ZAWBÂ 17 - Mara Bible RV (BSI)

Zawbâ bie a reih pazao: Ei hnabeiseihna khataih liata a y?

¹ Ei thlahpa keichheihpa ta, Ei nohzy lei ta; Kei châta thlâ â mâ haw.

² Nâ pahneisaopazy ei kiah liata y ei ta, Ama tahchakianazy vâta ei mo ei paso.

³ “Hy Khazohpa, sôhkâ na sopa mah y, Sôhkâ nâ sopa awpa mohropa hnei va na.

⁴ Pahnona hnei lei awpa ta ama palôh na khaw ha hnohkua cha, Pahniena ama to awpa pasaih khah y.

⁵ Ama hmohneipa a hnei thei nawpa ta a viasazy a leihtuhpa cha, A sawzy ama mo a chao aw.

⁶ “Phopizy saisona bie ta na tao ta, A hmia liata pachih ama pachhao chiepa lâta ei pua haw.

⁷ Hiehâna ta ei mo pazoh ta, Ei pôhpa pachiahpa zydua chhao nohpahlipa hawh a châ bâ.

⁸ Mosiapazy ta cha cha noâh tah ei ta, Mopathaihpazy cha moleipazy vâta amâ hra.

⁹ Mosiapa cha a lâpi khâchâ patu ta, Ku pathaihpa cha a thatlô rili tyh.

¹⁰ Nâmo deikua cha, nama zydua ta reih heih tua u, Nama hry liata ahy hmah chyhsa sopa cha hmô aw veih ei na.

¹¹ Ei nohzy khô ta, Ei chhuahnazy rao ta, Ei palôh khopazy a rao khai haw.

¹² Zâ cha chhô tah ei ta, Chhô cha zâ ama tah tyh.

¹³ Athihkhih cha ei o hawhta vâ kaw sah la, Zohna liata ei rakhô soh sah la,

¹⁴ Khaohtlô hnohta, ‘Ei paw na châ,’ tahpa ta, Châkariepa hnohta, ‘Ei nô, ei sietanô,’ ei tah khiahta cha,

¹⁵ Khataih liata ma ei hnabeiseihna a y? Ahy ma ei hnabeiseihna cha a hmô aw?

¹⁶ Ei hnabeiseihna cha Athihkhih chhikao lâ ma a chô aw? Dohlei lâ ma hmaohkha ta eima zu aw?” tah ta.