ZAWBÂ 20 - Mara Bible RV (BSI)

Zôpha biereipa: Moleipa cha riethei a tao aw

¹ Nâmâ chyhsa Zôpha ta a chhy ta:

² “Ei nôpona palôh ta châ chhy awpa ta einâ hnaw, Thata patypamâpa ei châpa vâta.

³ Ei nohzao nawpa maochhiena bie thei na ta, A chhy awpa ta ei novâhna thlahpa ta ei palôh eina pahra.

⁴ He hawhpa hmo he hlâno tawhta y ta, Alei liata chyhsapa y rakha tawhta y ha ta;

⁵ Hmoparaopa thaphana cha chyuta ta, Khazoh a pahno leipa alyna cha buakha deita a châ tahpa pahno beih va chi ma?

⁶ A rônahna ta avâzy daipa ta, A luh ta meihdo tlô hra sala,

⁷ Ano ie hawhta chhâzaw ta leidia aw ta, A vaw hmô hapazy ta, ‘Khataih lia a y haw?’ ama tah aw.

⁸ Mâ hawhta a zaw aw ta, Hmôpa châ khao leipa aw ta, Zâ aluahna hawhta chadai paipa a châ aw.

⁹ Ano a hmô tyhpa mo ta hmô khao leipa aw ta, A yna su ta ano cha moh khao aw vei.

¹⁰ A sawzy ta sipasapazy khokheina tlua aw ei ta, Ano ku ta a sôh a papai aw.

¹¹ A ruzy cha thyutlia thatlôna ta bie ta, Châhrasala a hnohta dohlei liata â zia aw.

¹² “Moleina cha a pakah liata thlôh kaw ta, Chavâta a palei ry liata nyu ta,

¹³ Pathlie awpa pasaih leipa ta, A pakah chhôh liata khâchâ paô hra sala,

¹⁴ A py liata pati a ypa cha a vaw nano ta, A chhôh liata chyuphao châmaih lâta â lie haw.

¹⁵ Hneirôna a palâpazy cha pali lilaw heih ta, Khazohpa ta a py tawhta a thy pathlah khai ha tyh.

¹⁶ Chyuphao châmaih sy aw ta, Vâzi pakah ta a thie aw.

¹⁷ Vahtiezy hmô leipa aw ta, Kheihti nata sâhpiti lona chavahzy hmô hra aw vei.

¹⁸ A hriapasana thei nie leipa ta pakua aw ta, A sôhpaliena athôhna liata lôhrâtlôpa ta y aw vei,

¹⁹ Dyhchhiepa tlybaipa ta siesai ta, A sa leipa o a chhupa vâta.

²⁰ “A pavyhpi aohraohpa ta palôtlâh â paoh beih leipa vâta, A aohkhopa cha pahlôh leipa ta a nie khai lymâ tyh.

²¹ A nie khai tawhta laibâhpa rai y khao tyh leipa ta, Chavâta a hneinazy a daih parei aw vei.

²² Â tivy chaina daihti liata nôpona a tyh aw ta, Dyhchhiepa to ta ama ku ama hy thlu aw.

²³ Py biepa nata lôhrâtlôpa ta a y nota, Khazohpa ta a pathiiana a chô liata vaw tuah aw ta, A hriena chaihhrai ta avâ hawhta a sua thlu aw

²⁴ Thua chaihrai â râsaipa chhao ta, Dawh libaw ta a ka pahlie aw.

²⁵ Libaw cha a pôhpa tawhta phiapa châ ta, Libaw hmao pathliepa a hmôkhaw tawhta vaw pua ta, China ta a chô liata a tla thlu.

²⁶ A ryusôhpazy chô liata zoh kaluhna a chhoh thlu aw ta, Zie leipa mei ta ano cha palâ aw ta, A poh o liata pahlôhpa zydua a kâ khai aw.

²⁷ Avâzy ta a thaileichâna phuah aw ei ta, Alei ta ano cha a thyuhnao aw.

²⁸ Tisaih ta a o ly aw ta, Khazohpa pathiiana no liata a phaoh pathlah ha aw.

²⁹ Cha cha chyhsa moleipa châta Khazohpa tawhta a tovyuh châ ta, A ryuto châta Khazohpa raopa a châ,” tah ta.