ZAWBÂ 23 - Mara Bible RV (BSI)

Zawbâ achhyna: Khazohpa khataih lia a y?

¹ Zawbâ ta a chhy ta:

² “Tanoh chhao he palôh pasa ngaitapa ta ei paphôh heih aw, Thata a hrô na ta ei bâh ei pathliah ha bâ hih.

³ Aw, ano ei hmô thei nawpa su pahnopa ta, A pahrâna su lâ a sie theipa châ aw sah la,

⁴ A hmiakô liata ei bie tlôkhei aw na ta, Thaichâna bie ta ei pakah ei pabie ha awpa tlai!

⁵ Einâ chhyna biezy pahno aw na ta, Ei hnohta a rei awpa ei no a vâh aw!

⁶ A hmotaotheina rônahpa ta eina chakhia aw tlyma i? Châ vei, na chakhia aw vei.

⁷ Cha liana cha chyhsa dopa ta a hnohta bie a duakhei aw ta, Nâ pachiatuhpa ta chhâzaw châta thai eina pachâ ha aw.

⁸ “Moh teh u, nochhi lâ sie na ta, Cha liata y leipa ta; Notla lâ sie na ta, Cha lia chhao hmô va na.

⁹ Maw lâta rai hria ta, Ano cha hmô leipa na ta, Chho lâ sie ta, Hmô hlei hra va na.

¹⁰ Châhrasala lâpi ei chhihpa pahno ta, Eina pasia khai tawhta la ngôh hawhta ei vaw pua aw.

¹¹ Ei phei ta a hniehnôhzy chathô lymâ ta, A lâpi a chhih na ta, tlei va na.

¹² A hmao biepiepa tleisai leipa na ta, A pakah biezy ei noh to pati hlâta ei pasô via.

¹³ Ano cha anano beih leipa châ ta, Ahy ma a palôh a pakuasa thei aw tly? A khopa cha a tao lymâ.

¹⁴ Keima châta a raopa cha a patlô aw, Cha hawhpa hmo cha a hluhpi a hnei.

¹⁵ Chavâta a hmiakô liata thlazohpa ta y na ta, Ei pachâ châh ta, ano cha ei chi ngaita tyh.

¹⁶ Khazohpa ta ei palôh tha pachhâ ta, Atotaotheipa ta ei thlah eina pazo.

¹⁷ Chatanachôta zohna ta na chalihsa leipa ta, Zoh kaluhna ta ei hmia khu thei vei.”