ZAWBÂ 29 - Mara Bible RV (BSI)

Zawbâ biereipa chhâna

¹ Zawbâ ta a biereipa cha a duakheipa ta reih heih ta:

² “Aw, thla parohpazy liana kha y heih aw sah la, Khazohpa ta eina vaina nohzy hawhna khata;

³ A meiôh ei luh chô liata pakhaih ta, A khaihna ta zohna ei siepahlie no hawhna khata;

⁴ Ei locho daihtizy liata, Khazohpa nata a viasa pi ta, Ei poh o liata a y tyh no hawhna khata;

⁵ Atotaotheipa cha ei hnohta y ta, Ei sawzy ei kiapâh liata ama y tyh no hawhna khata;

⁶ Ei lâpizy sâhpiti ta pasipa châ ta, Lôpanô ta ei châta sathaw a palosa no hawhna khata, Vaw y heih sala ei tah kaw dia!

⁷ Khihpi hawka lâ pangaipa ta, Tlyliah liata atyuna ei paryh nota,

⁸ Nâ hmôpa satliazy a nyu ei ta, Machâpazy thyu ei ta amâ duah tyh;

⁹ Pawhrâhpazy bierei a chalih ei ta, Ama ku ta ama hmao amâ chahu tyh;

¹⁰ Nôpawpazy ao diah ta, Ama pakah vâphuh liata ama paleih â bai tyh;

¹¹ Nâ theipa nakhaoh ta na reithai ta, Nâ hmôpa mo liata modypa ta ei y tyh;

¹² Bao awpa ta a awhpa dyhchhiepazy bao ei na ta, Baotuh hnei leipa harapazy ei deichhy tyhpa vâ ei ta.

¹³ Thi daihmâpa byhnâ awna ei chô liata vaw tlô ta, Nôhmei palôh cha lyna hla sapa ta ei paysa.

¹⁴ Siana cha chysia ta a tobi na ta, Adona cha ei viahkao nata ei khutho a châ.

¹⁵ Mochaopa châta mo châ na ta, Pheisypa châta phei ei châ.

¹⁶ Phahlapa châta paw châ na ta, Ei pahno beih leipazy ei duakhei ei.

¹⁷ Sialeipa naohzy thlie na ta, A sataipa cha a hâh tawhta ei chhu tyh.

¹⁸ ‘Ei bu liata thi aw na ta, Ei nohzy sadi zie ta ei papôh aw;

¹⁹ Ei tharizy ti daih aw ei ta, Ei chiahzy liata azo zâ khihdei diati a y aw;

²⁰ Ei rônahna keima liata khâ thieh aw ta, Ei libaw ei ku liata khâ a thieh aw,’ tahpa ta pachâ na ta.

²¹ “Chyhsazy ta na nathliepa ta ei biereipa hâ tyh ei ta, Ei ryhraona hâpa ta chokaro amâ chalih tyh.

²² Kei ei rei khai tawhta cha reih khao tyh veih ei, Ei biezy ta a pahnie ha tyh ei.

²³ Vâsua hâpa hawhta ei biezy hâ ei ta, Châhvâ vâsua daopa hawhta ama pakah ama â tyh.

²⁴ Pahneisao ei na ta zo leipa ei ta, Ei hmia khaihna cha âmo châta a sôh kaw tyh.

²⁵ Âmo lâpi a chhih hrapa ta ama hyutuhpa ta a tyuh na ta, Bei ta a pheisaihzy hry liata a ypa hawhta y hrapa ta, Mâchhiesapazy thlapalôhtuhpa hawhta ei y.”