ZAWBÂ 18 - Mara Bible RV (BSI)

Bildâ biereipa: Moleipa cha Khazohpa ta a hrie tyh

¹ Suhi chyhsa Bildâ ta a chhy ta:

² “Khachâ ma biethâh na tlua chy aw? Pachâ ha tua la, cha khai tawhta eima reih aw.

³ Khazia sahroh hawhta miah pachâ chi ta, Na mohmô liata ahrupa ta miah na rao?

⁴ Hiehâhpa ta nâmasasyh a chaphiepa chi cha, Nâma châta alei siesaipa a châ aw ma? Lôpanô a su tawhta pasiepa a châ aw ma?

⁵ “A châ na, moleipa khaihna cha pachhaipa châ aw ta, A meipaleih chhao khaih aw vei.

⁶ Ano poh o liata cha khaihna chhao zoh aw ta, A luh chô liata meiôh pachhaipa a châ aw.

⁷ A lâsie chahrapa cha thapachhâpa châ aw ta, A ryhraona ta ano cha a thy pathlah aw.

⁸ Ano phei tlai ta sao lâ a chhi aw ta, Khoheih khaoh chô liata a sie aw.

⁹ Sari ta a phei ngavâhmaothy pa-ao aw ta, Khoheih ta ano cha a patu aw.

¹⁰ Alei liata heihbaw pakaw khâhpa châ aw ta, Lâpi liata sari chôkhâhpa a châ aw.

¹¹ Chichhihna ta su to liata pachisa aw ta, A chadai aw ta a parâsa aw.

¹² A thatlôna panao aw ta, A papao awpa chhiena cha a mâ chiehpa ta a y.

¹³ Chhiena ta a vozy nie aw ta, Thina sawchapaw uhtheipa ta a kupheizy a nie khai aw.

¹⁴ Â pahniehna poh o tawhta phiapa châ aw ta, Chichhihpa beizy lâ a chhipa a châ aw.

¹⁵ A chyhsa a châ leipazy a poh o liata pahrâ aw ei ta, A pahrâna liata kaih hiepa a châ aw.

¹⁶ A ry lâta a thari raoh aw ta, A chô lâta a chiahzy a uah aw.

¹⁷ Ano atheithlâhna alei tawhta lei aw ta, Lâpi liata a moh y aw vei.

¹⁸ Khaihna tawhta zohna lâ topa châ aw ta, Khizaw tawhta a chadaipa a châ aw.

¹⁹ A phopi hry liata chipathla tlyma sawteih nawhteih tlyma hnei leipa aw ta, A pahrâ tyhna liata a hrohpa y aw veih ei.

²⁰ Notla chyhsazy ta a vâchhiena cha noâh tah aw ei ta, China ta nochhi chyhsazy a tla thlu aw ei.

²¹ Moleipazy pahrâna cha, cha hawhta châ aw ta, Khazohpa a pahno leipazy pahrâna su chhao, cha hawhta a châ aw,” tah ta.