ZAWBÂ 24 - Mara Bible RV (BSI)

¹ “Khazia ma Atotaotheipa ta pachiana daihtizy rao leipa ta, Ano a pahnotuhpazy ta a nohzy ama hmô vei tly?

² Chyhsazy ta râhrizy pasie ei ta, Mietakuzy paru ei ta ama zao.

³ Paw hnei leipa alâ a chadai pai ei ta, Nôhmei viahchao tôhpa sôhkâ ta ama lapa.

⁴ Dyhchhiepazy lâpi tawhta chati pathlah ei ta, Alei liata dyhchhiepa zydua a nyu awpa ta ama tao.

⁵ Moh teh u, râhchawhpa liata râh alâ hawhta, Sipasapazy cha niedo tluapa ta pua ei ta, Thata hriapasa ei ta, Râraohpa ta ama sawzy nie awpa a papua.

⁶ Lyu liata sahroh lao pakhy ei ta, Moleipa kre sadô kâmo ama thoh.

⁷ Chysia leipa ta azo zâ khihdei sasaihpa ta a zia ei ta, Thlasi nota a bu awpa hnei veih ei.

⁸ Tlâhpi vâsua ta âmo cha padâ ta, Luh nyuna su hnei leipa ta lôpanô amâ chhai.

⁹ Paw hnei leipa a nô sâhpi tawhta chhu ei ta, Dyhchhiepa saw sôhkâ ta ama la tyh.

¹⁰ Chysia leipa ta thluahruapa ta paviavisa ei ta, Sapiahzy a pu ei ta, ama no deikua a di pyly.

¹¹ Ôli thih liata ôli thaw charieh ei ta, Kresawhti saoh ei ta, ama dâh deikua a phi pyly.

¹² Thi daihmâpazy ahrôna ao khihpi tawhta pua ta, Hmaphaohpa thlahpa cha baona vâpa ta â rôh. Châhrasala Khazohpa ta ahy hmah thailei pachâ vei.

¹³ “Khaihna a chakhiapa chyhsazy ama y; Khaihna yziezy pahno leipa ei ta, A lâpizy a chhih veih ei.

¹⁴ Lianycheituhpa cha awhkho ta thyu ta, Dyhchhiepa nata phahlapazy thie ta, Parutuhpa hawh hra ta zâ ta a paru tyh.

¹⁵ Apheipa mo chhao ta a zoh awpa hâ ta, ‘Mo ta na hmô aw vei,’ tah ta, A hmia â khu tyh.

¹⁶ Zoh ry liata ozy chaphiepa ta a ngia ei ta, Nohchhô ta a khawhlôh ei ta, Khaihpa rai pahno veih ei.

¹⁷ Âmo châta my cha thina nohpahli hawh châ ta, Thina nohpahli chichhihpa cha ama viasa a châ.

¹⁸ “Moleipazy cha ti bu hawhta thlai lei ei ta, Lei liata ama tovyuh chhiesapa ta y ta, Ama kre sadô lâ a heihpa y veih ei.

¹⁹ Noh kâhpa nata noh lopa ta ama dâhaw tizy chhu ta, Athihkhih ta moleipazy a chhu ha ei.

²⁰ Chhi ta âmo cha my ta, Alôpa châta athlôhpa châ ei ta, Atheipa châ khao leipa ei ta, Paraotuhpazy cha tho hawhta thliepa ama châ.

²¹ “Saw leipa chanô pasasa ei ta, Nôhmei châta hmo phapa tao veih ei.

²² A hmotaotheina hmâpa ta, Khazohpa ta thatlôpazy a daophi ta; Liahsa ta amâ dua hapa chhao ta, Hro yzie pahnopasia veih ei.

²³ Abohpa hawhta a pachâpa ta a pahâsa chypa chhao ei ta, Khazohpa mo ta ama lâpizy a tawpâ lymâ.

²⁴ Bohpi leipa chhôh cheihchalopa ta y ei ta, Ama leidia; Pahnaipa châ ei ta, La papuapa ama châ; Chhâmeih su hawhta khypa ama châ.

²⁵ Cha hawhta châ vei sala, Ahy ma haipa ei reipa cha na pasia thei aw ta, Ei bie reipazy aruapa a châzie a chaluah thei aw?” tah ta.