ZAWBÂ 30 - Mara Bible RV (BSI)

Zawbâ bie a reih pazao: A pasataona vâta a vâ â sâh

¹ “Tahmâ deikua cha, Kei hlâta seihnai viapazy ta na pahneisao ei ta; Ei sahroh vaituhpa izy hry liata pahlao awpa ei khoh leipa Ama pawzy khata eina pahneisao bâ ei.

² Chyhsa thachhâ hapazy tlai cha, Ama ku thatlôna tawhta khâpa athôhna ma ei hmô aw tly?

³ Phahlapa nata nodipa ta zaoh ei ta, Râraohpa nata roryhrapa chhaohlei zy zâ ta patei ei ta;

⁴ Thobuh hnazy nata âhnalasi iahpazy lyupa ta, Ophi thari taihta ama nie.

⁵ Chyhsapa akaona tawhta papuapa châ ei ta, Parutuhpa hawhta ama awsao laih.

⁶ Chavah kao hipazy liata pahrâ ei ta, Leikhaoh nata lôkhaohzy liata ama pahrâ.

⁷ Thobuhzy hry liata sâh ei ta, Thlahbei ry liata amâ pahmaoh.

⁸ Hmo a pahno thai leipa, dyutlai leipa sawzy châ ei ta, Râh tawhta papuapa ama châ.

⁹ “Tahmâ deikua cha hla ama sa chakiapa châ na ta, Ama saiso bie lâta ei pua haw.

¹⁰ Na pasipa ta nâ pasiesai ei ta, Kâchhie leipa ta ama pachih eina pachhao chie ei.

¹¹ Khazohpa ta ei libaw ri pathlâ ta eina panawh hapa vâta, Ei hmiakô liata asohsina hnei khao veih ei.

¹² Ei chachâh lâta chyhsa chhiepazy thyu ei ta, Keihzai na phi ei ta, Ama paraona hrozie chhiepa ta eina hro thlu ei.

¹³ Ei lâpi parao ei ta, Ei chhie nawpa ta na tei ei ta, Bao a ngiah veih ei.

¹⁴ Apyupa liata ti puapa hawhta vaw pua ei ta, Vahpi ti hawhta raokeina hry liata amâ vaw chakhao.

¹⁵ Chichhihnazy ta nâ palie thlu ei ta, Ei zachhihna cha thlih hawhta phaopa ta y ta, Ei nohlaona chhao meihdo hawhta a pai haw.

¹⁶ “Tahmâ ei hrona patlai thlupa ta y na ta, Rietheina nohzy ta eina vi.

¹⁷ Zâ ta ei ruzy ta na chaih ta, Ei pasana cha achalihna rai hnei vei.

¹⁸ Ei chysia dâhdei chhao phiapahripa ta a thla na ta, Ei viahkao rao cha ei chai â su ha bâ.

¹⁹ Khazohpa ta chiatlao liata na thy ta, Dohlei nata buchâh hawh dei ei châ bâ.

²⁰ Hy Khazohpa, cha aw na ta, nâ chhy khoh leipa chi ta, A duah na ta, tlâ eina moh chi.

²¹ Ei chô liata nôchhiepa ta y chi ta, Na ku thatlôna ta eina taola chi.

²² Thlih lâ na chalopa ta a chô lia na pakiasa chi ta, Thlihpipa ta phao pahaipa ta eina so chi.

²³ Thina lâ einâ chhi aw chi tahpa pahno na ta, Ahropa zydua châta raopa o lâ einâ chhi aw chi tahpa ei pahno.

²⁴ “Chatahrasala raona ta a vao hapa chyhsa cha, A ku kaw chaluah aw ta; Chhiena â tyhna liata bao awpa ta, Awh thlyu aw vei ma?

²⁵ Chhiena noh â tyhpa chakhei tyh va na ma? Phahlapa châta ei palôh pasa kaw tyh vei ma?

²⁶ Châhrasala hmo phapa ei hnabeiseih nota, Hmo chhiepa vaw tlô ta; Khaihna ei hâ nota, Zohna tlao a vaw tlô.

²⁷ A chalih beih leipa ta ei chhôh a tlao ta, Pasataona nohzy ta eina vaw dy.

²⁸ Noh khaihpa y leina zohna liata charei na ta, Ahmaohna liata a duah na ta, baona ei hia tyh.

²⁹ Savaizy unawhpa châ na ta, Vawpôzy viasa ei châ.

³⁰ Ei vo vaw vyhpa ta ky ta, Ei ruzy palopa ta eina kâ.

³¹ Ei totâ pyu cha mâchhiesana pyu lâta a lie ta, Ei ramo pyu cha chana pyu lâta â lie haw.”