ZAWBÂ 32 - Mara Bible RV (BSI)

Elihu ta Zawbâ viasa pathôhzy a chhorei ei

¹ Zawbâ cha ano mo liata sia â tah hapa vâta, a viasa pathôhzy ta a chhy awpa a chhuah khao veih ei.

² Châhrasala Buzi chyhsa Râmi pathla Barâkhe sawchapawpa Elihu cha a pathi thata ia ta. Khazohpa thaipachâ leipa ta ano tlao thai â pachâpa vâta, Zawbâ chô liata a pathi a ia ngaitapa a châ.

³ Zawbâ viasa pathôhzy chhao, Zawbâ adoleina phuah tlôh ei ta, achhyna phapa ama hnei hlei leipa vâta, Elihu cha âmo chô liata chhao a pathi a ia ngaita hra.

⁴ Âmo cha ano hlâta uhthei viapa ama châpa vâta, Elihu ta âmo pareisa tua ta, ano cha daihti rypaohpa a hâpa a châ.

⁵ Cha chyhsa pathôhzy pakah liata achhyna y vei tahpa a pahno nahta, Elihu cha a pathi ia ngaita ta.

⁶ Chatawhcha Buzi chyhsa Barâkhe sawchapawpa Elihu ta Zawbâ cha a chhy ta: “Kei cha kô hawtipa châ na ta, Nâmo cha kô uhtheipa nama châ; Chavâta chi na ta, Ei pachâzie chhao cha chho ngâh veih ei na.

⁷ ‘Nohzy ta bie reih ei sala, Kôzy ta sona pachu mawh ei sy,’ tah na ta.

⁸ Châhrasala chyhsa liata thlahpa a ypa, Atotaotheipa hu ta, Ano cha pahnona a pahneisapa tlao a châ.

⁹ Kô hluhpa maihta soh hlei leipa ei ta, Machâpa maihta hmo dopa pahno hlei veih ei.

¹⁰ Chavâta ei reih hra aw, Na nathlie u la, ei pachâzie na pareisa hra teh u.

¹¹ “Pachâ teh u, nama bie hâ na ta, Rei awpa nama pathâpazi no chhao taihta, Sona bie nama reipazy ei nathlie.

¹² A pha ngaitapa ta cha nathlie ei na ta, Pachâ teh u, Zawbâ a pazei theipa y leipa ei chi ta, A biezy a chhy theipa y veih ei chi.

¹³ ‘Sona cha eima hmô haw, Chyhsapa châ leipa ta, Khazohpa ta a pachhaipadai aw,’ nama tah pathlei aw tahpa ei chi kaw.

¹⁴ Zawbâ biezy ta kei einâ nua leipa vâta, Nâmo biezy hmâpa ta a chhy aw va na.

¹⁵ “Ngiarohpa ta y ei ta, A chhy khao leipa ei ta, Rei awpa hnei khao veih ei.

¹⁶ Bie rei leipa ta a duah ei ta, Amâ chhy khao leipa chhao ta, Ei hâ thlâh chy aw ei ma?

¹⁷ Kei chhao reih bâ hra aw na ta, Ei pachâzie ei phuah bâ hra aw.

¹⁸ Bie rei awpa hluhpi hnei na ta, Kei liata a ypa thlahpa ta eina pareisa raruah ha bâ.

¹⁹ Pachâ teh u, kresawhti pamai hapa hawhta ei chhôh po ta, Savo titheih thiehpa hawhta a pa daihmâ.

²⁰ Ei hua thei nawpa ta bie ei rei awpa byuh ta, Ei hmao pahypa ta ei chhy awpa a byuh.

²¹ Ahy hmah khokhei via leipa aw na ta, Ahy hmah papyupahly aw va na.

²² Papyupahlyzie chhao thai hra va na, Chataleipatala nâ Taotuhpa ta thlai eina la pathlei aw na.”