ZAWBÂ 33 - Mara Bible RV (BSI)

Elihu ta Zawbâ a chhorei

¹ “Hy Zawbâ y, tahmâ ei biereipazy he thei la, Ei bie zydua nathlie mah y.

² Moh teh, ei pakah â na ta, Ei pakah liata paleih ta bie a reih hih.

³ Ei biezy ta ei palôh a dozie palâsa ta, Ei hmaozy ta ama pahnopazy âdopa ta ama reih.

⁴ Khazohpa Thlahpa ta na tao ta, Atotaotheipa hu ta hrona eina pie.

⁵ Nâ chhy thei khiah nâ chhy tua, Ei hmiakô liata na biezy paziah la, Nâ duana pasia tua.

⁶ Pachâ teh, Khazohpa hmiakô liata la, Nâ hawhpa châ na ta, Kei chhao beihlei tawhta vipa ei châ.

⁷ Moh teh, ei chichhihna ta cha pachisa leipa sala, Ei hnawpazy ta cha vi tu khah sy.

⁸ “Ei nah theina liata rei ha chi ta, Na bie pyuzy chhao ei thei haw.

⁹ ‘Hmoparaona hnei leipa na ta, Pathaih na ta; Keima liata moleina y leipa ta, Ei pathaih.

¹⁰ Châhrasala Khazohpa ta eina leih nawpa tlua ta, A chariahpa hawhta eina pachâ.

¹¹ Ei pheizy keihrai na dai ta, Ei yzie zydua a ngia lymâ,’ tah chi ta.

¹² “Moh teh, ei châ chhy aw, He kyh liata la a do va chi; Khazohpa cha chyhsapa hlâta rônah viapa mâh a châ tâh.

¹³ Khazia ano cha chakhiapa ta, ‘Chyhsapa biezy la a chhy aw vei,’ na tah tly?

¹⁴ Khazohpa cha kao kha ta reih ta, Kao no ta chhao reih ta, Chyhsapa deikua ta pahno thai tyh vei.

¹⁵ Mâ lâ ta, zâ ta aluahna liata, Chyhsazy ama mokuh pahâ lichih ta, Ama rakhô liata ramâ ama khaih nota,

¹⁶ Chyhsazy nah pahy ta, Zikyurâna ta âmo cha a pachisa ei;

¹⁷ Chatanachata chyhsapa cha a hmotaopa pathleihsapa ta, Apalaina cha ano tawhta nyupa ta y aw ta,

¹⁸ A thlahpa khaohtlô tawhta pabohsapa ta, A hrona zaozi tawhta a pabohsa aw.

¹⁹ “Chyhsapa cha pasana ta a rakhô liata chhorei theipa châ ta, A ruzy pasasapa ta chhorei theipa a châ hra.

²⁰ Chatanachata a hro ta pati pasi ta, A aoh ta pati pahâh chaipa chhao a pasi.

²¹ A sapa zaohpa ta lei lymâ ta, A ru a lâ tyh leipazy chhao â lâ khai tyh.

²² A thlahpa khaohtlô a hnia via lymâ ta, A hrona chhao thina a tlôkheituhpazy â hnia via lymâ.

²³ Chyhsapa hnohta a châta hmo dopa chho awpa ta, Ano chhâh a châhpa vâlyuhchâpa, Sâh kha liata pakha a tlypa lyuhchâpa y sala,

²⁴ Khazohpa ta chyhsapa cha zawh a ngiahpa ta, Vâlyuhchâpa hnohta, ‘Khaohtlô lâ a zu awpa tawhta chyhsapa kha pachha mah y, A chatlai nawpa ei hmô haw;

²⁵ A sapa cha hawtipa sa hawhta thieh heih sala, A thyutlia thatlôna nohzy vaw kua heih mawh sy,’ A tah khiahta cha,

²⁶ Chyhsapa cha Khazohpa lâ thlahchhâ ta, Khazohpa ta chyhsapa cha a pyh ta, Chyhsapa cha Khazohpa hmia hmôpa ta a lypa ta awh ta, Khazohpa ta a siana cha chyhsapa hnohta a pie pakhua heih.

²⁷ Chyhsapa cha chyhsazy hmiakô liata a phuah ta, ‘Hmoparaopa ta biedopa pako na ta, Châhrasala viarithôpa châ va na.

²⁸ Khaohtlô lâ zu awpa tawhta ei thlahpa pachha ta, Ei hrona ta khaihna a hmô aw,’ a tah aw.

²⁹ “Pachâ teh, cha hmo zydua cha Khazohpa ta tao ta, Ei no ei thôh taihta chyhsapa chô liata a tao.

³⁰ A thlahpa khaohtlô tawhta a chhi pakhua heihpa ta, Hrona khaihpa ta a chô liata a khaih thei nawpa ta, Cha hmo cha a taopa a châ.

³¹ Hy Zawbâ y, na nah pachôh la, Na nathlie mah y; A chalih teh, Bie ei vaw reih tua aw.

³² Bie na hnei khiahta cha, nâ chhy mah y; Reih teh, thai cha pachâsa awpa ei khoh.

³³ Bie na hnei vei khiahta deikua cha, Ei reipa na nathlie mah y; A chalih la, sona ei cha pachu aw,” tah ta.