ZAWBÂ 22 - Mara Bible RV (BSI)

Eliphâ biereipa: Zawbâ moleina a lai ngaita

¹ Temani chyhsa Eliphâ ta a chhy ta:

² “Chyhsapa heta Khazohpa châta phahnaina a hnei aw ma? Asopa la anosasyh châta phahnaina a hnei tlai aw.

³ Nâ dopa vâta Atotaotheipa â ly kaw ma? Seina hnei leipa na châpa cha â thôhkhei kaw ma?

⁴ Ano na chi thei nawpa ta ma cha chhorei ta, Ryureina liata a châ ngiakhei tly?

⁵ Na paraona hluh tupa vâta châ ta, Na moleina ta chhâna rai hnei leipa ta,

⁶ Chhâpa y leipa ta na unawhzy tawhta sôhkâ la chi ta, Thluahruapazy ama chysia pahluhpa chi ta,

⁷ Thachhâpa hnohta ti do awpa pie leipa chi ta, Nodipa hnohta viahchhâ na pie leipa vâta a châ.

⁸ Chyhsa thatlôpa ta râh hnei ta, Khokheipa chyhsa ta cha liata a pahrâ.

⁹ Nôhmeizy ku ruapa ta pasiesa chi ta, Paw hnei leipa bâhzy na thlie.

¹⁰ Chavâta na kiapâh liata khoheih sai ta bie ta, Apahlawna nata thlazohna ta cha patu ta,

¹¹ Na hmô thei lei nawpa ta zohna ta cha khu ta, Tisaih ta a cha vao hapa a châ.

¹² “Khazohpa cha avâ sâhpa liata a ypa châ ta, Awhsi a sâh chaipazy khi moh la, Amâ sâhzie khi moh tua rai!

¹³ ‘Khazohpa cha khâpa ma a pahno tly? Zohna chatôhpa ta ryureih thei bao aw vei.

¹⁴ A hmô lei nawpa ta meihdo chhapa ta pahli ta, Avâ chôkhu liata tlâ â hlaihlâpa khi,’ tah chi ta.

¹⁵ Chyhsa moleipazy siena Lâpi parohpa ma a chhih nâ chhuah hra?

¹⁶ Ama daihti hlâta siekheipa châ ei ta, Amâ bôna tisaih ta a phao hapa kha.

¹⁷ Khazohpa hnohta, ‘Maniah siesai teh, Atotaotheipa ta eima chô liata khâpa ma a tao thei tly?’ tah ei ta.

¹⁸ Chatanachôta ama o cha hmo pha to ta a pabie; Moleipazy pachâna he kei tawhta la â hla kaw.

¹⁹ Ama raona cha mosiapazy ta ama hmô nahta a ly ei ta, Thaichâpazy ta âmo cha pahneisao ei ta,

²⁰ ‘Eima khakhaipazy chhawh pathlahpa châ ei ta, Laibâhpazy mei ta a kâ khai ha ei,’ ama tah.

²¹ “Khazohpa a ngiarih la, Ano nata aryhpa ta y mah y; Chatanachata na châta hmo phapa a vaw tlô aw.

²² A pakah tawhta pachuna a pyh la, A biezy na palôh liata khô mah y.

²³ Atotaotheipa lâ na kua khiahta cha, Paduapathipa châ aw chi ta; Adoleina na poh o tawhta lâhlapi lâ thypa ta,

²⁴ Ngôhzy dohlei liata pabu la, Ôphi ngôhzy chavah lôzy hry liata na pabu khiahta cha,

²⁵ Atotaotheipa cha na ngôh vaw châ aw ta, Na tâkâ sôhpa a vaw châ aw.

²⁶ Chatawhcha Atotaotheipa liata a ly aw chi ta, Khazohpa lâ na hmia na pachhua aw.

²⁷ Ano lâ thlahchhâ aw chi ta, Na thlahchhâna thei aw ta, Na bietai na patlô ha aw.

²⁸ Bie na pathlupa maih na châta taopa châ aw ta, Khaihna ta na lâpizy a pakhaih aw.

²⁹ Khazohpa cha reisipazy a pachha tyhpa vâta, Panawhpa ama châ tita, ‘Apalaina vâta a châ,’ na tah aw.

³⁰ Thailei a châpa taihta pachha aw ta, Na ku pathaihpa hmâpa ta a pachha aw,” tah ta.