ZAWBÂ 34 - Mara Bible RV (BSI)

Elihu Khazohpa adona â duakhei

¹ Elihu ta reih lymâ ta:

² “Nâmo chyhsa sopazy saih u, Ei biezy nathlie u la; Nâmo, hmo a pahno thaipazy saih u, Nama nah pachôh teh u;

³ Pakah ta niedo pahâna a pahnopa hawhta, Nakhaoh chhao ta bie a pasia tyh.

⁴ Hmo dopa a tlyh sih la, Keimo tlai ta hmo phapa pahno ei suh u.

⁵ Zawbâ ta, ‘Adopa châ na ta, Châhrasala Khazohpa ta ei dona na lapa ta;

⁶ Ei do thlâh hapa chhao ta, Ahaihpa hawhta pachâpa châ na ta, Paraona ei hnei lei tarawpa ta, Libaw hmah ei phaopa he a tlâh thei awpa châ khao vei,’ tah ta.

⁷ Zawbâ hawhpa chyhsa he ahy ma a y, Ti hawhta mohnaona doh ta,

⁸ Hmoparaopazy a pahlaopa ta, Moleipazy hry liata a chareipa chyhsa cha?

⁹ ‘Khazohpa liata a lypa he, Chyhsapa châta khâpa hmah phahnai bao vei,’ A vaw tahpa châ tlôh ta.

¹⁰ “Chavâta nâmo, hmo a pahno thaipazy saih u, Na nathlie teh u; Khazohpa cha hmo moleipa tao beih leipa aw ta, Atotaotheipa cha hmo doleipa tao beih aw vei.

¹¹ Chyhsapa cha a hmotaopa hawhta viarithô aw ta, A yzie hawhta a chô liata a patlôsa aw.

¹² Khazohpa cha hmo moleipa tao beih leipa aw ta, Atotaotheipa ta adona pakosa aw vei.

¹³ Ahy ma ano cha alei mohôh awpa ta soh ta, Khizaw pôhpalôhpa he a chô liata a khaih tly?

¹⁴ A palôh ta â chhuah khiahta cha, A thlahpa nata a hu la pakhua thei ta,

¹⁵ Sapa zydua â raohpa ta leidia khai aw ei ta, Chyhsapa chhao dohlei lâ a kua heih aw.

¹⁶ “Na pahno thai khiahta cha, He bie he thei la, Ei reipa he nathlie tua.

¹⁷ Adona a haopa ta ryu a reih thei aw ma? Mosiapa nata thatlôpa cha thailei na pachâsa aw ma?

¹⁸ Ano cha abei hnohta, ‘Dyutlai leipa,’ tah ta, Nôpawpazy hnohta, ‘Chyhsa moleipa,’ a tah theipa châ vei ma?

¹⁹ Abeisawzy khokhei via hlei leipa ta, Dyhchhiepa hlâta dyhphapa hmia a moh via hlei leipa châ vei ma? Ama zydua ta ano kuzô sai châ veih ei ma?

²⁰ Eikhapi ta thi ei ta, Zâcho ta a chalyu ei ta chyhsazy ama khô; Thatlôpazy chhao lapa ama châ, Chyhsa ku ta deikua châ vei.

²¹ “A mo ta chyhsapa lâpizy tawpâ ta, A phei chakâpa zydua a hmô khai.

²² Hmoparaopazy a nyu nawpa ta, Zohna y leipa ta, Thina nohpahli chhao y vei.

²³ A hmiakô liata pachiana liata a luah awpa ta, Khazohpa ta chyhsa châta daihti a rao awpa byuh vei.

²⁴ Chyhsa thatlôpazy cha ama thâtih pasia byuh leipa ta parao ta, Ama su liata mohropazy a padua ei.

²⁵ Ama hmotaopazy pahno ta, Âmo cha zâ ta parao ta, A chanaoh khai ei.

²⁶ Ama moleina vâta âmo cha, Chyhsa zydua hmô theina su liata a tu ei;

²⁷ Ano ama pazipa tleisai ei ta, A lâpizy ama pachâ leipa vâta.

²⁸ Dyhchhiepazy awna ao a kô patlôsa ei ta, Phahlapazy awna ao a thei.

²⁹ Châhrasala â chalih ha khiahta cha, Ahy ma thailei a pachâsa thei aw? A hmia a nyu ha khiahta cha, Ahy ma a hmô thei aw? Phopi ta hmô thei leipa aw ta, Chyhsapa ta hmô thei hra aw vei.

³⁰ Khazohpa a pahno leipa chyhsa cha ryu a rei awpa châ vei, Chataleipatala khoheih liata phopi â ao pathlei aw.

³¹ “Chyhsa ta Khazohpa hnohta, ‘Hriena hmô ha na ta, Hmoparao khao aw va na;

³² Ei hmô leipa kyh cha na pachu la, Moleina ei vaw tao ha khiahta cha, Tao heih khao aw va na,’ tah sala,

³³ Ro khoh tlôh leipa chi ta, Khazohpa ta na khozie hawhta lymâ a cha pie aw ma? Kei ta cha reipa leipa aw na ta, Nâma tlai ta biepathluna na tao awpa a châ. Chavâta na pahnopa cha reih teh.

³⁴ Chyhsa novâhpazy ta na chho aw ei ta, Ei bie a theipa chyhsa sopa ta cha,

³⁵ ‘Zawbâ he pahnona hnei leipa ta bie reih ta, A biezy liata sona y vei,’ ama tah aw.

³⁶ Zawbâ cha moleipa hawhta achhyna a taopa vâta, Achhâna taihta pasiapa châ sala ei tah kaw dia!

³⁷ A moleina baichha nawpa ta Khazohpa chakhia ta, A ku miah chabaih chiepa ta, Khazohpa chakhiana bie a papôh tyh.”