ZAWBÂ 35 - Mara Bible RV (BSI)

Elihu ta Zawbâ thailei a pachâ

¹ Elihu cha reih lymâ ta:

² “Na reipa he hmo dopa ta na pachâ ma? ‘Khazohpa hmia liata ei do,’ tah chi ta,

³ Châhrasala, ‘Khâpa athôhna ma ei hnei,’ tah heih chi ta, ‘Molei leipa ta ei ypa ta khâpa ma eina phahnai?’ na tah heih tlôh.

⁴ Ei châ chhy aw, Na viasazy chhao ei chhy pâ aw.

⁵ Ua la, avâzy lâ khi sai tua, Nâ hlâta a sâh viapa meihdozy khi moh tua.

⁶ Na moleipa chhao ta, Khâpa pei ma a chô liata na hria tly? Na paraona a pôhpa chhao ta, A châta khâpa ma a châ hlei?

⁷ Mosiapa na châpa chhao ta, A hnohta khâpa ma pie chi ta, Na ku tawhta khâpa ma a hmô hlei tly?

⁸ Na moleina cha nâ hawhpa chyhsa chô liata hria ta, Na siana chhao chyhsapa châta dei a phahnai.

⁹ “Tlybaina hluhpizy vâta zawpizy awh ei ta, Hmotaotheipazy bâh vâta baona ama hiah.

¹⁰ Châhrasala ahy ta hmahta, ‘Nâ taotuhpa Khazohpa cha khataih liata y ta, Zâ ta hlazy nâ pietuhpa cha khataih liata a y;

¹¹ Râhsazy a pachupa hlâta miah pachu hluh via ta, Vâ pavawzy hlâta so viapa ta miah taotuhpa cha, Khataih liata a y?’ tah veih ei.

¹² Cha liata awh ei ta, Châhrasala moleipazy apalaina vâta a chhy vei.

¹³ Hmeiseih ta cha, Khazohpa ta awh thlâhthlipa thei leipa ta, Atotaotheipa ta cha hawhpa cha pachâ vei.

¹⁴ Cha hawhta a châ nota, Khazohpa na hmô leipa hawhta reih chi ta, Bie pachia awpa cha a hmiakô liata y ta, Na hâ thlâh hapa hawhta na reipa chhochhi cha, A cha nathlie nâ pangiasa ma?

¹⁵ Khazohpa cha a hiehâhna ta cha hrie leipa ta, Paraona a ngia hlei leipa vâta,

¹⁶ Zawbâ cha hraoleipa biezy reipa ta a pakah â ta, Pahno tlôh leipa ta bie hluhpi a reihpa a châ hih,” tah ta.