ZAWBÂ 36 - Mara Bible RV (BSI)

Elihu ta Khazohpa rônahna a reithai

¹ Elihu ta reih lymâ ta:

² “Buakhata na pahno thai via chy la, ei cha pahmô tua aw, Khazohpa vyuhpa ta bie rei awpa ei hnei.

³ Ei pahnona he lâhlapi tawhta ei lapa châ ta, Nâ Taotuhpa cha siana ei patosa aw.

⁴ Ei biezy he adoleipa châ cheita leipa ei ta, Pahnona kipa a hneipa chyhsa na hnohta a y hih.

⁵ “Pachâ tua, Khazohpa cha thatlôpa châ ta, Châhrasala ahy hmah mohnao leipa ta, Palôh thatlôpa nata a ipa a châ.

⁶ Moleipa pahlôh leipa ta, Pasataopazy deikua cha amâ dona a pabohsa.

⁷ Mosiapazy a heihsai leipa ta, Abeizy hnohta beidyuchhai liata chhâzaw ta patyusa ta, Cheihchalopa ta ama y.

⁸ Chyhsazy bâlia ta chahry ei sala, Pasataona chaori ta ama buh khiahta cha,

⁹ Ama hmotaopa nata paraona zy âmo chho ta, Nôchhie ngaitapa ta ama hrozie a pahnosa ei.

¹⁰ Pachuna lâta ama nah pavâsa ta, Moleina kuasai awpa ta bie a pie ei.

¹¹ A bie nathliepa ta ano ama chakao khiahta cha, Ama nohzy a phapa ta hmâh aw ei ta, Ama kôzy palôhtlâhpa ta ama pachhâ aw.

¹² Ama nathlie leipa khiahta deikua cha, Zaozi ta leidia aw ei ta, Pahnona hnei leipa ta ama thi aw.

¹³ “Palôh liata Khazohpa a hnei leipazy cha, Hiehâhna pachô ei ta; Bâlia ta a chahry no chhao ei ta, Baona hiapa ta awh veih ei.

¹⁴ Thyutliapa ama châ nota thi ei ta, Achhyna o liata chapaw âzuahpazy hnohta ama hro a chhâ.

¹⁵ Pasataopazy cha ama pasataona hmâpa ta pachha ta, Ama pasataona hmâpa ta ama nah a pavâsa.

¹⁶ Pachârôhna tawhta cha papuapa ta, Pakhâpadiena y leina su kawhpa lâ châ chhi ta, Pati pahâh chaipazy ta na tlâhkhai a bie.

¹⁷ “Châhrasala moleipazy pachiana ta nâma tlao cha vi ta, Pachiana nata adona ta a cha patu haw.

¹⁸ Hneirôna ta châ reipasaopa chô liata na hiehâh sala, Panaopapana hluhpi vâta lâpi tlei khah y.

¹⁹ Na hneirôna ta châ duakheipa ta, Na thatlôna ta na nôpona tawhta a cha pachha thei aw ma?

²⁰ Phopizy zâ ta ama yna su tawhta ama leidia ty, Chavâta zâ a vaw tlô awpa tlaichhai hlei khah y.

²¹ A vaih la, moleina lâ a heih khah y, Châhrasala cha cha pasataona hlâta a tlyh viapa lyu tlôh chi.

²² Moh teh, Khazohpa cha a hmotaotheina vâta cheihchalopa ta y ta, Ano hawhpa pachutuhpa ahy ma a y?

²³ Ahy ma a lâpi awpa raopa ta, Ahy ma, ‘Hmo do leipa na tao,’ a tah thei tly?

²⁴ “A raihria reipapha awpa a thei mah y, Chyhsazy chhao ta hla ta ama reithai hra mâh tâh.

²⁵ Cha cha chyhsapa maihta moh ei ta, Chyhsazy ta lâhlapi tawhta ama sai.

²⁶ Pachâ teh, Khazohpa cha rônah ngaita ta, Keimo deikua ta pahno ma pi; A kô ziepa chhao reipati theipa châ vei.

²⁷ Tihuzy avâ lâ sy ta, A ameih cha vâsua lâta a pathlaoh tyh.

²⁸ Cha cha avâ ta za patlai ta, Chyhsapa chô liata a hluhpi a za sua thlu tyh.

²⁹ Ahy ma meihdozy a pasiezie a novâh ta, Ahy ma Khazohpa poh o tawhta tôkalôhpa a thuazie a pahno tly?

³⁰ Pachâ teh, a chheipâh liata a dôhla hiepatla ta, Tilaipi chaozy a vao khai haw.

³¹ Cha hawhna chata phopizy chô liata ryureih ta, Niedo hluhpi a pie ei.

³² A ku cha pachie ta pabie ta, Â nuapa tla thlu awpa ta bie a pie tyh.

³³ Tôkalôhpa a thuapa ta a thâtih phuah ta, Viahchao taihta a vaw tlô awpa a phuah tyh.”