ZAWBÂ 19 - Mara Bible RV (BSI)

Zawbâ achhyna: Nâ chatlaituhpa a hroh

¹ Zawbâ chata a chhy ta:

² “Khachâ ma na taochhie aw ei chi ta, Biezy ta eina hriechheih aw ei chi tly?

³ Ei hrawh tlai na maochhie ha ei chi ta, Ei chô liata hmo doleipa nama taopa he nama noza vei tly ma?

⁴ Ei vaw taopasi hapa chhao ta, Ei taopasipa cha keima liata tlâ a y aw.

⁵ Ei chô liata a papiparysapa ta, Ei maophyuhna he keima eina châta nama hmâ khiahta cha,

⁶ Khazohpa ta thailei na pachâ ta, A sao ta eina khu tahpa pahno muh vy.

⁷ Moh teh u, ‘Thachahra hmâpa a châ!’ tahpa ta awh na ta, Châhrasala a chhypa châ va na, Na bao awpa ta awh na ta, Châhrasala adona taopa châ vei.

⁸ Ei lâpi liata diahsua na chhôh khâh ta, Sie palâh thei leipa na ta, Ei lâpizy liata zohna eina so khâh.

⁹ Ei rônahna tawhta na pahluh ta, Ei luh tawhta lakho eina lapa haw.

¹⁰ Kyh to liata na parao ta, Lei ha na ta; Ei hnabeiseihna tho hawhta a phia pathlah khai haw.

¹¹ Ei chô liata a pathi pa-ia ta, A khakhaipa hawhta eina pachâ.

¹² A pheisaihzy â raohpa ta a vy ei ta, Eina siehnao nawpa lâpi a tao ei ta, Ei poh o ama dôh.

¹³ “Ei unawhzy kei tawhta â hlapa ta paysa ta, Nâ pahnopazy nâ cha-uahpa ama châ khai ha bâ.

¹⁴ Ei sanawhzy ta na pathlua ei ta, Ei viasa phapazy ta eina my ha ei.

¹⁵ Ei o liata khichhaizy nata nâ chakaotuhpazy ta na my ei ta, Ama mohmô liata chihropa hawh ei châ bâ.

¹⁶ Nâ chakaotuhpa aw na ta, Ei pakah ta ei haw ngâ kawpa chhao ta, Na chhy khoh khao vei.

¹⁷ Ei hu cha ei lapinô châta roh chhiepa châ ta, Chhi kha sawzy chhao ta nâ hnia khoh khao veih ei.

¹⁸ Hawtizy taihta na mohnao ei ta, Ei thyu nahta eina diah ei.

¹⁹ Ei viasa lôhkhyzy ta na pasi ei ta, Kyh ei pachâpazy ta einâ heihnao ei.

²⁰ Ei ruzy ei vo nata ei sapa liata a bai ha ei ta, Ei hâh vo deita ta a hrohpa ei châ bâ hih.

²¹ Hy nâmo, ei viasazy saih u, Na ngiachhie u la, rie na ngiachhie muh vy; Khazohpa ku ta eina hria ha hih!

²² Khazia Khazohpa ta eina chadaipa hawhta, Nâmo taihta eina chadai hra ei chi? Khazia ei sapa pasa taona he â daih nama tah vei tly?

²³ “Aw, ei biezy he ropa châ sala, Châbu liata chapaipa châ sala ei tah kaw dia!

²⁴ Aw, ei biezy he thua châsôh nata ky ta Lôpanô liata chhâzaw ta khaipa châ sala ei tah kaw dia!

²⁵ Nâ Chatlaituhpa cha a hroh tahpa ei pahno, Achhâna liata la ano ta alei chô liata einâ duakhei aw.

²⁶ Ei vo ky khai ha hra sala, Ei sapa chhâ ta Khazohpa cha hmô aw na ta,

²⁷ Kei châta moh aw na ta, Keima mo tlai ta hmô aw ta, Mohropa mo ta hmô aw vei. Ei palôh tha deikua a zei ngaita.

²⁸ ‘Ano cha kheihta ma eima taola thei aw?’ tahpa ta, ‘Hmo thabypa cha ano liata a y,’ Nama tah khiahta cha,

²⁹ Zaozi chi muh vy. Pathiiana ta zaozi ta hriena tlôkhei ta, Ryureina a y tahpa pahno muh vy,” tah ta.