ZAWBÂ 28 - Mara Bible RV (BSI)

Zawbâ bie a reih pazao: Sona khataih lia a y?

¹ “Tâkâ khaoh y tlai ta, Ngôh pasiana su chhao a y.

² Thua cha alei tawhta lapa châ ta, Dawh cha lôpanô tawhta lapa a châ.

³ Chyhsapa ta zohna chatôhpa ta, Â thu chaina taihta a ngia ta, Zoh kaluhna nata thina nohpahli liata a ypa alôzy a tlua laih.

⁴ Chyhsa pahrâ leina saikao liata khaohzy chaopa ta, Phei ta a chapia leina su liata y ei ta, Chyhsazy tawhta â hlapi ta ypa ta, A bahai ei ta amâ hiehâ ngâ kaw.

⁵ Alei ta a chô lâ nie awpa papua ta, A ry lâ deikua cha mei hawhta a châ.

⁶ A lôpanôzy cha saphai lôsôhpa su châ ta, Ngôh paohpa chhao a hnei.

⁷ “Cha lâpi cha sahei niepa pavaw ta pahno leipa ta, Pahmôh mo ta hmô vei.

⁸ Sahrâhpa a khotlâh kawpazy ta tly bei leipa ei ta, Chakeibarôhneipa ta chapia beih vei.

⁹ “Chyhsapa ta alô châpa liata a ku pathla ta, Tlâhpizy ama thaby dua ta a paliepatheih.

¹⁰ Lôpanôzy a khaoh chao pahlie ta, A mo ta hmo sôhpa a hmô.

¹¹ Ti zu lei awpa ta vahtiepa hnawhzy toh ta, Hmo ânyupazy cha khaihna liata a palâhâh.

¹² “Châhrasala khataih liata ma sona cha hmô theipa a châ aw? Pahnona yna su cha khataih liata ma a y?

¹³ Chyhsapa ta a sôna pahno vei, A sôna cha ahrohpazy râh liata y vei.

¹⁴ Ti athupa ta, ‘Kei liata y vei,’ tah ta, Tilaipi ta, ‘Ei hnohta y vei,’ a tah haw.

¹⁵ Sona cha ngôh ta chalei thei awpa châ leipa ta, A mâ châta tâkâ pathliah theipa châ hra vei.

¹⁶ Ôphi ngôh ta a sôna thlie thai awpa châ leipa ta, Lôsôh chapaipa ta tlyma, Lôsôh nohvyhpa ta tlyma thlie thai awpa châ hra vei.

¹⁷ Ngôh nata thlalâ ta a tlu leipa ta, Ngôh suapa atobinazy nata ri theipa châ vei.

¹⁸ Lei râhpa lôsôh nata lôsôh pasohpa zy cha rei pâpa y leipa ta, Sona mâ cha taiku lôsôhpa mâ hlâta a ru via.

¹⁹ Kusi lônah maihpa ta a tlu leipa ta, Ngôh suapa ta thlie thai awpa châ vei.

²⁰ “Chata a châ khiahta cha, Sona cha khataih tawhta a vypa ma a châ tly? Pahnona su cha khataih liata ma a y tly?

²¹ Hmohrohneipa zydua mohmô tawhta nyupa châ ta, Vâ pavawzy chhao phihpa a châ.

²² Chhokhih nata thina ta, ‘Ama reipa la eima nah ta a thei,’ ama tah.

²³ “Khazohpa deikua cha sona lâpi pahno ta, A yna su chhao a pahno.

²⁴ Alei chhâna taihta sai ta, Avâ ry liata ato a hmô khai.

²⁵ Thlih hnohta ahrina piepa ta, Tizy cha panua thai awpa ta tao ta;

²⁶ Vâsua châta ryhpa taopa ta, Tôkalôhpa dôhla châta lâpi a tao no khata;

²⁷ Chazy cha hmôpa ta phuah ta, Padua ta a tluapapuapa a châ.

²⁸ Chatawhcha chyhsapa hnohta, ‘Pachâ teh, Khazohpa china he sona cha châ ta, Moleina a heihsaipa he pahnona cha a châ,’ a tah,” tah ta.