ZAWBÂ 31 - Mara Bible RV (BSI)

Zawbâ ahawna hnôhchaipa

¹ “Ei mo châta biehrai tao ha na ta, Kheihta ma laihsa kôpa cha ei moh thei aw?

² Chô Khazoh tawhta ei tovyuh khâpa châ aw ta, Atotaotheipa tawhta ei ryuto khâpa ma a châ aw?

³ Chhiena cha sialeipazy châta châ ta, Raona cha moleipazy châta châ vei ma?

⁴ Ei lâpizy hmô ta, Ei phei chakâpa zydua a reih khai vei ma?

⁵ “Adoleina liata chareipa ta, Dôveina lâta ei phei â para khiahta cha,

⁶ Pathliahna dopa ta na pathliah ei sala, Ei dona cha Khazohpa ta pahno mawh sy!

⁷ Ei phei ta lâpi tleisai sala, Ei palôh ta ei mo zipa ta, Ei kuzy liata avyhpa â bai khiahta cha,

⁸ Ei hiepa cha mohropa ta nie sala, A pyuhpa cha a thari chakhiapa châ mawh sy!

⁹ “Ei palôh he chanô liata reipasaopa ta ypa ta, Ei opa ochhi liata â byhpa ei châ khiahta cha,

¹⁰ Ei lapinô ta chyhsa sâh daih sala, Mohropazy ta a khu thlu mawh ei sy.

¹¹ Cha cha moleina pasichhihpa châ ta, Ryureituhpazy ta ama hrie thlyu awpa moleina a châ.

¹² Chhokhih taihta a kâ theipa mei châ ta, Ei kôvei zydua a thari taihta a kâ khai theipa mei a châ.

¹³ “Ei seichapaw tlyma, ei seichanô tlyma, Ei chô liata palôh tlâh leina bie ama rei tita, Amâ dona ei pachâpa leipa ei khiahta cha,

¹⁴ Khazohpa a thyu tita kheihta ma ei tao aw? Hiahrina a tao tita kheihta ma ei chhy aw?

¹⁵ Chhi chhôh liata keima nâ taotuhpa ta ano chhao tao hra vei ma? Chhi chhôh liata miah a palaiseihsa raihriepa cha pakha châ vei ma?

¹⁶ “Dyhchhiepazy khopa pakhâpa ta, Nôhmei mo pabâ aw sah la;

¹⁷ Ei pati keima dei ta niepa ta, Paw hnei leipazy paniesa hra leipa aw sah la;

¹⁸ Ei thyutlia daihti tawhta paw hnei leipazy cha, Ama paw o hawhta ei o liata laiseih tyh ei ta, Ei nô chhi chhôh tawhta, Nôhmeizy ei vaw chhihtha tyhpa ei châ ta;

¹⁹ Chysia hnei lei vâta athipa hmôpa ta, Phahlapa sasaihpa ta a ypa hmô aw sah la;

²⁰ Ei mietaku hmi ta a palalôh leipa vâta, Byhnâ nâ awpa khoh leipa hmô aw sah la;

²¹ Ryureina liata châhkheituh ei hneipa vâta, Paw hneileipazy chô liata ku a vaw hy hapa ei châ khiahta cha;

²² Ei phiahkao ei ngiatlâh tawhta tla sala, Ei bâh he ei kohkaru tawhta tlo mawh sy.

²³ Khazohpa tawhta chhiena a vaw tlôpa vâta chipa ta y na ta, A rônahna vâta cha hawhpa hmozy cha tao ngâh va na.

²⁴ “Ngôh cha ei pahniehna ta taopa ta, Ngôh suapa cha ei ngâchhâpa ta hmâh aw sah la;

²⁵ Ei hneirôh kawpa vâta a lypa ta, Ei ku ta hmo hluhpi a hmôpa vâta a ly kaw aw sah la;

²⁶ Noh a khaih nota mopa ta, Thlâpâ rônahpa ta a sie ngâpa moh aw sah la;

²⁷ Ei palôh arulâta reipasaopa ta ypa ta, Ei hmao ta ei ku a vaw pahnâ ha khiahta cha;

²⁸ Cha chhao cha ryureituhpazy ta ama hrie thlyu awpa moleina a châ, Chô Khazoh chô liata ngâchhih leipa ei châ awpa vâta.

²⁹ “Nâ haotuhpa ta raona â tyh tita a lypa ta, Hmo pha leipa ta a tla thlu nota thaphapa ta ei vaw y hapa chhao ta,

³⁰ A chô liata chhiesapa ta a hrona lapa awpa ta, Ei pakah pamoleisa beih va na.

³¹ Ei poh o liata chyhsazy ta, ‘Zawbâ sa cha lôhrâtlôna taihta eima nie sy,’ ama tah tyh.

³² Khitlyhpa châta ei ochhi ei pahypa vâta, Sievawhpa khiliah liata a rie beih vei.

³³ Mohropazy taozie hawhta ei hmoparaopazy phihpa ta, Ei moleinazy ei palôh liata ei nyu khiahta cha,

³⁴ Zawpizy chi ngaita aw na ta, Ei chhôhkhazy mohnaona ta ei thlah eina pazo awpa vâta, A chalih aw na ta khô pua ngâh aw va na.

³⁵ Aw, ei bie a nathliepa pakha chhâ y ei sala ei tah kaw dia! Moh teh u, ei thaichâna bie liata ei moh ei ro thlu hih, Atotaotheipa ta nâ chhy mawh sy. Aw, ei khakhaipa ta eina leihna bie cha ropa ta ei hnei mawh sala ei tah kaw dia!

³⁶ Ei ngiatlâh ta a pu aw na ta, Lakho hawhta ei kho awpa tlai.

³⁷ Ei taopa maih chho aw na ta, Ryureituhpa hawhta ano cha ei pangai awpa tlai.

³⁸ “Ei râh ta na chakhia ta na awsaopa ta, A ti lâpizy hmaohkha ta chaphôhtu ei sala;

³⁹ A kôveizy a mâ pie leipa ta niepa ta, A hneituhpazy thina ei tlôkhei khiahta cha,

⁴⁰ Âtâ sâh vyuhpa ta ahlohzy pyuh sala, Bâli sâh vyuhpa ta sibie rupazy pyuh mawh sy,” tah ta. He liana heta Zawbâ biezy cha a chhâ haw.