ZAWBÂ 26 - Mara Bible RV (BSI)

Zawbâ achhyna: Khazohpa rônahna pahno khai thei awpa châ vei

¹ Zawbâ ta a chhy ta:

² “Hmotaotheina a hnei leipa bao chi ta, Bâh thazeipa na pachha tyh.

³ Sona a hnei leipa pasopakâ chi ta, Pahnona dopa na reih hluh kaw!

⁴ Ahy baona ta ma he biezy he reih chi ta, Ahy thlahpa ma nâ tawhta a vaw pua tly?

⁵ Athipazy a chalyu ei ta, Tizy ry liata a pahrâpazy amâ chalyu.

⁶ A hmia liata la Athihkhih thluahruapa ta y ta, Chhokhih chhao sasaihpa ta a y.

⁷ Maw lâta avâ pakaisa ta, Aruapa liata alei a pahaisa.

⁸ A meihdo chhapazy liata tizy chaty ta, Châhrasala â hrina ta meihdo cha papyu vei.

⁹ Thlâpâ pôlôpa hmia cha khu ta, A chô liata a meihdo pazawhsa.

¹⁰ Tizy chô liata râhri haih ta, Khaihna nata zohna likawh râhri a tao.

¹¹ Avâ tôhzy a chalyu ta, A rana ei noâh ama tah kaw.

¹² A hmotaotheina ta tilaipi chatlaosa ta, A pahnona ta Rahâbi a thie.

¹³ A hu ta avâ pathaisa ta, A ku ta pari a râpa a viehpahlie.

¹⁴ Moh teh u, hezy he a lâpi chyhta palâsapa dei châ ta, A bieparu chyhta eima theipa dei a châ. Chavâta a hmotaotheina tôkalôhpa chhochhi cha, Ahy ma a pahno thei aw?” tah ta.