ZAWBÂ 3 - Mara Bible RV (BSI)

Khizaw liata a vaw pipa Zawbâ â ngiapachhi

¹ Cha khai tawhta, Zawbâ cha a pakah â ta, a pina noh cha chhiesapa ta.

² Zawbâ ta reih ta:

³ “Ei pina noh leidia sala, ‘Chapaw a phaoh,’ A tahtuhpa zâ chhao leidia mawh sy.

⁴ Cha noh cha zoh sala, Chô Khazoh ta pachâ leipa sala, Khaihna ta pakhaih hra khah sy.

⁵ Zohna nata thina nohpahli ta khu sala, A chô liata meihdo a chhoh sala, Noh zohpa ta chalyusa mawh sy.

⁶ Cha zâ cha zoh kaluhna ta khu sala, Kô chhôh nohzy liata rei pâpa châ leipa sala, Thlazy reina liata chhao a hlao khah sy.

⁷ Moh teh u, cha zâ cha zâ chohpa châ sala, Thaphana pyu rai theipa châ khah sy.

⁸ Noh chhie a sa thaipazy ta, Cha noh cha chhiesapa ei sala, Leviathâ a pathyu theipazy ta, Cha noh cha chhiesapa mawh ei sy.

⁹ A awhkho awhsizy chamy ei sala, Khaihna a hâpa hmô leipa sala, Khihdeipa chhao hmô khah sy,

¹⁰ Ei nô chhi ochhi khaw leipa ta, Tymâna eina nyu khâh leipa vâta.

¹¹ “Khazia ma chhi liata ei vaw thi ha vei tly? Khazia ma py tawhta ei pua nota ei chhâ ha vei tly?

¹² Khazia ma ei nô byh ta einâ py tly? Khazia ma sâhpiti eina vaw pazysa tly?

¹³ Chata châ leipa sala cha, Reih leipa ta a zia aw na ta, A môpa ta ei pahâ ha awpa tlai.

¹⁴ Lei beizy nata ryhraotuhpazy, A rao thlâh ha awpa su âmo châta a paduatuhpazy,

¹⁵ Ngôh a hneipa beisawzy, Ama o tâkâ ta a pabiepazy, Hezy hnohna heta a vaw môpa ta ei pahâ ha awpa tlai!

¹⁶ Cha leipa chhao ta khazia ma, Athipa ta a pihpa nawh hawhta châpa ta, Khaihna a hmô leipa hawsaih hawhta ei vaw châ ha vei tly?

¹⁷ Cha liana cha moleipazy ta patypamâ khao leipa ei ta, Cha liana cha thachhâpazy amâ pahâ.

¹⁸ Cha liana cha atâhpazy hmaohkha ta a pahâ ei ta, Vaituhpa ao thei veih ei.

¹⁹ Cha liana cha molaipa nata mochyhpazy y ei ta, Sei chhao a zibeipa tawhta khotalaipa ta a y.

²⁰ “Khazia nôpopazy hnohta khaihna piepa châ ta, Pachârôhpazy hnohta hrona piepa a châ tly?

²¹ Thi a khohpa châ ei ta, Châhrasala thi leipa ei ta, Ryubyh nyupa tluapa hlâta thina tlao tlua via ei ta,

²² Thlâkhaoh ama hmô nahta, Alyna nata thaphana ta a biepazy ama châ.

²³ A lâpi nyu hapa chyhsa hnohta, Khazohpa ta a khawhlôh hapa hnohta, Khazia ma khaihna piepa châ tly?

²⁴ Ei hrôna cha ei pati châ ta, Ei rôhna ti hawhta patlaipa a châ.

²⁵ Ei chipa hmo ta na vaw tlô thlu ta, Ei ngiarohpa hmo ta eina tla thlu.

²⁶ Ei tha a hno leipa ta, A chalih thei va na; A pahâ thei leipa na ta, Tymâna tlao a vaw tlô,” tah ta.