ZAWBÂ 21 - Mara Bible RV (BSI)

Zawbâ achhyna: Moleipa chhao a hneirôh thlâh ha hra

¹ Zawbâ ta a chhy ta:

² “Ei biereipazy he pakhâta ta na nathlie u la, Cha cha nâmo châta thlalôhna châ mawh sy.

³ Na pachâ thai u la, ei reih tua aw, Ei rei khai tawhta na pahneisao lah vâ ei chi.

⁴ Ei paphôhna he chyhsapa naikawh ma a nua va, Kheihta ma palôh chhâ leipa ta ei y thei aw?

⁵ Na vaw moh u la, nama noâh tua sa, Nama ku ta nama pakah pamai tua u.

⁶ Ei thei châh ta chi pathoh kaw tyh na ta, Ei pôhpa zydua â chatho khai ha tyh.

⁷ Khazia ma moleipazy hroh ei ta, Machâna taih tlôpa ta, Thatlôpa nata hmotaotheipa ama châ tly?

⁸ Ama mohmô liata ama satheizy pitloh ei ta, Ama hmiakô liata ama pathlazy ama pitloh.

⁹ Ama ozy chichhihna tawhta a boh ta, Khazohpa sômasi ama chô liata tla vei.

¹⁰ Ama viahchao tôhpa ta chi pathla thei ta, Ama viahchao pano taw pataw ta hrih beih vei.

¹¹ Ama hawtizy mietaku zaw hawhta tlâ pathlie ei ta, Lâh ei ta ama palao.

¹² Totâ nata tlaipihzy patlapa ta hla sa ei ta, Ramo pyu liata amâ ly kaw tyh.

¹³ Ama nohzy a phapa ta hmâh ei ta, Thlalôhpa ta Athihkhih lâ ama sie.

¹⁴ Khazohpa hnohta, ‘Miah siesai teh! Na lâpizy pahno khoh ma pi.

¹⁵ Atotaotheipa cha khâpa ma a châ tly, Ano eima chakao awpa cha? Ano lâ thlahchhâ sih la, Khâpa athôhna ma eima hmô aw?’ tah ei ta.

¹⁶ Moh teh u, ama phasana cha âmo ku ta tao theipa hawhta pachâ ei ta, Chavâta moleipazy pachâna cha kei tawhta â hla ngaita.

¹⁷ “Moleipazy meiôh cha khâ pachhai tyhpa châ vei ma? Ama chhiena ama chô liata vaw tlô tyh vei ma? Khazohpa ta a hiehâhpa ta ama sa pasasa tyh vei ma?

¹⁸ Ziza hmiakô liata sawphao hawh châ ei ta, Chothyu ta saviah a phaopa hawh châ veih ei ma?

¹⁹ ‘Ama moleina cha Khazohpa ta ama sawzy châta a pachô,’ tah ei chi ta, Ama pahno thei nawpa ta ama chô liata vaw patlôsa mawh sy.

²⁰ Ama mo tlai ta ama raona cha hmô ei sala, Atotaotheipa pathiiana cha doh mawh ei sy.

²¹ A thlazy chhâ hai tlôh ta, Khâpa châta ma a o tlai cha â tymâkhei ngâ kaw tly i?

²² Khazohpa cha âsâhpa liata a ypazy pachiatuhpa châ ta, Ahy ma ano cha novâhna a pachu thei aw?

²³ Chyhsa pakha cha a locho nota thi ta, Thadâhpa nata abohpa ta a y nota,

²⁴ A sapati pha lichih ta, A ruzy liata lathli hluh lichih ta a thi haw.

²⁵ Chyhsa hropa deikua cha hro pachârôhpa ta thi ta, Phana rai padi beih leipa ta a thi haw.

²⁶ Dohlei liata â lyupa ta a zia ei ta, Châkariepa ta a pahly raihrie ei.

²⁷ “Moh teh u, nama palôh pahno na ta, Thailei na pachâ namâ chhuahpa chhao ei pahno.

²⁸ ‘Khataih liata ma nôpawpa o cha a y? Moleipa pahrâna poh o cha khataih liata a y?’ nama tah.

²⁹ Lâpi liata khitlyhpazy hiahri veih ei chi ma? Ama reipazy a pyh veih ei chi ma?

³⁰ Moleipa cha chhiena noh liata pahlôhpa châ ta, Pathiiana noh liata pachhapa ta a y ama tahpa thei veih ei chi ma?

³¹ Ahy ma a hmiakô liata a lâpi phuah ta, Ahy ma a hmotaopa viari a thô tly?

³² Thlâ lâ siekheipa châ ta, A thlâ liata vaituhpa sopa a châ.

³³ Saikao liata leitlozy cha ano châta thlôh kaw ta, Mo to ta ano pazi ei ta, Rei tiah lei a hmia lâta ama sie.

³⁴ Cha hawhta a châpa tlai ta, Khazia bie ruapa ta thlah eina palôh ei chi? Biedoleipa tah leipa ta la, Namâ chhyna liata khâpa hmah y vei,” tah ta.