ZAWBÂ 37 - Mara Bible RV (BSI)

Elihu ta Khazohpa rônahna a phuah

¹ “Chavâta ei palôh a chalyu ta, A yna tawhta â zaw pathlah.

² Â rôhpa pyu a phapa ta nathlie u la, A pakah tawhta ao a vaw vihpa nathlie teh u.

³ A ao cha avâ ry zydua liata pavihsa ta, A dôhla kaokih taihta a chakeihsa.

⁴ Cha khai tawhta â rôhpa ao vaw pua heih ta, A rônahna ao tôkalôhpa hawhta pathuasa ta; A ao khaipaliepa ama theipa chhao ta, Khataih tawhta a vaw puapa ma tahpa pahno veih ei.

⁵ Khazohpa cha noâhchhihpa ta a ao pathuasa ta, Eima pahno pha leipa hmo rônahpazy a tao.

⁶ Dâhaw hnohta, ‘Alei la tla teh,’ tah ta, Vâsua hnohta, ‘Avâ katlâ suah teh,’ a tah.

⁷ A taopa chyhsazy ta a hmotaopa ama pahno thei nawpa ta, Chyhsa to ku a chahry.

⁸ Râhsazy amâ nyuna liata a ngia ei ta, Ama lôpu liata ama pahrâ.

⁹ Chho lâ tawhta thlihpipa kaw pathli ta, Maw lâ tawhta ziza chakuapa a za pathli.

¹⁰ Khazohpa hu ta dâhaw tlo tao ta, Ti kawhpazy thlai a kua tyh.

¹¹ Meihdo chhapa cha ti ta pahnasa ta, Meihdozy ta Khazohpa dôhla cha ama hiepatla tyh.

¹² Ano chhihthana ry liata a pahieh ei ta, Hmohrohneipa hro theina khizaw zydua liata, A biepiepa zydua ama patlô tyh.

¹³ Chyhsazy pado nawpa ta tlyma, A râh chhaohlei papha naw­pa ta tlyma, A kyhpachâna palâsa nawpa ta tlyma, Meihdozy cha a paysa tyh.

¹⁴ “Hy Zawbâ y, he bie he nathlie la, A chalih la, Khazohpa hmotao noâhpazy pachâ tua rai.

¹⁵ Khazohpa ta chazy chô liata kheihta ma biehneipa ta, A meihdo dôhla chhao a pakhaihsa tahpa na pahno ma?

¹⁶ Kheihta ma meihdozy avâ liata amâ pahai tahpa pahnopa ta, Pahnona kipa a hneipa hmotao noâhpazy na pahno khai thei ma?

¹⁷ Nâ, chho thlih vâta alei a chalih nota lalôh chi ta, Na chysia ry liata mathlai a pua khai hapa chi khata,

¹⁸ Thua daipa thlalâ hawhta a châ karôpa avâ khi Ano hawhta na parai thei aw ma?

¹⁹ “Ano liata eima rei awpa cha miah pachu mah y, Zohna vâta a pachâna eima pahno khao vei hih.

²⁰ Bie ei reipa kyh Khazohpa chho awpa a byuh ma? Palâ awpa a khohpa chyhsa ama y beih ma?

²¹ “Ziza ta avâ pathaisa ta, Avâ a pathai kaw nota, Noh a moh theipa y veih ei.

²² Maw lâ tawhta ngôh rôh khaihpa za pua ta, Khazohpa cha rônah ngaitapa ta â tobi.

²³ Atotaotheipa cha hmô thei leipa pi ta, Ano cha hmotaotheina rônahpa a hneipa a châ; Adona nata siana hluhpi chhao hnei ta, Âdoleipa ta hmo tao beih vei.

²⁴ So â tahpazy a uasa hlei leipa vâta, Chyhsazy ta ano cha ama chi ngaita,” tah ta.