lâ nâ chhi thei aw ma? A o lâpizy na pahno ma?

²¹ Na pahno ngyu aw, Cha daihti liata pih ha chi ta, Na hro nohzy a hluh ngaita hih!

²² “Dâhaw sopakhyna liata nâ ngia beih ma? Pareih sopakhyna su na hmô beih ma?

²³ Chazy cha nôpona daihti châta ei khaipa châ ta, Chariah adyuhna noh châta ei khaipa a châ.

²⁴ Khaihna piepapuana su lâpi cha khataih liata y ta, Alei chô liata a hiepatlapa nochhi thlih puana cha khataih liata a y?

²⁵ “Ahy ma avâ katlâ ti lo nawpa asai chao ta, Pachie tla nawpa lâpi a tao tly?

²⁶ Ahy ma chyhsa y leina chhaohlei liata avâ pasuasa ta, Chyhsa y leina râhchawhpa liata avâ pasuasapa ta,

²⁷ Râh chhiepa nata râh raohpa lôhhrâ patlô ta, Chhaohlei tawhta sibiepa a papyusa tly?

²⁸ “Khihti ta paw a hnei ma? Diatizy he ahy ma a sa?

²⁹ Dâhaw tlo he ahy chhi tawhta ma a pua? Avâ diati he ahy ma a sa?

³⁰ Tizy alô hawhta châkaro ei ta, Ti athupa chôpho dâhaw tlo lâta â lie.

³¹ “Awhsicharu khi chahrypa ta, Vaothawlâpia khi na pathlâ thei aw ma?

³² Awhsi hlaozy khi ama daihti liata papuasapa ta, Chavyh a taw chhaota nâ chhi thei aw ma?

³³ Avâzy liata hmo yzie pahnopa ta, Alei liata ama biehneina na padua thei aw ma?

³⁴ “Avâ tisaih ta cha vao awpa ta, Meihdozy khi na awsao thei aw ma?

³⁵ Dôhlazy na tuana lâ siepa ta, Na hnohta, ‘He liata eima y,’ Na patahsa thei aw ei ma?

³⁶ Ahy ma palôh cha sona ta tobi ta, Pachâna hnohta novâhna a pie thei tly?

³⁷ Ahy ma meihdo ziepa rei theina taihta sona hnei ta, Ahy ma avâ titheih a patlai thei tly,

³⁸ Dohlei alei châpa lâta a lie ta, Alei tlozy amâ pazao khai ha nota?

³⁹ “Chakeibarôhneipa châta sa taipa ta, Chakeibarôhneipa lochopazy aoh lôhrâ na patlô thei aw ma,

⁴⁰ Ama lôpu liata a byu ei ta, Chhohbuh hry liata amâ pazawh thlâh ha nota?

⁴¹ Raawh tawzy Khazohpa lâ awh ei ta, Nie awpa hnei leipa ta ama viavi nota, Ahy ma raawhzy cha nie awpa a pie tyh tly?”