ZAWBÂ 27 - Mara Bible RV (BSI)

Zawbâ bie a reih pazao: Ei dona ei duakhei pyly

¹ Zawbâ ta a biereipa cha a duakheipa ta reih heih ta:

² “Ei pikhei adona nâ lapatuhpa Khazohpa hrona reipa ta reih na ta, Ei hro pachâ a parôhsapa Atotaotheipa hrona reipa ta ei reih.

³ Keima liata ei hu y chy ta, Ei hnapasu liata Khazohpa thlahpa a y chhôh cha,

⁴ Ei hmao ta biedoleipa reih leipa aw ta, Ei paleih ta dôveina bie reih aw vei.

⁵ Thai ei cha pachâ thei nawpa ei â hla ngaita, Ei thina taihta ei dona a pasiesai aw va na.

⁶ Ei siana khâchâ patu aw na ta, Pathlie beih aw va na; Ei noh hmâ hapazy vâta, Ei palôh ta na maochhie vei.

⁷ “Ei chariahpa cha moleipa hawh châ sala, Nâ thyuhnaopa cha sialeipa hawh châ mawh sy.

⁸ Khazohpa ta ano a pachâ leipa chhawh pathlah ta, A hrona a la tita, A châta khâpa hnabeiseihna ma a y?

⁹ A chô liata atymâna a vaw tlô tita, Khazohpa ta a awna a thei aw ma?

¹⁰ Atotaotheipa liata â ly aw ma? Khazohpa cha khatino rai ta a pado aw ma?

¹¹ Khazohpa hmotaotheina kyh cha pachu aw ei na ta, Atotaotheipa liata a ypa phih aw va na.

¹² Moh teh u, cha hmo cha nâmo tlai ta hmô ei chi ta, Kheihtazie ta ma hraoleipa nama châ khai thlâh ha tly?

¹³ “Moleipa ta Khazohpa liata a tovyuh awpa cha he he châ ta, Tlybaituhpazy ta Atotaotheipa tawhta ama ryuto awpa cha he he a châ:

¹⁴ A sawzy ama pôhpa chhao ta, Zaozi châta châ aw ei ta, A pathlazy ta nie khi hnei aw veih ei.

¹⁵ A thisaipazy cha potlana ta pabu aw ei ta, A nôhmeizy chaphôhtu aw veih ei.

¹⁶ Dohlei hawhta tâkâ pachopa ta, Beihlei hawhta chysia pathlu hra sala,

¹⁷ Chysia a pathlupazy cha mosiapa ta a tobi aw ta, Thaichâpazy ta a tâkâ cha amâ rai aw.

¹⁸ A o sapa cha chiariapa bu lyu ta, Vaituhpa riebu sapa hawh a châ.

¹⁹ Hneirôpa ta a zia tyh ta, Châhrasala cha hawhta châ khao aw vei; A mo padeih ta, A hneirôna a lei haw.

²⁰ Chichhihna ta tisaih hawhta tlô thlu ta, Khisô ta zâ ta a siekhei haw.

²¹ Nochhi thlih ta phaopa ta lei ta, A su tawhta a chanaoh pathlah haw.

²² Khazohpa ta zawngiah leipa ta ano cha chanaoh ta, A hmotaotheina tawhta rawrôhpa ta â râ.

²³ A ku chabaih chie ta, A su tawhta a hmao a tô chie.”